រាជធានីភ្នំពេញ ៖ មេឃធ្លាក់ភ្លៀង១ធំ នារសៀលថ្ងៃទី១០ ខែកញ្ញា ឆ្នាំ២០២៦ បានធ្វើឲ្យទឹកជន់លិចប្រឡាយ និងផ្លូវជាតិលេខ៤ ចាប់ចំណុចខាងលិចស្ពានអាកាសចោមចៅ រហូតដល់ជិតផ្សារជម្ពូវ័ន ស្ថិតនៅភូមិព្រៃព្រីងខាងជើង២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ប៉ុន្តែអ្វីដែលជាការកត់សម្គាល់ គឺស្រាប់តែមានសំរាមចម្រុះគ្រប់ប្រភេទ បានអណ្ដែតនៅក្នុងប្រឡាយ និងលូអមផ្លូវជាតិលេខ៤នោះ យ៉ាងណែនណាន់តាន់តាប់ ខណៈពេលនោះ កម្លាំងរដ្ឋបាលសង្កាត់ចោមចៅទី៣ ក៏បានលាត់ជើងខោ មូរដៃអាវ ចេញទៅកាយស្រង់យកសំរាមទាំងនោះចេញពីប្រឡាយទាំងមេឃកំពុងភ្លៀងតែម្ដង ។
បញ្ហាដែលបានកើតឡើងខាងលើនេះ គឺដោយសារតែប្រជាពេលរដ្ឋមួយចំនួន នៅតែគ្មានការយល់ដឹង ឬមិនព្រមបោះបង់គំនិតរាយមាយរបស់ខ្លួនចេញ ពួកគាត់ទាំងមិនបានទុកដាក់សំរាមឲ្យបានត្រឹមត្រូវតាមការណែនាំរបស់អាជ្ញាធរនោះទេ ។ ផ្ទុយទៅវិញ ពួកគាត់បានបោះសំរាមចោលពាសវាលពាសកាល គ្មានសណ្ដាប់ធ្នាប់ ដែលបានធ្វើឲ្យក្រុមរថយន្តប្រមូលសំរាមមិនអាចប្រមូលយកចេញបាន លុះពេលមានភ្លៀងធ្លាក់សំរាមទាំងនោះ ក៏បានអណ្ដែតហូរចូលប្រឡាយ និងលូ បែបនេះ ។
ទោះបីជាកន្លងមកអាជ្ញាធរ ចាប់ពីថ្នាក់ក្រោមរហូតដល់លើ យកចិត្តទុកដាក់គិតគូកាយស្ដារប្រឡាយ ដើម្បីរំដោះទឹក និងគិតគូអំពីបញ្ហាសំរាមនេះជាចម្បង ដើម្បីសោភ័ណភាពរាជធានីភ្នំពេញទាំងមូល។ ជាពិសេសគិតគូពីអនាម័យ ដើម្បីសុខមាលភាពមនុស្សជាទូទៅយ៉ាងណាក៏ដោយ ប៉ុន្តែមិនបានឲ្យធ្វើឲ្យប្រឡាយ និងលូគ្មានសំរាមទទេស្អាតបាននោះឡើយ នៅក្នុងប្រឡាយ និងលូខាងលើ នៅតែពោរពេញទៅដោយសំរាម ។
មិនតែប៉ុណ្ណោះក៏មានប្រជាពលរដ្ឋខ្លះលួចបោះចោលសំរាមក្នុងប្រឡាយទឹកនោះតែម្ដង ជាហេតុធ្វើឲ្យប្រឡាយនិងលូរងការកកស្ទះទឹកមិនអាចហូរបានលឿន ឬមិនអាចហូររួចតែម្ដង ហើយក្រោយពេលរាំងភ្លៀងធ្វើឲ្យទឹកលិចផ្លូវយូរច្រើនម៉ោង ទើបស្រកទៅវិញ ។ ម្យ៉ាងទៀតផ្លូវនៅចំណុចជិតស្ពានអាកាសចោមចៅនោះឲ្យតែពេលមានភ្លៀងធ្លាក់ម្ដងៗ គឺទឹកជន់លិចដូចផ្លូវមួយចំនួនទៀតដែរ ប៉ុន្តែបើគ្មានសំរាមរាំងស្ទះទេ ឬក៏ពុំមានការស្ទះទឹកនៅតាមប្រឡាយ ឬលូនៅប៉ែកខាងក្រោមៗទៀតនោះទេ ។ ក្រោយពេលមេឃរាំងភ្លៀងនោះទឹកនិងឆាប់ស្រកទៅវិញ ប៉ុន្តែបើមានសំរាមណែនណាន់តាន់តាប់បែបនេះ ហើយបើគ្មានការកាយយកចេញទៀតនោះទឹកនិងមិនងាយស្រកទៅវិញឡើយ ដូច្នេះហើយទើបអាជ្ញាធរសង្កាត់ចោមចៅទី៣ចេញទៅស្រង់សំរាមចេញពីក្នុងប្រឡាយទាំងភ្លៀងបែបនេះ ។
គេនៅចាំបានថា នៅក្នុងរដូវវស្សាឆ្នាំ២០២៥កន្លងទៅ ដោយសារភ្លៀងធ្លាក់ខ្លាំងប៉ុន្មានថ្ងៃជាប់គ្នា ហើយប្រឡាយនិងលូនៅប៉ែកខាងក្រោមស្ទះ ទៀតនោះ បានធ្វើឲ្យផ្លូវនៅតំបន់ស្ពានអាកាសចោមចៅនេះលិចជាច្រើនថ្ងៃ ។ ពេលនោះបង្កការលំបាកក្នុងការធ្វើចរាចរយ៉ាងខ្លាំង រហូតដល់អាជ្ញាធរសង្កាត់ដាក់ម៉ាស៊ីនច្រើនគ្រឿងបូមទឹកចេញ ទើបទឹកស្រកនិងរីងអស់ពីផ្លូវទៅវិញ ។
ដោយឡែកកន្លងមកអាជ្ញាធរសង្កាត់ចោមចៅទី៣ តែងតែចុះកាយស្រង់យកសំរាមចេញពីប្រឡាយអមផ្លូវជាតិលេខ៤នោះជាញឹកញាប់រួចមកហើយ និងតែងបានណែនាំប្រជាពលរដ្ឋនៅក្នុងមូលដ្ឋានរបស់ខ្លួននោះឲ្យចូលរួមចំណែកទុកដាក់សំរាមឲ្យបានត្រឹមត្រូវផងដែរ ។ ប៉ុន្តែរហូតពេលនេះ នៅតែមានអ្នកចោលសំរាមគ្មានសណ្ដាប់ធ្នាប់ ដែលបានធ្វើឲ្យប្រឡាយអមផ្លូវជាតិលេខ៤ ត្រង់ចំណុចខាងលើនោះ នៅតែពោរពេញទៅដោយសំរាមដែល ៕
ចែករំលែកព័តមាននេះ