ទុស្សេខ្សែភ្លើង បង្កជាអគ្គិភ័យឆាបឆេះផ្ទះឈើ ១ខ្នងអស់ទាំងស្រុង នៅខណ្ឌច្បារអំពៅ
- ភ្នំពេញ
រាជធានីភ្នំពេញ ៖ អគ្គិភ័យមួយបានកើតឡើង បណ្តាលឱ្យឆាបឆេះផ្ទះប្រជាពលរដ្ឋ ១ខ្នងអស់ទាំងស្រុង រួមទាំងសម្ភារប្រើប្រាស់ជាច្រើន ដោយសារតែការឆ្លងចរន្តអគ្គិសនី។
ហេតុការណ៍នេះ បានកើតឡើងកាលពីវេលាម៉ោង ១ រសៀល ថ្ងៃទី៥ ខែកញ្ញា ឆ្នាំ២០២៦ ស្ថិតនៅចំណុចភូមិអូរអណ្តូងទី១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ។
តាមប្រភពព័ត៌មានពីប្រជាពលរដ្ឋនៅជិតខាង បានឱ្យដឹងថា មុនពេលកើតហេតុ គេបានឃើញផ្សែងហ៊ុយយ៉ាងខ្លាំងចេញពីជាន់លើរបស់ផ្ទះកើតហេតុ។ អ្នកជិតខាងបានប្រញាប់ប្រញាល់នាំគ្នាយកបំពង់ពន្លត់អគ្គិភ័យ និងទុយោទឹកមកជួយបាញ់ពន្លត់ដែរ ប៉ុន្តែដោយសារអណ្ដាតភ្លើងឆាបឆេះខ្លាំងពេកមិនអាចគ្រប់គ្រងបាន ទើបរាយការណ៍ជូនសមត្ថកិច្ច ដើម្បីស្នើសុំរថយន្តពន្លត់អគ្គិភ័យមកជួយអន្តរាគមន៍ជាបន្ទាន់ ។
ភ្លាមៗនោះ កម្លាំងសមត្ថកិច្ចជំនាញនៃការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ សហការជាមួយអាជ្ញាធរពាក់ព័ន្ធ បានចេញរថយន្តពន្លត់អគ្គិភ័យចំនួន ១០គ្រឿង (រួមមាន៖ រថយន្តពន្លត់អគ្គិភ័យរបស់ស្នងការដ្ឋានរាជធានី, រថយន្តពន្លត់អគ្គិភ័យរបស់ក្រសួងមហាផ្ទៃ, រថយន្តពន្លត់អគ្គិភ័យរបស់ក្រុមហ៊ុនស្រាបៀរ និងរថយន្តពន្លត់អគ្គិភ័យរបស់កោះនរា) ចុះទៅដល់ទីតាំងកើតហេតុ និងបាញ់ពន្លត់រហូតរលត់ជាស្ថាពរ ។
គ្រោះអគ្គិភ័យនេះ បានបង្កការខូចខាតផ្ទះឈើលើថ្មក្រោមចំនួន ១ខ្នង និងសម្ភារប្រើប្រាស់មួយចំនួនធំ ប៉ុន្តែសំណាងល្អមិនបណ្តាលឱ្យមានមនុស្សណាម្នាក់រងរបួស ឬបាត់បង់ជីវិតឡើយ។ ចំពោះមូលហេតុ សមត្ថកិច្ចជំនាញបានសន្និដ្ឋានថា បណ្តាលមកពីការឆ្លងចរន្តអគ្គិសនី (ទុស្សេខ្សែភ្លើង)៕
ចែករំលែកព័តមាននេះ