ADផ្ទាំងផ្សព្វផ្សាយពាណិជ្ជកម្ម

Picture

ឧទ្ទាមហ៊ូធីយេម៉ែនបើកការវាយប្រហារទ្រង់ទ្រាយធំលើទឹកដីអារ៉ាប៊ីសាអូឌីត និងសន្យាតបត​វិញ

2 ខែ មុន

ប្រទេស​យេ​ម៉ែ​ន ៖ អា​រ៉ា​ប៊ី​សា​អូឌីត​ កាលពី​ថ្ងៃ​ទី​៨​ កញ្ញា រង​ការ​វាយប្រហារ​មួយ​ចំនួន​របស់​ពួក​ឧទ្ទាម​ហ៊ូ​ធី​យេ​ម៉ែ​ន ហើយ​សន្យា​ពី​ការ​តបត​វិញ​ចំពោះ​ការ​វាយប្រហារ​របស់​ពួក​ឧទ្ទាម​ស្និទ្ធ​អ៉ី​រ៉​ង់​នោះ ប្រឆាំង​ដែនដី​ខ្លួន​ចាប់តាំងពី​ច្រើន​ឆ្នាំ​មក​ហើយ​។

រដ្ឋមន្ត្រី​ការ​បរទេស​អា​មេ​រិ​ក​លោក​ម៉ា​កូ​​រ៉ូ​ប៊ី​យ៉ូ លើក​ឡើង​ពី​ការ​លូកដៃ​របស់​អ៉ី​រ៉​ង់​នៅ​ពីក្រោយ​ការ​វាយប្រហារ​ទាំងនេះ​ ដែល​អ​.​ស​.​ប ​និង​សហភាព​អឺរ៉ុប​បាន​ថ្កោលទោស ដោយ​វាយតម្លៃ​ថា អាច​បំផ្លាញ​ដល់​សន្តិសុខ​និង​ស្ថេ​រ​ភាព​តំបន់​។ យេ​ម៉ែ​ន​ជា​ប្រទេស
​ក្រីក្រ​បំផុត​មួយ​នៅ​ឧបទ្វីប​អា​រ៉ាប់ បាន​ធ្លាក់​ចូល​ក្នុង​សង្គ្រាម​ជា​ថ្មី កាលពី​ខែកក្កដា​ ។

ការ​ប្រទូស្ត​រ៉ា​យ​គ្នា ​រវាង​ពួក​ឧទ្ទាម​ និង​កងទ័ព​រដ្ឋាភិបាល​មានការ​កើនឡើង​វិញ​រយៈពេល​ប៉ុន្មាន​ថ្ងៃ​ចុង​ក្រោយ​នេះ បណ្ដាល​ឲ្យ​មនុស្ស​ស្លាប់​ជាង​៥០០​នាក់​ ចាប់តាំងពី​ថ្ងៃ​ទី​៣​ កញ្ញា​ មក ​។ ការ​ប៉ះទង្គិច​គ្នា​នានា​នៅ​យេ​ម៉ែ​ន​រវាង​កងទ័ព​រដ្ឋាភិបាល​យេ​ម៉ែ​ន​ និង​ពួក​ឧទ្ទាម​ហ៊ូ​ធី​កាលពី​ថ្ងៃ​ទី​៥ ​កញ្ញា បណ្ដាល​ឲ្យ​មនុស្ស​ស្លាប់​ជាង​៦០​នាក់ ក្នុង​នោះ​មាន​បណ្ដាជន​ស៊ី​វិល​ ។

យោង​តាម​ប្រភព​យោធា​ថា ទាហាន​រដ្ឋាភិបាល​២៦​នាក់​បាន​ត្រូវ​ស្លាប់​ កាលពី​ថ្ងៃ​ទី​៥ ​កញ្ញា​ បន្ទាប់​ពី​ការ​ប្រយុទ្ធ​គ្នា​ច្រើន​ម៉ោង​នៅ​ភាគ​និរតី​ប្រទេស ចំណែក​ប្រភព​មន្ទីរពេទ្យ​និង​យោធា​របស់​ពួក​ហ៊ូ​ធី​វិញ រៀបរាប់​ពី​យុទ្ធ​ជន​ពួក​គេ​ស្លាប់​៣១​នាក់​ ។ ចំណែក​ប្រភព​មន្ទីរពេទ្យ​មួយ​នៅ​ទីក្រុង​TAEZ ត្រួតត្រា​ដោយ​រដ្ឋាភិបាល គូសបញ្ជាក់​ថា ការ​វាយប្រហារ​ដោយ​គ្រាប់​មី​ស៊ី​ល សម្លាប់​ជន​ស៊ី​​វិល​៦​នាក់​ដែល​កំពុង​ធ្វើ​ដំណើរ​តាម​រថយន្ត​បឺស​១​គ្រឿង ហើយ​មនុស្ស​៧​នាក់​ទៀត​រង​របួស​។

