ចុះបង្ក្រាបភ្លាមៗក្រុមជិះបង្ហោះម៉ូតូ ក្រោយទទួលបានសេចក្តីរាយការណ៍ពីប្រជាពលរដ្ឋ
- បន្ទាយមានជ័យ
ខេត្តស្វាយរៀង ៖ អនុវត្តតាមការចង្អុលណែនាំរបស់លោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀង នៅថ្ងៃទី៧ ខែកញ្ញា ឆ្នាំ២០២៦ វេលាម៉ោង៥និង២០នាទីល្ងាច សមត្ថកិច្ចបានទទួលព័ត៌មានតាមរយៈគណនីហ្វេសបុកឈ្មោះ សឹង សុជាតិ ដែលបានផុសវីដេអូក្មេងបង្ហោះម៉ូតូ អមដោយការសរសេរខ្លឹមសារថា «ក្រុងស្វាយរៀង 7-9-26 ផ្លូវបេតុង ភូមិរោងបន្លែ សង្កាត់ស្វាយរៀង ក្រុងស្វាយរៀង ក្រុមក្មេងទំនើងបង្ហោះម៉ូតូផ្លូវបេតុង (ទល់មុខផ្ទះលក់គ្រឿងសំណង់50ម៉ែត្រ) ជាសំណូមពរប្រជាពលរដ្ឋសូមជួយទប់ស្កាត់រាល់បទល្មើសជាយថាហេតុ…» ។
ក្រោយពីទទួលបានព័ត៌មាននេះភ្លាម លោកវរសេនីយ៍ឯក សោម សុភ័ណ្ឌ អធិការនគរបាលក្រុងស្វាយរៀង បានដឹកនាំកម្លាំង នៃអធិការដ្ឋាននគរបាលក្រុង ចុះទៅដល់ទីតាំងកើតហេតុខាងលើ និងបាននាំក្មេងទំនើង០២នាក់គឺ ៖ ១-ឈ្មោះ ស៊ឹម ឆៃយ៉ា ភេទប្រុស អាយុ១៥ឆ្នាំ មុខរបរមិនពិតប្រាកដ មានទីលំនៅភូមិតាស្អាង ឃុំកំពង់ចំឡង ស្រុកស្វាយជ្រំ ខេត្តស្វាយរៀង (ជាអ្នកបង្ហោះម៉ូតូ) ២-ឈ្មោះ ជូ ដេវីន (ហៅញ៉ាញ់) ភេទប្រុស អាយុ១៦ឆ្នាំ មុខរបរមិនពិតប្រាកដ មានទីលំនៅភូមិអណ្តូងតាសី សង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង (ជាអ្នកជិះពីក្រោយ) រួមនឹងម៉ូតូមួយគ្រឿង ម៉ាក SUZUKI NEX ពណ៌សលាយខៀវ ស៊េរីឆ្នាំ២០១២១ ពាក់ផ្លាកលេខ ភ្នំពេញ 1KH-2081 យកមកអធិការដ្ឋាននគរបាលក្រុងស្វាយរៀង ដើម្បីធ្វើការសាកសួរ និងឆ្លើយបំភ្លឺជូនសមត្ថកិច្ចថា ពួកខ្លួនពិតជាបាននាំគ្នាបង្ហោះម៉ូតូ នៅត្រង់ចំណុចផ្លូវបេតុង ស្ថិតក្នុងភូមិរោងបន្លែ សង្កាត់ស្វាយរៀង ក្រុងស្វាយរៀង ខេត្តស្វាយរៀង ប្រាកដមែន។
បន្ទាប់ពីស្តាប់ការបំភ្លឺពីឈ្មោះ ស៊ឹម ឆៃយ៉ា និងឈ្មោះ ជូ ដេវីន (ហៅញ៉ាញ់) រួចមក ដោយមានការឯកភាពពីលោកឧត្តមសេនីយ៍ទោ ស្នងការ និងឯកឧត្តមព្រះរាជអាជ្ញាអមសាលាដំបូងខេត្តស្វាយរៀង សមត្ថកិច្ចបានធ្វើកិច្ចសន្យាអប់រំណែនាំ អោយឈប់ជិះបង្ហោះម៉ូតូ និងធ្វើសកម្មភាពនានា ដែលប៉ះពាល់ដល់សន្តិសុខសណ្តាប់ធ្នាប់សង្គម និងបានអោយអាណាព្យាបាលមកធ្វើការធានា យកទៅអប់រំណែនាំនៅផ្ទះបន្ថែម។
បច្ចុប្បន្ន ម៉ូតូរក្សាទុកនៅអធិការដ្ឋាននគរបាលរដ្ឋបាលក្រុងស្វាយរៀង រយៈពេល៣ខែ៕
ចែករំលែកព័តមាននេះ