សង្គ្រាមអ៉ីរ៉ង់ ៖ អាមេរិក កាលពីថ្ងៃទី៨ កញ្ញា បានវាយប្រហារនាវាដឹកប្រេងអ៉ីរ៉ង់ច្រើនគ្រឿង ជាការតបតចំពោះការប៉ុនប៉ងថ្មីៗ វាយប្រហារដោយគ្រាប់រ៉ុក្កែតប្រឆាំងនាវាចម្បាំងអាមេរិក ។ នេះបើតាមសេចក្ដីរាយការណ៍របស់អ្នកទទួលខុសត្រូវជាន់ខ្ពស់
អាមេរិកមួយរូប ។

ទូរទស្សន៍ជាតិអ៉ីរ៉ងក៏រាយការណ៍ផងដែរថា កងទ័ពអាមេរិកបានវាយប្រហារបណ្ដានាវាដឹកប្រេងអ៉ីរ៉ង់ នៅជិតកំពង់ផែភាគខាងត្បូងទីក្រុងJASK និងជិតកោះKHARG ក្នុងឈូងសមុទ្រពែរ្ស៍ ។ ការវាយប្រហារសងសឹកគ្នាចុងក្រោយនានាកើតឡើង ពេលក្រុងវ៉ាស៊ីនតោន និងក្រុងតេហេរ៉ង់ ងាកមករកជម្លោះជាថ្មីបន្ទាប់ពីសង្គ្រាមជាង៦ខែ។ ទូរទស្សន៍អ៉ីរ៉ង់គូសបញ្ជាក់ថា នៅទីក្រុងJASKនាវាដឹកប្រេងអ៉ីរ៉ង់១គ្រឿងរងការវាយប្រហារ នៅជិតឆ្នេរYEKBENI ចំណែកស្នូរផ្ទុះ១ទៀតលាន់ឮក្នុងតំបន់ ដែលគេមិនទាន់កំណត់ថាមកពីអ្វីនៅឡើយ ។

ទូរទស្សន៍នោះ បន្ទាប់មករាយការណ៍ថា កងទ័ពអាមេរិកបានវាយប្រហារនាវាដឹកប្រេងទី២ ក្នុងដែនទឹកក្រុងJASK ។ ក្រុមនាវិករបស់នាវាដឹកប្រេងទាំង២គ្រឿង ដែលរងការវាយប្រហារ កំពុងតែជម្លៀសចេញតាមកាណូតកៅស៊ូ មកកាន់ច្រាំងក្រុងនោះ។ បន្ទាប់មកទៀតទូរទស្សន៍នោះដដែលរៀបរាប់ពីនាវាដឹកប្រេងអ៉ីរ៉ង់១គ្រឿងទៀតរងការវាយប្រហារ ក្នុងតំបន់កោះKHARGដោយក្រោយការវាយប្រហារនេះ ក្រុមនាវិកនៃនាវានោះត្រូវបានជម្លៀសចេញមកកាន់ច្រាំងដោយសុខសប្បាយ ។
ចំណែកកងម៉ារីនរបស់កងកម្លាំងឆ្មាំបដិវត្តន៍អ៉ីរ៉ង់ បានព្រមានប្រាប់ដល់បណ្ដាក្រុមនាវិកនៃនាវាដឹកប្រេងទាំងឡាយ ដែលស្ថិតនៅក្បែរបណ្ដាកំពុងផែគុយវ៉ែត និងបារ៉ែន ឲ្យប្រញាប់ចាកចេញពីនាវាទាំងនោះ ដោយអះអាងថា នាវាទាំងនេះជាគោលដៅវាយប្រហារសងសឹក ចំពោះការវាយប្រហាររបស់អាមេរិក ប្រឆាំងបណ្ដានាវាដឹកប្រេងអ៉ីរ៉ង់។ កងកម្លាំងឆ្មាំបដិវត្តន៍អ៉ីរ៉ង់ចោទប្រកាន់គុយវ៉ែតនិងបារ៉ែនថា ទទួលកងទ័ពអាមេរិកនិងចូលរួមក្នុងការវាយប្រហារទាំងនេះ។

កងទ័ពអាមេរិកថ្លែងកាលពីថ្ងៃទី៥ កញ្ញា ថា បានវាយប្រហារនាវាដឹកប្រេងអ៉ីរ៉ង៣គ្រឿង បន្ទាប់ពីបណ្ដានាវាចម្បាំងអាមេរិក ជាគោលដៅវាយប្រហារដោយមីស៊ីលបាលីស្ទិក ហើយដោយព្រមានថា ខ្លួននឹងកម្ទេចបើចាំបាច់កងនាវាដឹកប្រេងអ៉ីរ៉ង់។ អ៉ីរ៉ង់បន្ទាប់មកគូសបញ្ជាក់ថា ខ្លួនគ្រោងប្រកាសពីតំបន់ហាមឃាត់ថ្មីនៅជិតច្រកសមុទ្រហ័រមូស សំដៅលើបណ្ដានាវាដែលមានចេតនាឆ្លងកាត់ ។
ការវិវឌ្ឃនាពេលថ្មីៗនេះ ក្នុងជម្លោះរវាងអាមេរិក និងអ៉ីរ៉ង់ ដែលចង់ត្រួតត្រាច្រកសមុទ្រហ័រមូស នាំឲ្យតម្លៃប្រេងឡើងខ្ពស់បំផុត ដែលក៏ចោទជាបញ្ហានយោបាយផងដែរចំពោះប្រធានាធិបតីអាមេរិកលោកដូណាល់ត្រាំ និងគណបក្សសាធារណរដ្ឋរបស់លោក ខណៈជិតដល់ការបោះឆ្នោតពាក់កណ្ដាលអាណត្តិនាខែវិច្ឆិកាខាងមុខនេះ។ តម្លៃប្រេងឆៅបានឡើងខ្ពស់យ៉ាងរហ័សដោយប្រេងBRENT មួយធុងពេលនេះឡើងដល់លើសពី១០០ដុល្លារជាថ្មី ៕

ចែករំលែកព័តមាននេះ