សោកស្តាយ! ជំងឺបេះដូង ឆ.ក់យកជីវិ.តយុវជនបង់ក្លាដែសម្នាក់ ត្រឹមមួយប៉ព្រិចភ្នែក
- ភ្នំពេញ
រាជធានីភ្នំពេញ ៖ យុវជនជាជនជាតិបង់ក្លាដែសម្នាក់ មានជំងឺបេះដូងព្យាបាលមិនជា ហើយខណៈកំពុងស្ថិតនៅក្នុងបន្ទប់ជួលមួយកន្លែងសុខៗ ស្រាប់តែមានអាការៈក្អួតចង្អោរយ៉ាងខ្លាំង បន្ទាប់មកក៏ដួលប្រកាច់បែកពពុះមាត់ និងសន្លប់បាត់ស្មារតី ។ ភ្លាមៗនោះ មិត្តភក្ដិដែលជាជនជាតិបង់ក្លាដែសដូចគ្នា ក៏បានហៅម៉ូតូកង់បីដឹកយកទៅសង្គ្រោះបន្ទាន់ ប៉ុន្តែពេលទៅដល់មន្ទីរពេទ្យ គ្រូពេទ្យបានពិនិត្យរួចប្រាប់ទៅមិត្តភក្ដិនោះថា យុវជនខាងលើស្លាប់បាត់ហើយ ។
ហេតុការណ៍ខាងលើនោះបានកើតឡើងបង្កឲ្យមានការភ្ញាក់ផ្អើលកាលពីវេលាម៉ោង៨និង១០នាទី ព្រឹកថ្ងៃទី៤ ខែកញ្ញា ឆ្នាំ២០២៦ នៅចំណុចបន្ទប់ជួលជាន់ទី១ ស្ថិតនៅក្នុងភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
យុវជនរូបនោះឈ្មោះMD RUBEL MIA អាយុ២០ឆ្នាំ ជនជាតិបង់ក្លាដែស ស្នាក់នៅបន្ទប់ជួលកើតហេតុខាងលើ ហើយយុវជននេះមានជំងឺបេះដូងយូរមកហើយ ព្យាបាលអត់ជាសោះ ។ នេះបើតាមការប្រាប់ឲ្យដឹងពីយុវជនម្នាក់ដែលជាមិត្តភក្ដិរបស់ជនរងគ្រោះ ។
សមត្ថកិច្ចបានឱ្យដឹងថា នៅវេលាព្រឹកថ្ងៃកើតហេតុ ខណៈកំពុងស្ថិតនៅក្នុងបន្ទប់ជួលសុខៗ ស្រាប់តែយុវជនខាងលើមានអាការៈក្អួតចង្អោរខ្លាំង រួចក៏បានដួលប្រកាច់បែកពពុះមាត់ និងសន្លប់បាត់មាត់ឈឹង ហើយខ្លួនប្រាណទន់ត្រជាក់ភ្លាមៗតែម្តង ។ បន្ទាប់ពីបានឃើញស្ថានភាពអាក្រក់បែបនេះ មិត្តភក្ដិ បានហៅម៉ូតូកង់បី១គ្រឿងដឹកយកយុវជននោះទៅសង្គ្រោះបន្ទាន់នៅមន្ទីរពេទ្យបង្អែកពោធិ៍ចិនតុង ប៉ុន្តែពេលទៅដល់ ក្រុមគ្រូពេទ្យពិនិត្យឃើញថា យុវជននេះស្លាប់បាត់ទៅហើយ ។
សមត្ថកិច្ចដដែលបានប្រាប់ឲ្យដឹងបន្តទៀតថា ក្រោយពេលក្រុមគ្រូពេទ្យប្រាប់បែបនេះ មិត្តភក្ដិដែលជូនទៅនោះបានដឹកសពយកទៅតម្កល់ទុកនៅវត្តជម្ពូវ័ន រួចរាយការណ៍ជូននគរបាលបានដឹង និងចុះទៅធ្វើការពិនិត្យតែម្ដង ។ ដោយឡែកកម្លាំងប៉ុស្តិ៍នគរបាលរដ្ឋបាលចោមចៅទី៣ និងនគរបាលខណ្ឌពោធិ៍សែនជ័យ បានចុះទៅពិនិត្យកន្លែងកើតហេតុនិងចំណុចផ្សេងៗនៅជុំវិញកន្លែងកើតហេតុភ្លាមៗផងដែរ ។
សមត្ថកិច្ចបានបញ្ជាក់បន្ថែមថា បន្ទាប់មកទៀតនគរបាលខាងលើ ក៏បានរាយការណ៍បន្តទៅកាន់នគរបាលការិយាល័យបច្ចេកទេស និងវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញ ។ ដើម្បីដាក់កម្លាំងចុះទៅធ្វើការពិនិត្យកោសល្យវិច័យ ហើយនគរបាលបានរកឃើញថា យុវជនម្នាក់នោះបានស្លាប់ដោយជំងឺគាំងបេះដូង ៕
ចែករំលែកព័តមាននេះ