ជននេះធ្លាប់ជាប់ពន្ធនាគារ៣ឆ្នាំពីបទហិ.ង្សា ចេញមកវិញក្លាយជាចោរប្ល.ន់
- កណ្តាល
ខេត្តកណ្ដាល៖ ជនខិលខូចម្នាក់ធ្លាប់ជាប់ពន្ធនាគារនៅខេត្តពោធិ៍សាត់អស់រយៈពេល៣ឆ្នាំ ពីបទហិង្សា ដោយចេតនាមានស្ថានទម្ងន់ទោស លុះពេលចេញមកវិញ មិនត្រឹមតែមិនរាងចាលកែប្រែខ្លួនឲ្យក្លាយទៅជាមនុស្សល្អនៅក្នុងសង្គមប៉ុណ្ណោះទេ ថែមទាំងប្រើប្រាស់គ្រឿងញៀនរយៈពេល០៧ឆ្នាំហើយដែរ ។ មិនតែប៉ុណ្ណោះ បានបន្តធ្វើជាចោរប្លន់ ហើយបាននាំបក្ខពួក៥នាក់ទៀតទៅកាប់ប្លន់យកម៉ូតូ១គ្រឿងពីបុរសម្នាក់ បណ្ដាលឲ្យជនរងគ្រោះរងរបួសបែករយះក្បាលធ្ងន់ធ្ងរ ។ ប៉ុន្តែយកម៉ូតូមិនបានសម្រេចនោះទេ ដោយជនរងគ្រោះស្រែកផ្អើលដល់អ្នកភូមិចេញមកជួយទាន់ ហើយ៥ថ្ងៃក្រោយមកជននោះក៏ត្រូវបាននគរបាលស្រុកអង្គស្នួលចាប់បាន ចំណែកបក្ខពួក៥នាក់ទៀតកំពុងគេចខ្លួននៅឡើយ ។
ហេតុការណ៍នោះបានកើតឡើងកាលពីវេលាម៉ោង១២និង២០នាទីយប់រំលងអាធ្រាត្រឈានចូលថ្ងៃទី២៥ ខែសីហា ឆ្នាំ២០២៦ នៅក្នុងភូមិត្រពាំងអណ្ដែង ឃុំម្កាក់ ស្រុកអង្គស្នួល ខេត្ដកណ្ដាល ។
ជនសង្ស័យដែលត្រូវនគរបាលឃាត់ខ្លួននោះឈ្មោះ ជឿន រស្មី ហៅម៉ី ភេទប្រុស អាយុ២៤ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅភូមិខ្លាកូន ឃុំពើក ស្រុកអង្គស្នួល ខេត្តកណ្តាល ហើយបក្ខពួក៥នាក់មិនស្គាល់អត្តសញ្ញាណ ។ ខណៈនោះនគរបាលដកហូតបានម៉ូតូ០១គ្រឿង ម៉ាក SUZUKI NEX ពណ៌ស ផលិតឆ្នាំ២០១៨ ពាក់ស្លាកលេខ ពោធិ៍សាត់ 1L-9972 និងកាំបិតផ្កាក់ដងឈើ ០១ដើម ហើយវត្ថុតាងខាងលើនេះគឺជារបស់ជនសង្ស័យ ។
ដោយឡែកបុរសរងគ្រោះឈ្មោះ ប៉ិច សារី ភេទប្រុស អាយុ៤៥ ឆ្នាំ ជនជាតិខ្មែរ មុខរបរកម្មករោងចក្រ ស្នាក់នៅភូមិជោទ្រាជ ឃុំម្កាក់ ស្រុកអង្គស្នួល ខេត្ដកណ្ដាល រងរបួសបែកក្បាលធ្ងន់ត្រូវគ្រូពេទ្យ នៃមន្ទីរពេទ្យជាតិតេជោសន្តិភាពដេរចំនួន១៥ថ្នេរ ។
នគរបាលបានប្រាប់ឲ្យដឹងថា នៅមុនពេលកើតហេតុ បុរសរងគ្រោះបានជិះម៉ូតូ១គ្រឿងចេញពីធ្វើការរោងចក្រហើយមិនបានទៅផ្ទះទេ គឺបានឆ្លៀតចូលទៅលេងផ្ទះម្ដាយបង្កើតស្ថិតនៅក្នុងភូមិអង្គរមាស ឃុំម្កាក់ ស្រុកអង្គស្នួល លុះពេលទៅដល់បានជួបជជែកគ្នាលេងជាមួយម្ដាយ និងបងប្អូន ។ ក្រោយមកបានផឹកស្រាស ជាមួយប្អូនប្រុស ហើយបន្ទាប់ពីផឹកអស់ស្រាអស់២លីត្រ ទើបឈប់ផឹករួចបុរសរងគ្រោះខាងលើបានជិះម៉ូតូចេញពីផ្ទះម្ដាយទៅផ្ទះរបស់ខ្លួនវិញ ខណៈពេលទៅដល់ត្រង់ចំណុចកើតហេតុ ក៏ឃើញជនសង្ស័យនិងបក្ខពួកបានជិះម៉ូតូតាមពីក្រោយ ។
