រាជធានីភ្នំពេញ ៖ ជនជាតិបង់ក្លាដេស ១៨នាក់ ពាក់ព័ន្ធបទល្មើសឆបោក យកប្រាក់ទៅវិនិយោគ ត្រូវបានអាជ្ញាធរឆ្មក់បង្ក្រាប បានពេលកំពុងធ្វើសកម្មភាពឆបោកតាមអនឡាញ ។
ការចុះឆ្មក់នេះដែរ ធ្វើឡើងកាលពីវេលម៉ោង០៣និង៥០នាទីរសៀលថ្ងៃទី០១ ខែកញ្ញា ឆ្នាំ២០២៦ នៅចំណុចផ្ទះលេខ៥BE០ ផ្លូវលេខ២៩៦ សង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ ។
កម្លាំងគណៈបញ្ជាការឯកភាពខណ្ឌបឹងកេងកង ដឹកនាំដោយលោក សុខ សម្បតិ្ត អភិបាលខណ្ឌបឹងកេងកង សហការជាមួយការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ ចុះបង្ក្រាបទីតាំងដែលសង្ស័យប្រព្រឹត្តបទល្មើសឆបោកអនឡាញស្កេម ។
ជាលទ្ធផលបង្ក្រាប ឃាត់ខ្លួនជនជាតិបង់ក្លាដេស ចំនួន ១៨នាក់ (ស្រី ១នាក់), វត្ថុតាងរួមមាន ៖ កុំព្យូទ័រ Allin one ចំនួន ១៧គ្រឿង, កុំព្យូទ័រយួរដៃ ចំនួន១គ្រឿង, ទូរសព្ទផ្ទាល់ខ្លួនចំនួន ១៩គ្រឿង, ទូរសព្ទបទល្មើស៧គ្រឿង, លិខិតឆ្លងដែន ៥ក្បាល, ប័ណ្ណការងារ ២ស្លឹក, ម៉ូតូធំ ១គ្រឿង ម៉ាក YAMAHA R15 ពណ៌ខ្លៅលាយខៀវ ស្លាកលេខ ភ្នំពេញ 1GN-1774 ។
ក្រោមការត្រួតពិនិត្យកោសល្យវិច័យបឋម ក្រុមជនសង្ស័យប្រើប្រាស់ប្រទេសកម្ពុជា លួចលាក់ប្រព្រឹត្តបទល្មើស ដោយប្រើគណនីតេលេក្រាមជាច្រើន ដើម្បីឆបោកបែបវិនិយោគក្លែងក្លាយ ក្រោមរូបភាពអូសទាញឲ្យជនរងគ្រោះដាក់ប្រាក់ទៅប្រទេសបង់ក្លាដេស ។
បច្ចុប្បន្ន ជនសង្ស័យទាំង១៨នាក់ រួមសម្ភារៈបទល្មើស បានបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីអនុវត្តតាមច្បាប់ ៕
ចែករំលែកព័តមាននេះ