ដោះស្រាយបញ្ចប់ហើយ! ករណីយុវសិស្ស៧នាក់មកពីខេត្តចា.ញ់បោ.កម្ចាស់ផ្ទះជួល
- ភ្នំពេញ
រាជធានីភ្នំពេញ ៖ យុវសិស្សប្រុសស្រី៧នាក់ ទើបប្រឡងជាប់បាក់ឌុបថ្មីៗ បានឡើងមកពីខេត្តកោះកុង ដើម្បីបន្តការសិក្សា និងរកការងារធ្វើនៅរាជធានីភ្នំពេញ ក៏បានបបួលគ្នាមកជួលបន្ទប់ស្នាក់នៅដែលនៅជិតក្រុង ។ពេលពួកគេមករក ស្រាប់តែផ្ទះជួលនេះនៅដាច់ស្រយាល ហើយក៏បានទារលុយថ្លៃកក់ និងថ្លៃជួលចំនួន៣៦០ដុល្លារវិញ តែម្ចាស់ផ្ទះជួលមិនព្រមឱ្យ ទើបផ្អើលដល់អាជ្ញាធរមូលដ្ឋានចុះទៅជួយអន្តរាគមន៍សម្របសម្រួល កាលពីរសៀលថ្ងៃទី៦ ខែកញ្ញា ឆ្នាំ២០២៦ នៅចំណុចបន្ទប់ជួលមួយកន្លែង ក្នុងភូមិសេះស សង្កាត់ឃ្មួញ ខណ្ឌសែនសុខ រាជធានីភ្នំពេញ ។
យោងតាមប្រភពព័ត៌មានបានឱ្យដឹងថា យុវសិស្សទាំងប្រុសទាំងស្រីចំនួន៧នាក់ ទើបប្រឡងបាក់ឌុបជាប់បានចេញដំណើរមកពីខេត្តកោះកុង ត្រូវមករៀនបន្តនៅភ្នំពេញ ខ្លះនៅសាកលវិទ្យាល័យភូមិន្ទភ្នំពេញ ខ្លះសាកលវិទ្យាល័យភូមិន្ទកសិកម្មចំការដូងជាដើម ។ ចំពោះការជួលផ្ទះស្នាក់នៅនេះដោយសារពួកគាត់បានឃើញការបង្ហោះតាមអនឡាញ រឿងបន្ទប់ជួលនៅម្តុំខាងលើ ពួកគាត់បានទាក់ទងម្ចាស់ផ្ទះសួរនាំថាបន្ទប់ជួលនៅជិតផ្លូវធំ ស្រួលចេញ-ចូលឬទេ ? គេថាស្រួលចេញចូលនៅជាប់ផ្លូវធំ ហើយតម្រូវឱ្យពួកគាត់កក់លុយមុនចំនួន១០០ដុល្លារ ។ ពេលនោះពួកគាត់ក៏ព្រមកក់តាមផងដែរ ។
លុះពេលកក់លុយហើយ ពួកគាត់ធ្វើដំណើរមកពីស្រុកកំណើត ម្ចាស់ផ្ទះបានដាក់ location ខុសពីទីតាំងដាក់ឱ្យដំបូងក្នុងការបង្ហោះតាមអនឡាញ ។ លុះពួកគាត់ធ្វើដំណើរមកដល់ខាងមុខបន្ទប់ជួលបានទាក់ទងទៅម្ចាស់ផ្ទះ ដើម្បីសុំមើលបន្ទប់ តែត្រូវម្ចាស់ផ្ទះឱ្យបង់លុយ២៦០ដុល្លារថែមទៀត ទើបឱ្យសោចូលមើលបន្ទប់ ។
ពេលនោះពួកគេ ក៏ព្រមបាញ់លុយឱ្យគ្រប់ចំនួន៣៦០ដុល្លារ ចំនួន៣បន្ទប់ ប៉ុន្តែពេលបាញ់លុយហើយ ពួកគាត់ឃើញថា បន្ទប់ជួលស្អាត តែអ្វីដែលសំខាន់ គឺទីតាំងផ្លូវចូលទៅឆ្ងាយហើយផ្លូវស្ងាត់ទៀត ។ ពួកគាត់បារម្ភពីសុវត្ថិភាព ក្នុងការធ្វើដំណើរពេលយប់ ព្រោះពួកគាត់ត្រូវរៀនផងនិងធ្វើការផង ។ ម្យ៉ាងទៀតនៅឆ្ងាយពីសាលារៀនទៀត ទើបពួកគេសុំយកលុយ២៦០ដុល្លារវិញ ហើយលុយកក់ដំបូង១០០ដុល្លារ គឺពួកគេទុកឱ្យម្ចាស់ផ្ទះទៅចុះ ។ តែពេលនោះ ម្ចាស់ផ្ទះមិនព្រមឱ្យវិញនោះទេ ថែមទាំងប្រើពាក្យជំរុញឱ្យពួកគេទៅប្តឹងដល់ណាក៏ប្តឹងទៅ ទោះបីជាពេលនោះពួកគេទៅប្តឹងឲ្យមេភូមិជួយអន្តរាគមន៍ក៏មិនបានលទ្ធផលដែរ ធ្វើឲ្យពួកគេបង្ខំចិត្តថតបង្ហោះហ្វេសប៊ុកឲ្យមជ្ឈដ្ឋាននានាបានជួយដល់ពួកគេផង ។
