ខេត្តកំពត ៖ ស្នងការនគរបាលខេត្តកំពត បញ្ជាក់លទ្ធផលស្រាវជ្រាវគ្រោះថ្នាក់ចរាចរណ៍នៅស្រុកឈូក រថយន្ត Prius ជាអ្នកបង្កហេតុ និងត្រៀមអនុវត្តវិន័យលើមន្ត្រីដែលរាយការណ៍មិនប្រក្រតី ។
ជាក់ស្តែងបើយោងតាមផេកឧ.ទោ ម៉ៅ ចន្ទ័មធុរិទ្ធ ស្នងការនគរបាលខេត្តកំពត បានប្រកាសនាល្ងាចថ្ងៃទី៧ ខែកញ្ញានេះថា ៖ សូមជម្រាបជូនសាធារណៈជន ជាពិសេសក្រុមគ្រួសារភាគីអ្នកបើកម៉ូតូ អោយបានជ្រាបអំពីគ្រោះថ្នាក់ចរាចរណ៌រវាងម៉ូតូ និងរថយន្តព្រូស នៅស្រុកឈូក ។
យោងតាមកំណត់ហេតុស្រាវជ្រាវ និងវាស់វែងនៅកន្លែងកើតហេតុ របស់ក្រុមការងារដែលខ្ញុំបានអោយចុះស្រាវជ្រាវ នៅរសៀលថ្ងៃទី៧ ខែកញ្ញា ឆ្នាំ២០២៦ ដែលដឹកនាំដោយលោកវរៈសេនីយ៌ឯក លុយ ហុងឡន ស្នងការរងទទួលផែនចរាចរណ៌ បានពិនិត្យឃើញថា ករណីនេះពិតជាបានបង្កដោយរថយន្តពិតប្រាកដមែន ដោយរថយន្តបានបើកចូលគំនូសផ្លូវម្ខាងទៀតរបស់ម៉ូតូចំនួនពីរតឹកកន្លះពីកន្លងផ្លូវរបស់រថយន្ត ។
ហើយចំពោះករណីនេះ សមត្ថកិច្ចយើងក៏បានយកអ្នកបើករថយន្តបង្ក ដើម្បីបន្តនិតិវិធីទៅតុលាការនៅស្នងការដ្ឋាននគរបាលខេត្តកំពត ។
ដោយឡែក ភាគីអ្នកបើកម៉ូតូ ពិតជាមានប៊ីយ៉ែរមួយចំនួន ជាប់ខ្លួនពិតប្រាកដមែន ។ ចំពោះលោកអធិការនគរបាលស្រុកឈូក និងអធិការរងទទួលការងារចរាចរណ៌នឹងត្រូវស្រាវជ្រាវបន្ថែមពាក់ព័ន្ធភាពមិនប្រក្រតីខ្ជីខ្ជាក្នុងការរាយការណ៍មិនយកចិត្តទុកដាក់ ចំពោះករណីគ្រោះថ្នាក់ខាងលើនេះ ប្រសិនបើរកឃើញមានកំហុសនោះ ស្នងការដ្ឋាននគរបាលខេត្តកំពត និងអនុវត្តវិន័យ 873 របស់កងកម្លាំងនគរបាលជាតិដោយគ្មានការលើកលែងជាដាច់ខាត ៕
ចែករំលែកព័តមាននេះ