លទ្ធផលបាក់ឌុបឆ្នាំនេះ! មុខវិជ្ជាគណិតវិទ្យាធ្លាក់ច្រើន
- ភ្នំពេញ
រាជធានីភ្នំពេញ ៖ ក្រោយពេលក្រសួងអប់រំ យុវជន និងកីឡា បានប្រកាសលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ជាផ្លូវការនៅព្រឹកថ្ងៃទី២ ខែកញ្ញា ឆ្នាំ២០២៦នេះ បានធ្វើឱ្យមានការចាប់អារម្មណ៍ប្លែក ដោយសារតែលទ្ធផលពិន្ទុមុខវិជ្ជាវិទ្យាសាស្ត្រពិត ជាពិសេសមុខវិជ្ជា «គណិតវិទ្យា» គឺបេក្ខជនជាច្រើនធ្លាក់ដោយទទួលបានត្រឹមនិទ្ទេស F ប៉ុណ្ណោះ ។
យោងតាមការពិនិត្យលើតារាងលទ្ធផលតាមមណ្ឌលប្រឡង ដែលក្រសួងបានផ្សព្វផ្សាយជាសាធារណៈនាព្រឹកមិញនេះ គេសង្កេតឃើញថា បេក្ខជនប្រឡងនៅតាមបណ្តាខេត្តជាច្រើនមានអត្រាធ្លាក់មុខវិជ្ជាគណិតវិទ្យាខ្ពស់ខុសពីធម្មតាច្រើន ។ ក្នុងចំណោមនោះ បណ្ដាខេត្តដែលបង្ហាញវត្តមាននិទ្ទេស F លើមុខវិជ្ជាគណិតវិទ្យាច្រើនរួមមាន ៖ ខេត្តបាត់ដំបង កំពង់ធំ ព្រៃវែង បន្ទាយមានជ័យ កំពត ត្បូងឃ្មុំ កំពង់ស្ពឺ កណ្ដាល កំពង់ឆ្នាំង ស្វាយរៀង ពោធិ៍សាត់ ព្រះសីហនុ និងក្រចេះ ជាដើម ។
ការធ្លាក់ចុះនៃពិន្ទុគណិតវិទ្យានេះ ត្រូវបានគេមើលឃើញថា បានទាញទម្លាក់មធ្យមភាគពិន្ទុសរុប ក៏ដូចជាកាត់បន្ថយឱកាសទទួលបាននិទ្ទេសល្អៗ (A, B, C) របស់សិស្សានុសិស្សជាច្រើនរូបផងដែរ ។
ទោះជាយ៉ាងណា ជុំវិញលទ្ធផលនៃការប្រឡងបាក់ឌុបនេះ ក្រសួងអប់រំ យុវជន និងកីឡា តែងតែប្រកាន់ខ្ជាប់នូវគោលជំហររឹងមាំលើការពង្រឹងគុណភាពអប់រំទូទាំងប្រទេស ក្រោមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ស្របតាមទិសស្លោក «អ្នកចេះ គឺជាប់» ។
គោលការណ៍ដ៏ម៉ឺងម៉ាត់នេះ ត្រូវបានអនុវត្តឡើងដើម្បីធានាឱ្យបាននូវភាពត្រឹមត្រូវ យុត្តិធម៌សម្រាប់បេក្ខជនទាំងអស់ និងធានាថា លទ្ធផលដែលចេញមក គឺឆ្លុះបញ្ចាំងពីសមត្ថភាពពិតប្រាកដរបស់សិស្សគ្រប់រូបដោយគ្មានការបន្ធូរបន្ថយឡើយ ។
សូមបញ្ជាក់ថា ជាលទ្ធផល បេក្ខជនប្រឡងជាប់សរុប ១២៥ ៩៧៥ នាក់ ត្រូវជា ៨៤.០៦ ភាគរយនៃចំនួន បេក្ខជនមកប្រឡង។ បេក្ខជនជាប់និទ្ទេស A ចំនួន ២ ០២២ នាក់, និទ្ទេស B ចំនួន ៨ ៨៤៨ នាក់, និទ្ទេស C ចំនួន ២៣ ៤២២ នាក់, និទ្ទេស D ចំនួន ៤៤ ៨៦៩ នាក់, និងនិទ្ទេស E ចំនួន ៤៦ ៨១៤ នាក់ ៕
ចែករំលែកព័តមាននេះ