សកម្មភាពថែទាំសួន បែងចែកទ្រូងផ្លូវលើកំណាត់ផ្លូវជាតិលេខ៥ក្នុងខេត្តកំពង់ឆ្នាំង ដើម្បីលើកកម្ពស់សោភ័ណភាព និងកាត់បន្ថយគ្រោះថ្នាក់
- កំពង់ឆ្នាំង
ខេត្តកំពង់ឆ្នាំង ៖ ដើម្បីចូលរួមចំណែកលើកកម្ពស់សោភ័ណភាពដងផ្លូវ និងធានាសុវត្ថិភាពក្នុងការធ្វើដំណើរជូនប្រជាពលរដ្ឋ មន្ត្រីជំនាញនៃមន្ទីរសាធារណការ និងដឹកជញ្ជូនខេត្តកំពង់ឆ្នាំង បាននិងកំពុងបន្តអនុវត្តសកម្មភាពការងារថែទាំជាប្រចាំ លើសួនបែងចែកទ្រូងផ្លូវ តាមបណ្តោយកំណាត់ផ្លូវជាតិលេខ៥យ៉ាងសកម្ម និងយកចិត្តទុកដាក់ខ្ពស់ ។
លោក ឆាយ លាភា ប្រធានមន្ទីរសាធារណការខេត្តកំពង់ឆ្នាំងឱ្យដឹងថា សកម្មភាពថែទាំជាប្រចាំនេះ រួមមាន៖ សម្អាត និងកាត់ស្មៅ កាត់រុក្ខជាតិក្រាស់ៗ ដែលលូតលាស់ខ្ពស់ ដើម្បីកាត់បន្ថយការបាំងរបស់អ្នកបើកបរ ។ ការថែទាំរុក្ខជាតិ ដោយស្រោចទឹក និងថែទាំដើមស្មៅ ដើមត្របែកព្រៃ និងដើមចំប៉ី ដែលបានដាំលើសួនបែងចែកទ្រូងផ្លូវ ឱ្យមានលូតលាស់ល្អ និងមានពណ៌បៃតងស្រស់ស្អាតគ្រប់រដូវកាល ។
ប្រតិបត្តិការនេះ ត្រូវបានអនុវត្តគ្របដណ្តប់លើកំណាត់ផ្លូវជាតិលេខ៥ ក្នុងភូមិសាស្ត្រខេត្តកំពង់ឆ្នាំង ដោយចាប់ផ្តើមចាប់ពីព្រំប្រទល់រវាងខេត្តកំពង់ស្ពឺ និងខេត្តកំពង់ឆ្នាំង រហូតដល់ព្រំប្រទល់រវាងខេត្តកំពង់ឆ្នាំង និងខេត្តពោធិ៍សាត់។
ការងារថែទាំលម្អដងផ្លូវនេះ បានធ្វើឡើងជាប្រចាំ ដើម្បីឱ្យផ្លូវជាតិលេខ៥ មានរៀបរយ និងមានសោភ័ណភាពទាក់ទាញ ថែមទាំងចូលរួមចំណែកយ៉ាងសំខាន់ក្នុងការកាត់បន្ថយគ្រោះថ្នាក់ចរាចរណ៍ និងផ្តល់នូវអារម្មណ៍ស្រស់ស្រាយ ដល់បងប្អូនប្រជាពលរដ្ឋ ក៏ដូចជាភ្ញៀវទេសចរដែលធ្វើដំណើរឆ្លងកាត់ខេត្តកំពង់ឆ្នាំងផងដែរ ៕
ចែករំលែកព័តមាននេះ