រាជធានីភ្នំពេញ៖ នៅក្នុងកិច្ចប្រជុំពិភាក្សាចរចា កំណត់ប្រាក់ឈ្នួលអប្បបរមា នៅថ្ងៃទី១៤ ខែកញ្ញា ឆ្នាំ២០២៦នេះ តំណាងភាគីកម្មករនិយោជិត បានស្នើនូវតួលេខកំណើនរបស់ខ្លួនពីរផ្សេងៗគ្នា ដែលសហជីពភាគច្រើន ស្នើតួលេខកំណើន ១៥,៣ ដុល្លារអាម៉េរិក និងមួយចំនួនទៀតស្នើតួលេខកំណើន ៤០,៦ដុល្លារអាម៉េរិក លើតួលេខបច្ចុប្បន្នចំនួន ២១០ដុល្លារអាម៉េរិក។ ដោយឡែក តំណាងភាគីនិយោជកវិញ បានស្នើរក្សាតួលេខបច្ចុប្បន្នចំនួន ២១០ដុល្លារអាម៉េរិក ពីព្រោះកន្លងមកនេះតំណាងភាគីនិយោជក បានបន្ថែមចំនួន ២,៥ដុល្លារអាម៉េរិក សម្រាប់ជួយសម្រួលបន្ទុកលើការ ចំណាយសោហ៊ុយធ្វើដំណើររួចហើយ ។
កិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា អាណត្តិទី៤ ឆ្នាំទី២ លើកទី២ នេះ ធ្វើឡើងក្រោមការសម្របសម្រួលពីឯកឧត្តម ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ ដើម្បីបន្តពិភាក្សាកំណត់ប្រាក់ឈ្នួលអប្បបរមា សម្រាប់កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផល ធ្វើដំណើរនិងកាបូប សម្រាប់ឆ្នាំ២០២៧ ។
ឯកឧត្តម ហេង សួរ បន្តថា៖ «ថ្ងៃនេះគឺជាលទ្ធផលដែលត្រីភាគី បានគោលជំហរជាបឋមរៀងៗខ្លួន បន្តមកភាគីនីមួយៗនឹងដកខ្លួនទៅពិចារណា ដើម្បីលើកយកការពិភាក្សានេះម្តងទៀតនៅរសៀលថ្ងៃទី ១៨ ក្នុងការពិនិត្យនូវវឌ្ឍនភាព នៃគោលជំហររបស់ភាគីនីមួយៗ។ ក្នុងដំណើរការអង្គប្រជុំព្រឹកមិញនេះ គឺភាគីនីមួយៗក៏បានពន្យល់អំពីហេតុផល នៃការស្នើសុំដំឡើងប្រាក់ឈ្នួល និងម្ខាងទៀតក៏សុំរក្សាប្រាក់ឈ្នួលនៅដដែលផងដែរ។ អញ្ចឹងការកំណត់ប្រាក់ឈ្នួលអប្បបរមា យើងមិនមើលតែទៅលើកម្មករនិយោជិត ដែលនៅក្នុងទីផ្សារការងារស្រាប់ទេ យើងត្រូវគិតធ្វើយ៉ាងម៉េចឱ្យការកំណត់ប្រាក់ឈ្នួលអប្បបរមានេះ នៅមានភាពទាក់ទាញ ដើម្បីឱ្យមានការវិនិយោគបន្ថែម។ មានការវិនិយោគបន្ថែមប្រាកដជាមានការងារ មានការងារប្រាកដជាមានចំណូលបន្ថែម» ។
ជាមួយគ្នានេះផងដែរ តំណាងសហជីព លោក គឹម ចាន់សំណាង ប្រធានសភាសម្ព័ន្ធសហជីពជាតិកម្ពុជា (NACC) និងជាតំណាងភាគីកម្មករនិយោជិត បានឱ្យដឹងថា បងប្អូនសហជីពមានការគិតផ្សេងៗគ្នា មានការលើកឡើងខុសគ្នា អញ្ចឹងសម្រាប់សហជីពមកពីខាងខ្ញុំ បានលើកយកតួលេខចំនួនពីរ គឺ២២៥ដុល្លារអាម៉េរិក ហើយនិង ២៥០ដុល្លារអាម៉េរិក មានន័យថា ២២៥.៣ដុល្លារអាម៉េរិក និង ២៥០.៦ដុល្លារអាម៉េរិក ។ អញ្ចឹងមានន័យថា សម្រាប់ឆ្នាំនេះទោះបីជាយើងឃើញថា តួលេខពីរមែនក៏ដោយ ក៏ប៉ុន្តែសហជីពយើង នឹងព្យាយាមសម្របសម្រួល ដើម្បីពិនិត្យទៅលើតួលេខ ណាមួយផ្សេងទៀត សម្រាប់ពិភាក្សាគ្នាបន្តទៀត នៅថ្ងៃទី ១៨ ខែកញ្ញា រហូតនឹងអាចបញ្ចប់នៅថ្ងៃ៣០ ខែកញ្ញា ឆ្នាំ២០២៦នេះ» ។
គឹម ចាន់សំណាង បន្ថែមថា សម្រាប់ភាគីសហជីពក៏គិតថា នឹងព្យាយាម ដើម្បីសម្របសម្រួលគ្នា ដើម្បីបង្ហាញឱ្យឃើញថាសំឡេងសហជីពក៏មានមិនមែនអត់ទេ គឺយើងមានសម្រាប់ការសម្របសម្រួលឱ្យបងប្អូនយើង យល់ពីភាពជាក់ស្ដែងថាស្ថានភាពបច្ចុប្បន្ន ថាវាមានផលប៉ះពាល់អ្វីខ្លះ ។ គឺយើងនឹងព្យាយាមដើម្បីពិនិត្យទៅលើអ្វី ដែលជាការបង្ហាញរបស់លេខាធិការដ្ឋានប្រាក់ឈ្នួល ដែលបង្ហាញកាលពីថ្ងៃទី១ ហើយក៏ដូចជាព្រឹកមិញនេះ គឺលេខាធិការដ្ឋានក៏ព្យាយាមលើក ដើម្បីបង្ហាញបញ្ជាក់បន្ថែមពាក់ព័ន្ធទៅនឹងលក្ខណៈវិនិច្ឆ័យទាំង ៧ ដែលចំណុចនីមួយៗយើងឃើញថាវាមានការប្រែប្រួលខ្លះ ។ អញ្ចឹងភាគីសហជីព ក៏ដូចជាភាគីនិយោជកនឹងព្យាយាម ដើម្បីសម្របសម្រួលក្រុមរៀងៗខ្លួន ដើម្បីឱ្យឃើញថាលទ្ធផល នៃការទទួលបានថាតើនៅក្នុងកម្រិតណា ៕ អត្ថបទសហការ
ចែករំលែកព័តមាននេះ