ឆ្លងចរន្តអគ្គិសនីអំពូលពិដាន បង្កការឆាបឆេះផ្ទះវីឡាកូនកាត់ផ្អើលទាំងកណ្តាលអធ្រាត្រ
- ភ្នំពេញ
រាជធានីភ្នំពេញ ៖ មានហេតុការណ៍ឆ្លងចរន្តអគ្គិសនីមួយ បានកើតឡើងបង្កជាអគ្គិភ័យឆាបឆេះផ្ទះវីឡាកូនកាត់លក់ស្បែកជើង និងសម្លៀកបំពាក់មួយកន្លែង បណ្ដាលឲ្យផ្ទះខាងលើរួមទាំងទំនិញនៅក្នុងនោះមួយចំនួនធំបានរងការខូចខាត ប៉ុន្តែសំណាងផងដែរ ដែលពុំបានបណ្ដាលឱ្យម្ចាស់ផ្ទះខាងលើរងរបួសនោះឡើយ ។
ហេតុការណ៍គ្រោះអគ្គិភ័យនេះ បានកើតឡើង កាលពីនៅវេលាម៉ោងប្រហែលជាង១២យប់រំលងអធ្រាត្រឈានចូលថ្ងៃទី១១ ខែកញ្ញា ឆ្នាំ២០២៦ នៅចំណុចផ្ទះវីឡាកូនកាត់លេខA១៧០ ផ្លូវលេខ២០បុរី ម៉នដានីគម្រោងទី១០ ស្ថិតនៅក្នុងភូមិតាអិន សង្កាត់ស្នោរ ខណ្ឌកំបូល រាជធានីភ្នំពេញ ។
នគរបាលបានប្រាប់ឲ្យដឹងថា ផ្ទះវីឡាកូនកាត់ដែលរងការឆាបឆេះនោះ ជាប្រភេទសំណង់ថ្មទំហំទទឹង១០ម៉ែត្រ និងបណ្ដោយ១១ម៉ែត្រ ដែលមានម្ចាស់ឈ្មោះ ពៅ សារ៉េត ភេទស្រី អាយុ៦០ឆ្នាំ មុខរបរលក់ស្បែកជើង និងសម្លៀកបំពាក់ ។ នៅវេលាម៉ោងកើតហេតុខាងលើខណៈម្ចាស់ផ្ទះកំពុងដេកលង់លក់ ស្រាប់តែមានហេតុការណ៍ឆ្លងចរន្តអគ្គិសនីអំពូលភ្លើងពិដានក្នុងផ្ទះ បង្កឲ្យមានការឆាបឆេះផ្ទះ និងសម្ភារទំនិញតែម្ដង ។
នគរបាលបានប្រាប់ឲ្យដឹងបន្តថា ពេលនោះ បានបង្កឲ្យមានការភ្ញាក់ផ្អើលដល់អ្នកជិតខាង ហើយម្ចាស់ផ្ទះ និងក្រុមគ្រួសារបាននាំគ្នារត់ចេញក្រៅទាន់ពេល ទើបគ្មានអ្នកគ្រោះឡើយ ។ បន្ទាប់មក កម្លាំងប៉ុស្តិ៍នគរបាលរដ្ឋបាលស្នោរ និងកម្លាំងអធិការដ្ឋាននគរបាលខណ្ឌកំបូលបានចុះទៅកាន់ទីតាំងកើហេតុខាងលើ រួចផ្ដល់ដំណឹងដល់ក្រុមអ្នកពន្លត់អគ្គិភ័យឲ្យនាំយករថយន្តពន្លត់អគ្គិភ័យទៅបាញ់ទឹកពន្លត់ភ្លើង ។
នគរបាលបានប្រាប់ឲ្យដឹងបន្ថែមទៀតថា ខណៈនោះ មានរថយន្តពន្លត់អគ្គិភ័យបានទៅដល់ជាបន្តបន្ទាប់ចំនួន៤គ្រឿង ក្នុងនោះ រថយន្តពន្លត់អគ្គិភ័យការិយាល័យបង្ការ ពន្លត់អគ្គិភ័យ និងសង្គ្រោះនៃស្នងការដ្ឋានរាជធានីភ្នំពេញចំនួន២គ្រឿង ។ និងរថយន្តពន្លត់អគ្គិភ័យបុរីសង្ឃឹមថ្មីចំនួន២គ្រឿង ហើយបានពន្លត់រយៈពេលកន្លះម៉ោងក្រោយមក ភ្លើងក៏បានរលត់ទៅវិញទាំងស្រុង ចំណែកផ្ទះនោះរួមទាំងសម្ភារទំនិញនៅក្នុងនោះមួយចំនួនធំបានរងការខូចខាត ៕
ចែករំលែកព័តមាននេះ