ទន្ទឹម​នឹង​ការ​វាយលុក​របស់​ពួក​គេ​នៅ​ក្នុង​ដែនដី​យេ​ម៉ែ​ន ពួក​ហ៊ូ​ធី​លើក​នេះ​បាន​វាយប្រហារ​ទ្រង់ទ្រាយ​ធំ ក្នុង​ដែនដី​អា​រ៉ា​ប៊ី​សា​អូឌីត ដែល​ដឹកនាំ​ក្រុមចម្រុះ​យោធា​ជួយ​ទ្រទ្រង់​ដល់​កងទ័ព​រដ្ឋាភិបាល​យេ​ម៉ែ​ន​ ។ ពួក​ហ៊ូ​ធី​បាន​វាយប្រហារ​ដោយ​ដ្រូ​ន​ច្រើន
​សឹ​ប​គ្រឿង​និង​បណ្ដា​មី​ស៊ី​​ល លើ​ភាគ​ខាងត្បូង​អា​រ៉ា​ប៊ី​សា​អូឌីត សំដៅ​បណ្ដា​ទីតាំង​របស់​ក្រុមហ៊ុន​ប្រេង​យក្ស​ARAMCO នៅ​ក្រុង​អាប់​ហា ក្រុង​ណាស់​រ៉ា​ន​និង​ក្រុងហ្ស៊ី​ហ្សា​ន ព្រមទាំង​មូលដ្ឋាន​អាកាសចរណ៍​KING KHALID នៅ​KHAMIS MUSAIT​ ។

ប្រតិបត្តិការ​នោះ​ធ្វើ​ឡើង ជា​ការ​តបត​ចំពោះ​ការ​វាយប្រហារ​១២១​លើក​របស់​អា​រ៉ា​ប៊ី​សា​អូឌីត​ នៅ​យេ​ម៉ែ​ន​រយៈពេល​៣​ថ្ងៃ​ចុង​ក្រោយ​នេះ​ ។ ទូរទស្សន៍​របស់​ពួក​ហ៊ូ​ធី​ក៏​រៀបរាប់​ដែរ ​ពី​ការ​វាយប្រហារ​ថ្មី​ៗ​នា​ថ្ងៃ​ទី​៨ ​កញ្ញា​ ។ ភាគ​ខាងត្បូង​អា​រ៉ា​ប៊ីសា​អូឌីត​ ជាប់​ព្រំដែន​យេ​ម៉ែ​ន​មាន​ហេដ្ឋារចនាសម្ព័ន្ធ​ប្រេងកាត​សំខាន់​ៗ​ពិសេស​នៅ​ហ្ស៊ឺ​​ហ្សា​ន ដែល​នៅ​ទីនោះ​ក្រុង​ហ៊ុន​ប្រេង​ARAMCO ធ្វើ​អាជីវកម្ម​លើ​រោងចក្រ​ចម្រាញ់​ប្រេងកាត​សំខាន់​បំផុត​មួយ​របស់​ប្រទេស ដែល​ទីតាំង​ប្រេង​នោះ​រង​ការ​វាយប្រហារ​ច្រើន​លើក​មក​ហើយ ចាប់តាំងពី​ខែកក្កដា​មក​ ។

តាម​ក្រុង​រី​យ៉ា​ត​ថា ការ​វាយប្រហារ​ទាំងនេះ​ បណ្ដាល​ឲ្យ​មាន​ភ្លើង​ឆាបឆេះ​ទីតាំង​ប្រេង​ជា​ច្រើន​កន្លែង និង​នាំ​ឲ្យ​មានការ​កាត់​ផ្ដាច់​ប​ណ្ណោះ​អាសន្ន​ប្រតិបត្តិការ​មួយ​ចំនួន​ ។ ពួក​ឧទ្ទាម​នោះ​ដណ្ដើម​ត្រួតត្រា បណ្ដា​តំបន់​យុទ្ធសាស្ត្រ​នៅ​ទី​ខ្ពស់​ៗ​ដែល​អាច​បង្កើត​ទីតាំង​ថ្មី​ៗ​ងាយស្រួល​វាយប្រហារ​នាវា​ដឹក​ប្រេង​អា​រ៉ា​ប៊ី​សា​អូឌីត​ ៕