បន្ទាប់ពីបង្ហោះហ្វេសបុកផ្អើលដល់សមត្ថកិច្ច អាជ្ញាធរមូលដ្ឋាន និងអភិបាលរងខណ្ឌសែនសុខម្នាក់ បានចុះទៅជួយអន្តរាគមន៍សម្របសម្រួលទាំងយប់ ដោយខាងអាជ្ញាធរជួយចេញលុយដែលបង់ថ្លៃបន្ទប់ជំនួសឱ្យទៅខាងប្អូនៗជាសិស្ស និស្សិតចំនួន៣៦០ដុល្លារ ដើម្បីឱ្យប្អូនទៅរកកន្លែងស្នាក់នៅជិតសាលារៀននិងកន្លែងធ្វើការរបស់ប្អូនៗ ។ ចំណែកម្ចាស់ផ្ទះវិញ ពេលអាជ្ញាធរចុះទៅសួរនាំ បែរជាគេចវេសថារវល់ទៅតាមខេត្តទៅវិញ ។
អាជ្ញាធរបានបញ្ជាក់ថា ករណីខាងលើនេះ បើសិនជាម្ចាស់ផ្ទះមិនព្រមប្រគល់លុយជូនប្អូនៗយុវសិស្សវិញទេ អាជ្ញាធរនិងសមត្ថកិច្ចនិងមានវិធានការច្បាប់ជាមិនខាន ។
នាំខ្លួនម្ចាស់ផ្ទះជួលទៅសាកសួរបន្ទាប់ពីប្រើល្បិចបោកប្រាស់ម្ចាស់ផ្ទះជួលដែលបានប្រើល្បិចបោកប្រាស់ជួលផ្ទះឱ្យសិស្សសាលា ដែលទើបតែប្រឡងជាប់ថ្មីៗមករៀននៅភ្នំពេញ ហើយយកពួកគេទៅឲ្យស្នាក់នៅផ្ទះដាច់ស្រយាលបានបង្កឲ្យមានបាតុភាព និងបង្ហោះនៅក្នុងបណ្ដាញសង្គម ត្រូវបានសមត្ថកិច្ចនាំខ្លួនទៅសាកសួរនៅព្រឹកថ្ងៃទី៧ ខែកញ្ញា ឆ្នាំ២០២៦នេះ ។ ដោយឡែក យុវសិស្ស៧នាក់ ក្នុងនោះប្រុស៣ (ស្រី៤នាក់) ត្រូវបានលោក ចេង មុនីរ៉ា អភិបាលខណ្ឌសែនសុខនាំទៅជួលផ្ទះឲ្យស្នាក់នៅរយៈពេល១ឆ្នាំផងដែរ ។
ស្ត្រីជាម្ចាស់ផ្ទះដែលនាំខ្លួនទៅសាកសួរឈ្មោះ សុខ គឹមលាង អាយុ៤៦ឆ្នាំ មានទីលំនៅភូមិសែនសុខទី៧ សង្កាត់ឃ្មួញ ខណ្ឌសែនសុខ ។
នៅព្រឹកនោះស្ត្រីជាម្ចាស់ផ្ទះហាក់ដូចជាពុំទទួលស្គាល់នូវកំហុសនោះទេ ថែមទាំងខឹងសម្បាលើយុវសិស្សដែលថតបង្ហោះទៀត ។ បន្ទាប់ពីសម្របសម្រួលមិនត្រូវគ្នា ស្ត្រីជាម្ចាស់ផ្ទះត្រូវបានសមត្ថកិច្ចនាំខ្លួនទៅសាកសួរបន្តនៅអធិការដ្ឋានខណ្ឌសែនសុខ ។
ដោយឡែកយុវសិស្សដោយមានការអាណិតអាសូរ លោកអភិបាលខណ្ឌចាត់ចែងរកជួលផ្ទះ និងចេញលុយឱ្យស្នាក់នៅរយៈពេលមួយឆ្នាំ ។ ទោះបីជាយ៉ាងណា គេពុំទាន់ដឹងថាស្ត្រីជាម្ចាស់ផ្ទះជាប់ចោទបោកប្រាស់នោះត្រូវបានសមត្ថកិច្ចចាត់ការតាមច្បាប់ឬយ៉ាងណានោះនៅឡើយទេ ។
តាមព័ត៌មានចុងក្រោយឱ្យដឹងថា ក្រោយនាំទៅកាន់អធិការដ្ឋាន ម្ចាស់ផ្ទះជួលរូបនេះបានធ្វើកិច្ចសន្យាបញ្ចប់ ដោយខាងម្ចាស់ផ្ទះជួលទទួលស្គាល់កំហុសនិងព្រមឱ្យលុយទៅយុវសិស្សវិញ ។ ដោយឡែកយុវសិស្ស លោក ចេង មុនីរ៉ា អភិបាលខណ្ឌបានជួលបន្ទប់ឱ្យពួកគេស្នាក់នៅ១ឆ្នាំផងដែរនៅជិតសាលា ៕
ចែករំលែកព័តមាននេះ