ទាហានថៃចាប់ខ្លួនមនុស្ស៧នាក់ រឹបអូសបារី១៣៥ប៊ិក ដែលហោះឆ្លងព្រំដែនចេញពីទឹកដីស្រុកកំរៀង
- បាត់ដំបង
ខេត្តបាត់ដំបង ៖ យ៉ាងហោចណាស់ មនុស្សចំនួន០៧នាក់ត្រូវទាហានព្រំដែនថៃចាប់ខ្លួន និងរឹបអូសបារីជាង១៣០ប៊ិក ដឹកតាមរថយន្តចំនួន០៣គ្រឿង នៅវេលាទៀបភ្លឺឈានចូលថ្ងៃទី៣១ សីហា កន្លងទៅថ្មីៗ ដែលគេអះអាងថា បារីទាំងនោះហោះឆ្លងព្រំដែនចេញពីភូមិសាស្ត្រ ក្នុងស្រុកកំរៀង ខេត្តបាត់ដំបង ចូលទៅកាន់ទឹកដី ស្រុកពោងណាំរ៉ន ខេត្តច័ន្ទបូរី ប្រទេសថៃ ។
ប្រភពមិនបាននិយាយពីមនុស្សដែលត្រូវបានទាហានថៃចាប់ខ្លួនក្នុងបទល្មើសរត់ពន្ធបារី ថា តើជាជនជាតិខ្មែរ ឬជាជនជាតិថៃនោះទេ? ប៉ុន្តែបាននិយាយថា ក្រុមរត់ពន្ធបារីទាំងនោះ ត្រូវក្រុមទាហានថៃស្ទាក់ចាប់បាន ពេលកំពុងដឹកជញ្ជូនបារីតាមរយៈរថយន្តចំនួន០៣គ្រឿង បម្រុងចាកចេញពីទឹកដីខេត្តច័ន្ទបូរី ឆ្ពោះទៅកាន់ ខេត្តស្រះកែវ ប្រទេសថៃ ។
តាមរយៈប្រព័ន្ធផ្សព្វផ្សាយនៃប្រទេសថៃបានឲ្យដឹងថា បារីចំនួន១៣៥ប៊ិក ត្រូវរឹបអូស និងមនុស្សចំនួន០៧នាក់ត្រូវបានចាប់ខ្លួន ជាមួយនឹងរថយន្តចំនួន០៣គ្រឿងដឹកជញ្ជូនបារី ។ បារីទាំងនោះត្រូវបានឈ្មួញខាងភាគីកម្ពុជាលួចនាំចេញពីព្រំដែន ក្នុងភូមិសាស្ត្រ ស្រុកកំរៀង ខេត្តបាត់ដំបង ឆ្លងចូលទឹកដីក្នុងស្រុកពោងណាំរ៉ន ខេត្តច័ន្ទបូរី នៅពេលយប់ ដែលមានឈ្មួញខាងភាគីថៃ រង់ចាំទទួលយ៉ាងសម្ងាត់ ។ ប៉ុន្តែត្រូវកម្លាំងទាហានថៃ ស្ទាក់ចាប់បាននៅពេលរថយន្តទាំង០៣គ្រឿងនោះ ដឹកចេញពីទឹកដីខេត្តច័ន្ទបូរី ឆ្ពោះទៅកាន់ ខេត្តស្រះកែវ នៃប្រទេសថៃ ។
ពាក់ព័ន្ធនឹងការចាប់ខ្លួនមនុស្ស និងបារីជាង១៣០ប៊ិក ដែលភាគីថៃចោទថា ត្រូវជនទុច្ចរិតលួចនាំឆ្លងដែនចូលពីប្រទេសកកម្ពុជា ក្នុងភូមិសាស្ត្រ ស្រុកកំរៀងនេះ ពុំមានមន្ត្រីព្រំដែនកម្ពុជាណាម្នាក់ឆ្លើយថា បានដឹង បានឮទេ ប៉ុន្តែគេបាននិយាយថា បានដឹងនៅពេលបែកធ្លាយព័ត៌មានពីភាគីថៃមកវិញ ។
សូមបញ្ជាក់ថា ស្រុកចំនួន០៣ ភាគខាងលិចនៃទឹកដីខេត្តបាត់ដំបង គឺស្រុកសំពៅលូន ស្រុកភ្នំព្រឹក និងស្រុកកំរៀង ត្រូវបានគេកត់សម្គាល់ថា ហាក់មានការចន្លោះប្រហោង ដែលមានមន្ត្រី និងឈ្មួញទុច្ចរិត លួចនាំទំនិញឆ្លងដែនខុសច្បាប់ជាញឹកញាប់ ។ ជាពិសេស ទំនិញ «បារី» នេះតែម្ដង ។ ពេលខ្លះ ត្រូវកម្លាំងការពារព្រំដែនកម្ពុជា ស្ទាក់ចាប់បាន ប៉ុន្តែពេលខ្លះ ក៏ត្រូវពួកទាហានថចាប់បាន ក្រោយពេលពួកឈ្មួញបញ្ជូនទំនិញឆ្លងផុតពីអូរព្រំដែន ។
ឈ្មួញដែលតែងលួចនាំទំនិញឆ្លងដែនចេញទៅប្រទេសថៃ សព្វថ្ងៃនេះ ត្រូវគេកំណត់សម្គាល់បានថា ជាមន្ត្រីមានអំណាច និងឈ្មួញមានលុយប្រចាំនៅតាមតំបន់ព្រំដែននោះតែម្ដង ។ មិនតែប៉ុណ្ណោះ គេក៏ស្គាល់ឈ្មោះ ស្គាល់មុខពួកឈ្មួញទុច្ចរិតទាំងនោះដែរ រហូតមានឈ្មោះក្នុងរបាយការណ៍ដែលធ្លាប់បង្ក្រាបបានទៀតផង ។ ប៉ុន្តែគេមិនឃើញឈ្មួញធំណាម្នាក់ ត្រូវបានសមត្ថកិច្ចចាប់ខ្លួនចាត់ការតាមនីតិវិធីច្បាប់ឡើយ រហូតមកទល់ពេលនេះ ។
ដូច្នេះហើយ ទើបធ្វើឲ្យក្រុមឈ្មួញទុច្ចរិតកាន់តែបានដៃ បានឱកាសសមគំនិតគ្នាប្រព្រឹត្តបទល្មើសឆ្លងដែននេះ ដោយគ្មានញញើតច្បាប់ឡើយ ៕
ចែករំលែកព័តមាននេះ