ខណៈមេឃកំពុងភ្លៀង ស្រាប់តែទុស្សេឆាបឆេះខ្សែភ្លើងលើបង្គោលភ្លើង១ដើម ជិតវត្តសំបួរមាស
- ភ្នំពេញ
រាជធានីភ្នំពេញ ៖ ខណៈមេឃកំពុងធ្លាក់ភ្លៀងយ៉ាងខ្លាំង ស្រាប់តែទុស្សេឆាបឆេះខ្សែភ្លើងលើបង្គោលភ្លើងមួយដើម បង្កការភ្ញាក់ផ្អើលដល់ប្រជាពលរដ្ឋរាយការណ៍ជូនសមត្ថកិច្ចចេញរថយន្តពន្លត់អគ្គីភ័យអន្តរាគមន៍បាញ់ពន្លត់ ។
ហេតុការណ៍ខាងលើនេះ បានកើតឡើងនៅវេលាម៉ោង ១០និង៤០នាទីយប់ ថ្ងៃទី១០ ខែកញ្ញា ឆ្នាំ២០២៦ នៅចំណុចជិតវត្តសំបួរមាស ផ្លូវ ២១៧ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
ប្រភពព័ត៌មានពីប្រជាពលរដ្ឋបានអោយដឹងថា មុនពេលកើតហេតុ ខណៈមេឃកំពុងធ្លាក់ភ្លៀងខ្លាំង ក៍ស្រាប់តែបង្គោលភ្លើងមួយជាប់នឹងសំយាបផ្ទះប្រជាពលរដ្ឋ បានទុស្សេខ្សែភ្លើងបែកផ្កាភ្លើងព្រាកៗ និងបង្កជាអណ្ដាតភ្លើងឆេះសន្ធោសន្ធៅ ផ្អើលប្រជាពលរដ្ឋរស់ក្បែរនោះនាំគ្នាឆោឡោ យកបំពង់ពន្លត់អគ្គិភ័យទៅបាញ់អស់ជាច្រើនបំពង់ ទើបរាយការណ៍ជូនសមត្ថកិច្ចសុំជំនួយរថយន្តពន្លត់អគ្គិភ័យអោយមកជួយអន្តរាគមន៍ផងដែរ ។
ក្នុងករណីនេះដែរ បន្តិចក្រោយមក ក៍មានរថយន្តពន្លត់អគ្គីភ័យប្រចាំការនៅសាលាខណ្ឌដង្កោ បានចុះទៅជួយអន្តរាគមន៍បាញ់ទឹកអស់១រថយន្ត ទើបធ្វើអោយភ្លើងរលត់ទៅវិញ ។
ករណីនេះមិនមានការឆេះរាលដាលដល់ផ្ទះសម្បែងពលរដ្ឋណានោះទេ គ្រាន់តែខូចខាតខ្សែភ្លើង និងខ្សែអ៊ុបទិកអស់មួយចំនួន តែប៉ុណ្ណោះ ៕
ចែករំលែកព័តមាននេះ