សមត្ថកិច្ចកា.ត់សោទ្វារចូលបង្ក្រា.បទីតាំងល្បែ.ងស៊ីស.ង នៅចោមចៅទី៣ រឹបអូសវត្ថុតាងជាច្រើន រីឯមនុស្សរត់គេ.ចអស់
- ភ្នំពេញ
រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌពោធិ៍សែនជ័យ និងកម្លាំងប៉ុស្តិ៍នគរបាលរដ្ឋបាលចោមចៅទី៣ បានចុះបង្ក្រាបទីតាំងល្បែងស៊ីសង មួយកន្លែង ដោយដកហូតបានវត្ថុតាងពីក្នុងទីតាំងនោះជាច្រើន ។ ប៉ុន្តែមិនបានឃាត់ខ្លួនមនុស្សទេ ដោយសារតែពេលកម្លាំងចុះទៅដល់ឃើញទីតាំងនោះបិទទ្វារចាក់សោជិតទៅហើយ ពុំមានមនុស្សស្ថិតនៅក្នុងនោះសូម្បីតែម្នាក់នោះឡើយ ។
ប្រតិបត្តិការខាងលើបានធ្វើឡើងកាលពីវេលាម៉ោង២និង៣០នាទីរសៀលថ្ងៃទី៨ ខែកញ្ញា ឆ្នាំ២០២៦ ដែលទីតាំងល្បែងស៊ីសងខាងលើគ្មានស្លាកយីហោ ស្ថិតនៅផ្ទះលេខ F4-F5 ផ្លូវF113 ក្រុមទី០១ ភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
នគរបាលបានប្រាប់ថា មុននឹងឈានដល់ការចុះបង្ក្រាបនេះ កម្លាំងចម្រុះខាងលើបានធ្វើការស្រាវជ្រាវ ហើយទទួលបានព័ត៌មានដ៏ជាក់លាក់ថា ទីតាំងមួយនេះមានបើកល្បែងស៊ីសង ដោយមានមនុស្សចូលទៅលេងរាល់ថ្ងៃ ។ ក្រោយពីកំណត់បានព័ត៌មានប្រាកដហើយនោះ ទើបនៅថ្ងៃទី៨ ខែកញ្ញា កម្លាំងគណៈបញ្ជាការឯកភាពខណ្ឌពោធិ៍សែនជ័យ និងកម្លាំងប៉ុស្តិ៍នគរបាលរដ្ឋបាលចោមចៅសហការគ្នាចុះទៅបង្ក្រាបតែម្ដង ។
នគរបាលបានប្រាប់ឲ្យដឹងបន្តថា ពេលទៅដល់ជាក់ស្ដែងឃើញទីតាំងមួយនេះបិទទ្វារជិត ហើយគ្មានមនុស្សសូម្បីតែម្នាក់ ទាំងអ្នកគ្រប់គ្រងទីតាំង បុគ្គលិកបម្រើការងារ និងអ្នកលែងល្បែងមិនមានឡើយ ដែលសង្ស័យថាពួកគេដឹងខ្លួនមុនពេលសមត្ថកិច្ចចុះបង្ក្រាប ទើបគេចខ្លួនបាត់អស់និងបិទទ្វារទីតាំងចោលបែបនេះ ។ ខណៈនោះកម្លាំងចម្រុះខាងលើក៏បានសម្រេចកាត់សោទ្វារទីតាំងនោះ រួចចូលទៅធ្វើការត្រួតពិនិត្យមើលនៅខាងក្នុង ហើយក៏បានឃើញវត្ថុតាងជាច្រើន ដែលបញ្ជាក់ថាទីតាំងមួយនេះពិតជាបានលួចលាក់លេងល្បែង ប្រាកដមែន ។
នគរបាលបានប្រាប់ឲ្យដឹងបន្ថែមទៀតថា បន្ទាប់មកកម្លាំងខាងលើបានរឹបអូសយកវត្ថុតាងទាំងនោះរួមមាន៖
តុសម្រាប់លេងបៀរចំនួន៩តុ, ទូហ្គេមបាញ់ត្រីចំនួន២គ្រឿង, ទូហ្គេមធម្មតាចំនួន៧គ្រឿង, ទូហ្គេមមុខ៨ចំនួន១គ្រឿង ។ កៅអីពូកមានកង់ចំនួន៤៧កៅអី,កៅអីក្រហម-ខ្មៅ ចំនួន៥៨កៅអី,ម៉ូនីទ័រកុំព្យូទ័រចំនួន ០៣គ្រឿង,កុំព្យូទ័រយួរដៃ (laptop) ០១គ្រឿង,ទូរដែក០១,ហាឌីសកាមេរ៉ា សុវត្ថិភាពចំនួន៥គ្រឿង,ម៉ាស៊ីនព្រីន ១គ្រឿង ។
ក្រោយពីការរឹបអូសវត្ថុតាងទាំងអស់ខាងលើនោះ ត្រូវបាននាំយកទៅរក្សាទុកនៅសាលាខណ្ឌពោធិ៍សែនជ័យ ដើម្បីធ្វើការកសាងសំណុំរឿង ព្រមទាំងស្រាវជ្រាវរកម្ចាស់ទីតាំងល្បែងមួយនេះ ដើម្បីឃាត់ខ្លួនចាត់ការតាមនីតិវិធី ៕
ចែករំលែកព័តមាននេះ