ខេត្តព្រៃវែង ៖ ពីបេក្ខជនធ្លាក់កាលពីឆ្នាំមុន យុវជនខេត្តព្រៃវែងម្នាក់តស៊ូរហូតដណ្ដើមបាននិទ្ទេស A ក្នុងសម័យប្រឡងបាក់ឌុបឆ្នាំនេះយ៉ាងត្រចះត្រចង់ ។
ការតស៊ូ និងការមិនបោះបង់ ពិតជាផ្តល់នូវផ្លែផ្កាដ៏ផ្អែមល្ហែម ទីបំផុតយុវជន វ៉ាន សែនវ៉ា អាយុ១៩ ឆ្នាំ រស់នៅក្នុងខេត្តព្រៃវែង បានសាងប្រវត្តិសាស្ត្រផ្ទាល់ខ្លួនដ៏អស្ចារ្យ តាមរយៈការដណ្ដើមបាននិទ្ទេស A ក្នុងការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម្រាប់ឆ្នាំសិក្សានេះ បន្ទាប់ពីរូបគេធ្លាប់បានភ្លក់រសជាតិបរាជ័យ កាលពីឆ្នាំកន្លងទៅ ។
រឿងរ៉ាវរបស់យុវជនរូបនេះ បានក្លាយជាគំរូ និងជាការលើកទឹកចិត្តយ៉ាងខ្លាំងដល់សិស្សានុសិស្សទូទៅ តាមរយៈការប្រែក្លាយខ្លួនពី «បេក្ខជនប្រឡងធ្លាក់» ឱ្យក្លាយជា «ម្ចាស់និទ្ទេស A» យ៉ាងពេញមោទនភាព ។
លទ្ធផលដ៏ត្រចះត្រចង់នេះ បានសបញ្ជាក់ឱ្យឃើញយ៉ាងច្បាស់ថា ការបរាជ័យកាលពីម្សិលមិញ គ្រាន់តែជាមេរៀន និងជាកម្លាំងរុញច្រានឆ្ពោះទៅរកភាពជោគជ័យដ៏អស្ចារ្យនៅថ្ងៃនេះ តែប៉ុណ្ណោះ ប្រសិនបើយើងមានការតាំងចិត្តខ្ពស់ និងការខិតខំប្រឹងប្រែងឥតឈប់ឈរ ៕
ចែករំលែកព័តមាននេះ