ខេត្តកំពង់ឆ្នាំង ៖ ផ្លូវបេតុង ១ខ្សែ តភ្ជាប់ពីឃុំពាមឆ្កោក ទៅទីរួមស្រុកជល់គីរី ត្រង់ចំណុចបឹងក្រាយ បានក្លាយទៅជាតំបន់ទេសចរណ៍ដ៍ទាក់ទាញនារដូវទឹកឡើងខែវស្សា។ ជាក់ស្ដែងជារៀងរាល់ថ្ងៃគេបានឃើញភ្ញៀវទេសចរណ៍ក្មេងចាស់ ប្រុសស្រី បាននាំគ្នាធ្វើដំណើរទៅកម្សាន្តជាច្រើនរយនាក់ក្នុងមួយថ្ងៃៗ ដែលធ្វើឲ្យបរិយាកាស នៅលើផ្លូវលំដែលធ្លាប់តែស្ងប់ស្ងាត់ពីមុនមក និងបច្ចុប្បន្នបានក្លាយជាផ្លូវបេតុងដ៍ស្រស់ស្អាត មានមនុស្សទៅលេងយ៉ាងច្រើនកុះករ ។
លោក ដូវ គឹមស៊ីន អភិបាលស្រុកជលគីរី បានបញ្ជាក់ប្រាប់ថា ផ្លូវបេតុងមួយខ្សែនេះ បានកសាងឡើងនៅអំឡុងឆ្នាំ ២០២៤ គិតមកដល់បច្ចុប្បន្នបាន ២ឆ្នាំហើយ គឺនៅឆ្នាំ ២០២៥ មិនដឹងឆ្នាំ ២០២៦ ដែលមានបងប្អូនទៅលេងកម្សាន្តក្នុងខែទឹកឡើង ។ ចំណុចដែលបងប្អូនទៅលេងច្រើនកុះករនោះ គឺចំណុចបឹងក្រាយ ស្ថិតនៅក្នុងភូមិសាស្ត្រ ឃុំចំនួន ២ គឺឃុំពាមឆ្កោក និងឃុំព្រៃគ្រី ក្នុងស្រុកជលគីរី ។
អភិបាលស្រុកជល់គីរី បានបញ្ជាក់ថា ភ្ញៀវទេសចរណ៍ ដែលទៅលេងកម្សាន្ត មួយភាគគឺជាប្រជាពលរដ្ឋនៅក្នុងស្រុក ដែលមានលំនៅឋានជិតៗនោះ មួយភាគទៀតមកពីស្រុកបាធាយ ខេត្តកំពង់ចាម ចំណែកអ្នកលក់ដូរ ក៏ដូចគ្នាដែរ គឺមានអ្នកក្នុងស្រុក និងអ្នកមកពីស្រុកបាធាយ។ ចាប់តាំងពីឆ្នាំ២០២៥ នៅពេលរដូវទឹកឡើង និងក្រោយការកសាងផ្លូវនោះរួចរាល់ ភ្ញៀវបានចាប់ផ្ដើមទៅលេង ហើយនៅឆ្នាំ២០២៦នេះ ភ្ញៀវទើបបានទៅលេងក្នុងអំឡុងរយៈពេលជាង ១០ថ្ងៃនេះទេ គ្រាដែលទឹកទន្លេបានឡើងប្រៀបថ្នល់ ។ សព្វថ្ងៃនេះ រដ្ឋបាលស្រុក បានដាក់កម្លាំង ចំនួនពី ១០ទៅ ១៥នាក់ ដោយក្នុងនោះមានកម្លាំងនគរបាលខ្លះនិងប្រជាការពារខ្លះ សម្រាប់រៀបចំសណ្ដាប់ធ្នាប់ សម្រួលចរាចរណ៍ និងមើលការខុសត្រូវពេលពួកគាត់លេងទឹក។ ចាប់តាំងពីផ្លូវមួយខ្សែនេះ បានក្លាយទៅជាតំបន់ទេសចរណ៍នារដូវវស្សាពុំមានគ្រោះថ្នាក់ឬបាតុភាពអាក្រក់អ្វីកើតឡើងនោះទេ ។
អភិបាលស្រុកជល់គីរី នៅបានបញ្ជាក់ទៀតថា សម្រាប់ឆ្នាំក្រោយ ២០២៧ រដ្ឋបាលស្រុក នឹងកសាងសាលាឆទានមួយកន្លែងដោយដាក់ឲ្យមានបន្ទប់ទឹកអនាម័យ សម្រាប់ភ្ញៀវ ពិសេសភ្ញៀវស្រីៗ ដែលពុំមានកន្លែងបន្ទោរបង់។ ក្នុងនាមអាជ្ញាធរស្រុកសូមអំពាវនាវបងប្អូនប្រជាពលរដ្ឋនិងអ្នកលក់ដូរ សូមចូលរួមថែរក្សាអនាម័យដោយដាក់សំរាមក្នុងថង់ ឱ្យបានត្រឹមត្រូវនិងយកវិលត្រឡប់ទៅផ្ទះវិញ ។
ក៏សូមបញ្ជាក់ដែរថា ភ្ញៀវដែលបានទៅលេងនៅទីនោះ ភាគច្រើនចុះងូតទឹកលេងកម្សាន្ត ខ្លះអង្គុយតាមកៅអីរបស់អ្នកលក់ដូរ ខ្លះពិសាភេសជ្ជៈ និងអាហារ ព្រមទាំងស្ដាប់ភ្លេង ធុងបាសដែលពួកគាត់យកទៅជាមួយ រៀងៗខ្លួន ដោយឡែកខ្លះទៀតជិះកាណូតជិះទូកលេង ៕
ចែករំលែកព័តមាននេះ