រាជធានីភ្នំពេញ ៖ ជនសង្ស័យម្នាក់ ត្រូវបានកម្លាំងប៉ុស្តិ៍នគរបាលរដ្ឋបាលផ្សារដើមគរ នៃអធិការដ្ឋាននគរបាលខណ្ឌទួលគោក ឃាត់ខ្លួនបន្ទាប់ពីធ្វើសកម្មភាពលួចកាត់កន្ទុយម៉ាស៊ីនត្រជាក់ ចំនួន០១គ្រឿងម៉ាក Hisense នៅផ្ទះអតីតមេប៉ុស្តិ៍ផ្សារដើមគរ និងជាសមាជិកក្រុមប្រឹក្សាសង្កាត់ផ្សារដើមគរ ។
ជនសង្ស័យដែលត្រូវឃាត់ខ្លួនឈ្មោះ ធឿន សេងហៀក ភេទប្រុស អាយុ២២ឆ្នាំ មុខរបរ មិនពិតប្រាកដ ស្នាក់នៅ មិនពិតប្រាកដ និងមានទីកន្លែងកំណើត នៅភូមិគ្រួស ឃុំឌឿងវី ស្រុកកញ្ជ្រៀច ខេត្តព្រៃវែង ។ មានសារធាតុញៀនក្នុងទឹកនោម ។
ចំណែកជនរងគ្រោះឈ្មោះ ហែម វណ្ណរិទ្ធ ភេទប្រុស អាយុ៦៥ឆ្នាំ ជាអតីតមេប៉ុស្តិ៍ផ្សារដើមគ ចូលនិវត្តន៍ និង
មុខរបរ ជាក្រុមប្រឹក្សាសង្កាត់ផ្សារដើមគរ ស្នាក់នៅផ្ទះលេខ៧៣ ផ្លូវលេខ២១៧ ភូមិ៤ សង្កាត់ផ្សារដើមគរ ខណ្ឌទួលគោក រាជធានីភ្នំពេញ ដែលជាកន្លែងកើតហេតុ ។
តាមនគរបាលខណ្ឌទួលគោក បានឲ្យដឹងថា នៅថ្ងៃទី៣១ ខែសីហា ឆ្នាំ២០២៦ វេលាម៉ោង០១និង២០នាទីរំលងអធ្រាត្រ កម្លាំងប៉ុស្តិ៍នគរបាលរដ្ឋបាលផ្សារដើមគរ នៃអធិការដ្ឋាននគរបាលខណ្ឌទួលគោក បានធ្វើការឃាត់ខ្លួនជនសង្ស័យចំនួន០១នាក់ ពីបទលួច និងប្រើប្រាស់ដោយខុសច្បាប់ នូវសារធាតុញៀន ដោយលួចកាត់កន្ទុយម៉ាស៊ីនត្រជាក់ ចំនួន០១គ្រឿង ម៉ាក Hisense នៅចំណុចផ្ទះលេខ៧៣ ផ្លូវលេខ២១៧ ភូមិ៤ សង្កាត់ផ្សារដើមគរ ខណ្ឌទួលគោក រាជធានីភ្នំពេញ ។
បន្ទាប់ពីឃាត់ខ្លួនសមត្ថកិច្ចដករួមមាន ៖ ដង្កាប់ចំនួន០១ ជារបស់ជនសង្ស័យ ដែលបានយកធ្វើសកម្មភាពលួចកាត់កន្ទុយម៉ាស៊ីនត្រជាក់របស់ជនរងគ្រោះ, កន្ទុយម៉ាស៊ីនត្រជាក់ ចំនួន០១គ្រឿងម៉ាក Hisense ជារបស់ជនរងគ្រោះដែលត្រូវបានជនសង្ស័យធ្វើសកម្មភាពលួចកាត់នៅពេលកើតហេតុ និងបានប្រគល់ជូនជនរងគ្រោះវិញតាមពាក្យស្នើសុំ ។
បច្ចុប្បន្ន ជនសង្ស័យខាងលើ កំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីធ្វើការសាកសួរនិងចាត់ការបន្តតាមនីតិវិធី ៕
ចែករំលែកព័តមាននេះ