ពេលនោះជនសង្ស័យបានជិះវ៉ាជែងជនរងគ្រោះហួសទៅមុខបានប្រហែល០៥ម៉ែត្រ ក៏បានបត់ត្រលប់មកក្រោយវិញ ហើយបានឈប់ស្ទាក់មុខម៉ូតូបុរសរងគ្រោះ រួចនាំគ្នាចុះពីលើម៉ូតូរបស់ខ្លួន ធ្វើសកម្មភាពកាប់ក្បាលជនរងគ្រោះ១កាំបិតផ្កាក់បណ្តាលឲ្យរងរបួសធ្ងន់ ។
នគរបាលបានប្រាប់ឲ្យដឹងបន្តទៀតថា បន្ទាប់មកក្រុមជនសង្ស័យបម្រុងលើម៉ូតូរបស់បុរសរងគ្រោះជិះគេចខ្លួន ប៉ុន្តែបុរសរងគ្រោះស្រែកថា«ចោរៗ ចោរប្លន់ម៉ូតូខ្ញុំហើយ» ធ្វើឲ្យមានការភ្ញាក់ផ្អើលដល់ដល់ប្រជាពលរដ្ឋចេញទៅជួយ ទើបជនសង្ស័យជិះម៉ូតូគេចខ្លួនសំដៅទៅផ្លូវជាតិលេខ៥១បាត់ស្រមោល ។ក្រោយពេលទទួលបានដំណឹងនេះកម្លាំងប៉ុស្ដិ៍នគរបាលរដ្ឋបាលម្កាក់ បានចុះទៅកាន់កន្លែងកើតហេតុ និងបានបញ្ជូនបុរសរងគ្រោះទៅកាន់មណ្ឌលសុខភាពឃុំម្កាក់ដើម្បីព្យាបាលរបួស ប៉ុន្ដែដោយតែរបួសធ្ងន់ធរពេក ទើបក្រុមគ្រូពេទ្យបានបញ្ជូនបន្តទៅកាន់មន្ទីពេទ្យជាតិតេជោសន្ដិភាពវិញ ។
នគរបាលបានប្រាប់ឲ្យដឹងបន្ថែមថា លុះដល់ថ្ងៃទី៣០ ខែសីហា ឆ្នាំ២០២៦ វេលាម៉ោង១២និង៣០នាទីរសៀល ដោយមានបញ្ជាពីលោកឧត្ដមសេនីយ៍ទោ ឈឿន សុចិត្ត ស្នងការ នៃស្នងការដ្ឋាននគរបាលខេត្តកណ្ដាល ។ លោកឧត្តមសេនីយ៍ត្រី ឡាក់ ម៉េងធី ស្នងការរងទទួលផែននគរបាលព្រហ្មទណ្ឌ និងមានការសម្របសម្រួលពីឯកឧត្ដម គុជ គីមឡុង ព្រះរាជអាជ្ញា នៃអយ្យការអបសាលាដំបូងខេត្តកណ្ដាល។
លោកវរសេនីយ៍ឯក មាន សំណាង អធិការនគរបាលស្រុកអង្គស្នួល បានដឹកនាំកម្លាំងផ្នែកនគរបាលយុត្តិធម៌ស្រុក កម្លាំងប៉ុស្តិ៍នគរបាលរដ្ឋបាលម្កាក់ ប៉ុស្តិ៍នគរបាលរដ្ឋបាលទួលព្រេជ សហការជាមួយកម្លាំងប៉ុស្ដិ៍នគរបាលរដ្ឋបាលចាន់តាសែន នៃអធិការដ្ឋាននគរបាលស្រុកសាមគ្គីមុនីជ័យ នៃស្នងការដ្ឋាននគរបាលខេត្តកំពង់ស្ពឺ ។ បានធ្វើការស្រាវជ្រាវរហូតឈានដល់ការឃាត់ខ្លួនជនសង្ស័យឈ្មោះ ជឿន រស្មី ហៅមុី រួមទាំងវត្ថុតាងនៅភូមិព្រៃទាន់ ឃុំចាន់តាសែន ស្រុកសាមគ្គីមុនីជ័យ ខេត្តកំពង់ស្ពឺ ។
នគរបាលបានបញ្ជាក់ថា បន្ទាប់មកបាននាំខ្លួនជនសង្ស័យខាងលើទៅកាន់អធិការដ្ឋាននគរបាលស្រុកអង្គស្នួល ដើម្បីសួរនាំនិងកសាងសំណុំរឿងចាត់ការតាមច្បាប់ ហើយនៅចំពោះមុខនគរបាល ជនសង្ស័យ ខាងលើមិនឆ្លើយសារភាពពីសកម្មភាពដែលបានកាប់ប្លន់ជនរងគ្រោះឡើយ ។ ប៉ុន្តែបានឆ្លើយសារភាពថា ខ្លួនធ្លាប់ជាប់ពន្ធនាគារខេត្តពោធិ៍សាត់រយៈពេល០៣ឆ្នាំ ក្នុងឆ្នាំ២០២២ ដល់ឆ្នាំ២០២៦ ពីបទហិង្សាដោយចេតនា មានស្ថានទម្ងន់ទោស ហើយក៏កំពុងប្រើប្រាស់ថ្នាំញៀនបានរយៈពេល០៧ឆ្នាំហើយដែរ ៕
ចែករំលែកព័តមាននេះ