រាជធានីភ្នំពេញ ៖ រដ្ឋលេខាធិការក្រសួងការពារជាតិ លោកនាយឧត្តមសេនីយ៍នាង ផាត ទីប្រឹក្សាផ្ទាល់សម្តេចអគ្គមហាសេនាបតីតេជោហ៊ុន សែន និងជាប្រធានលេខាធិការដ្ឋានគណៈកម្មាធិការព្រំដែនទូទៅកម្ពុជា-ថៃ បានប្រាប់អ្នកសារព័ត៌មានកាលពីថ្ងៃទី១១ សីហា ឆ្នាំ២០១១ ថា គណៈកម្មាធិការព្រំដែនទូទៅកម្ពុជា-ថៃ
រាជធានីភ្នំពេញ ៖ រដ្ឋលេខាធិការក្រសួងការពារជាតិ លោកនាយឧត្តមសេនីយ៍នាង ផាត ទីប្រឹក្សាផ្ទាល់សម្តេចអគ្គមហាសេនាបតីតេជោហ៊ុន សែន និងជាប្រធានលេខាធិការដ្ឋានគណៈកម្មាធិការព្រំដែនទូទៅកម្ពុជា-ថៃ បានប្រាប់អ្នកសារព័ត៌មានកាលពីថ្ងៃទី១១ សីហា ឆ្នាំ២០១១ ថា គណៈកម្មាធិការព្រំដែនទូទៅកម្ពុជា-ថៃ (GBC) នឹងជួបប្រជុំក្នុងពេលឆាប់ៗខាងមុខនេះ ប៉ុន្តែលោកនាយឧត្តមសេនីយ៍មិនបានបញ្ជាក់ពីកាលបរិច្ឆេទ និងទីកន្លែងរៀបចំកិច្ចប្រជុំនោះឱ្យបានច្បាស់លាស់ទេ ។ ការថ្លែងដូច្នេះក្នុងពេលដែលលោកនាយឧត្តមសេនីយ៍ចូលរួមក្នុងកិច្ចប្រជុំពិភាក្សាស្តីពីការសហការ និងទំនាក់ទំនងល្អ លើការងារព្រំដែន រវាងគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) នាថ្ងៃទី១១ សីហា ឆ្នាំ២០១១ នៅទីស្តីការក្រសួងការពារជាតិ។
លោកនាយឧត្តមសេនីយ៍នាង ផាត មានប្រសាសន៍នាឱកាសនោះថា យោងតាមអនុសាសន៍របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងអង្គប្រជុំពេញអង្គគណៈរដ្ឋមន្ត្រី នាថ្ងៃទី៥ សីហា ឆ្នាំ២០១១ និងតាមមតិណែនាំរបស់លោកឧបនាយករដ្ឋមន្ត្រីទៀ បាញ់ រដ្ឋមន្ត្រីក្រសួងការពារជាតិ បានលើកឡើង អំពីគោលបំណងនៃកិច្ចប្រជុំពិភាក្សាស្តីពីការសហការ និងទំនាក់ទំនងល្អលើការងារព្រំដែនរវាងគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) សំដៅបង្កើនកិច្ចសហប្រតិបត្តិការ និងទំនាក់ទំនងល្អរវាងកម្ពុជា-ថៃ នៅព្រំដែន ធ្វើឱ្យតំបន់ព្រំដែនក្លាយទៅជាតំបន់សន្តិភាព មិត្តភាព សហប្រតិបត្តិការ និងអភិវឌ្ឍន៍។ គោលដៅនេះនឹងសម្រេចបានតាមការយោគយល់គ្នា សហប្រតិបត្តិការគ្នា និងដោះស្រាយបញ្ហាដោយសន្តិវិធី ។
លោកនាយឧត្តមសេនីយ៍នាង ផាត បានបញ្ជាក់ថា អ្វីដែលបានរៀបរាប់ខាងលើជាគោលនយោបាយរបស់រាជរដ្ឋាភិបាលកម្ពុជា សំដៅកសាងតំបន់ព្រំដែន កម្ពុជា-ថៃ ជាតំបន់សន្តិភាព និងអភិវឌ្ឍន៍ឱ្យបានប្រសើរឡើងជាលំដាប់។ គោលដៅជាយុទ្ធសាស្ត្ររបស់រាជរដ្ឋាភិបាលនៅក្នុងក្របខណ្ឌនៃកិច្ចការពារ និងអភិវឌ្ឍន៍ប្រទេសជាតិ ដោយបន្តអនុវត្តចក្ខុវិស័យរបស់សម្តេចអគ្គមហាសេនាបតីតេជោហ៊ុន សែន ប្រែក្លាយអតីតតំបន់ប្រយុទ្ធមកជាតំបន់អភិវឌ្ឍពីសមរភូមិទៅជាទីផ្សារ ពីស្នូរគ្រាប់ទៅជាកន្លែងសូត្រធម៌ ឬស្តាប់ភ្លេង ស្តាប់ចម្រៀង ពីតំបន់គ្រោះថ្នាក់ទៅជាតំបន់ទេសចរណ៍។
ពាក់ព័ន្ធនឹងការដកកងទ័ពចេញពីតំបន់ក្បែរប្រាសាទព្រះវិហារ លោកនាយឧត្តមសេនីយ៍នាង ផាត បានមានប្រសាសន៍ថា ចំពោះតំបន់ក្នុងគំនូស ICJ ប្រមាណ១៧គីឡូម៉ែត្រការ៉េនោះ ប្រសិនបើមានការដកទ័ពគឺទាំងកម្ពុជា និងថៃ ត្រូវដកដំណាលគ្នា និងស្ថិតក្រោមការត្រួតពិនិត្យរបស់អ្នកសង្កេតការណ៍ឥណ្ឌូណេស៊ី ។ ចំណែកការកែសម្រួលកងទ័ពដែលកម្ពុជាបានធ្វើកន្លងមក គឺមិនពាក់ព័ន្ធក្នុងផ្ទៃដី១៧គីឡូម៉ែត្រការ៉េ ដែលកំណត់ដោយ ICJ នោះទេ ហើយជាប្រពៃណីនៃការកែសម្រួលកងទ័ពរបស់កងយោធពលខេមរភូមិន្ទ ៕
ចែករំលែកព័តមាននេះ