រាជធានីភ្នំពេញ ៖ សូមកោតសរសើរស្មារតីតស៊ូសិស្សនៅខេត្តជាប់ព្រំដែន ទោះឆ្លងកាត់សង្គ្រាម ប៉ុន្តែអត្រាប្រឡងជាប់បាក់ឌុបមិនចាញ់ខេត្តដទៃ ។ នេះបើយោងតាមផេកក្រសួងអប់រំ យុវជន និងកីឡា បានប្រកាសនាយប់ថ្ងៃទី០២ ខែកញ្ញា ឆ្នាំ២០២៦នេះ ។
ការតស៊ូ ការលះបង់ និងការតាំងចិត្តដ៏មោះមុត ទីបំផុតបានបង្កើតជាលទ្ធផលប្រកបដោយមោទនភាពជាតិ ។ ស្មារតីតស៊ូព្យាយាមរបស់ប្អូនៗសិស្សានុសិស្សនៅបណ្តាខេត្តជាប់ព្រំដែន ដែលបានខិតខំក្រេបយកចំណេះដឹង រហូតទទួលបានអត្រាប្រឡងជាប់សញ្ញាបត្រមធ្យមសិក្សាទុតិយភូមិ (បាក់ឌុប) យ៉ាងខ្ពស់គួរឱ្យស្ញប់ស្ញែង ។ ទោះបីជាធ្លាប់ឆ្លងកាត់ស្ថានភាពលំបាក និងផលប៉ះពាល់ជាច្រើនយ៉ាងណាក្តី ក៏មិនអាចរារាំងឆន្ទៈសិក្សារបស់កុលបុត្រខ្មែរនៅសមរភូមិក្រោយបានឡើយ ។
ជាក់ស្តែងលទ្ធផលនៃការប្រឡងបាក់ឌុបឆ្នាំ២០២៦នេះ ក្រសួងអប់រំបានបង្ហាញឱ្យឃើញនូវតួលេខដ៏អស្ចារ្យតាមបណ្តាខេត្តគោលដៅ រួមមាន ៖
-ខេត្តឧត្តរមានជ័យ ៖ សម្រេចបានអត្រាជាប់រហូតដល់ ៨៩.៤៤%
-ខេត្តព្រះវិហារ៖ សម្រេចបានអត្រាជាប់រហូតដល់ ៨៧.៩៦%
-ខេត្តបន្ទាយមានជ័យ៖ សម្រេចបានអត្រាជាប់រហូតដល់ ៨៤.៣៧%
បន្ថែមពីនេះទៀត តួលេខទាំងនេះ គឺជាសក្ខីភាពបញ្ជាក់យ៉ាងច្បាស់ថា ឧបសគ្គមិនមែនជាលេសនៃការបោះបង់នោះឡើយ ។ ភាពជោគជ័យនេះ កើតចេញពីញើសឈាម និងការប្តេជ្ញាចិត្តផ្ទាល់របស់សិស្សានុសិស្សគ្រប់រូប រួមជាមួយការលះបង់មិនចេះនឿយហត់របស់លោកគ្រូ-អ្នកគ្រូ និងការគាំទ្រយ៉ាងពេញទំហឹងពីសំណាក់អាណាព្យាបាល ។
លទ្ធផលដ៏ត្រចះត្រចង់នេះ មិនត្រឹមតែជាកាដូជីវិតដ៏មានតម្លៃសម្រាប់សាមីខ្លួន និងក្រុមគ្រួសារប៉ុណ្ណោះទេ ប៉ុន្តែថែមទាំងជាមោទនភាពដ៏ធំធេងសម្រាប់វិស័យអប់រំកម្ពុជាទាំងមូល ដែលបានបង្ហាញពីស្មារតីរឹងមាំ និងអនាគតដ៏ភ្លឺស្វាងនៃធនធានមនុស្សនៅតាមតំបន់ព្រំដែន៕
ចែករំលែកព័តមាននេះ