ទីក្រុងណាយអាមី៖ កាលពីព្រឹកមិញ គេស្ដាប់ឮសំឡេងផ្ទុះគ្រាប់កាំភ្លើងយ៉ាងកងរំពងនៅលើទីតាំងជាច្រើនកន្លែងនៃរដ្ឋធានីណាយអាមី ប្រទេសនីហ្ស៊ែ។ រហូតមកដល់ពេលនេះ គេមិនទាន់ដឹងថាមានរឿងអ្វីកើតឡើងទេ។ គិតទាំងលើកនេះទៀត វាជាលើកទីបីដែលរដ្ឋធានី និងមជ្ឈមណ្ឌលតាំងនៅនៃអាកាសយានដ្ឋានអន្តរជាតិ និងមូលដ្ឋានទ័ពអាកាសជួបប្រទះនឹងបញ្ហារំជើបរំជួលនៅឆ្នាំ២០២៦ ហើយវាជាការឆ្លុះបញ្ចាំងឱ្យឃើញថាមានបញ្ហាអសន្តិសុខជាប់ជាប្រចាំក្រោមការដឹកនាំរបស់ពួកយោធាដែលធ្វើរដ្ឋប្រហារផ្ដួលរំលំរដ្ឋាភិបាលមុនកាលពីឆ្នាំ២០២៣។ ពួកគេសន្យាថានឹងរក្សាសណ្ដាប់ធ្នាប់សង្គមឡើងវិញ។
ប្រភពពីខាងមន្ត្រីសន្តិសុខម្នាក់បង្ហើបឱ្យដឹងថាពួកភេរវករបានវាយប្រហារព្រលានយន្តហោះអន្តរជាតិឌីអូរី ហាម៉ានី (Diori Hamani) និងប៉ុនប៉ងវាយទម្លុះខ្សែការពារសន្តិសុខនៅជុំវិញបរិវេណនិវាសនដ្ឋានរបស់ប្រធានាធិបតី។ គេស្ដាប់ឮការបាញ់កាំភ្លើងតដៃគ្នាយ៉ាងខ្លាំងក្លាក្បែរវិមានប្រធានាធិបតី។ លោកបាណា វ៉ាហ្កាណា អ៊ីប្រាហ៊ីម (Bana Wagana Ibrahim) ជាសមាជិកការិយាល័យក្រុមប្រឹក្សាពិគ្រោះយោបល់នៃប្រទេសនីហ្ស៊ែ និងជាអនុប្រធានសភាសម្ព័ន្ធរដ្ឋសាហេល (Sahel)។
លោកបង្ហោះសារនៅលើហ្វេសប៊ុកថាក្រុមអ្នកវាយប្រហារទាំងនោះមានគោលដៅវាយទៅលើមូលដ្ឋានទ័ពអាកាសដែលមានឈ្មោះថាបន្ទាយ១០១។ ប៉ុន្តែឥឡូវនេះ លោកអះអាងថាកងសន្តិសុខជាតិនីហ្ស៊ែវាយដណ្ដើមទីនោះបានមកវិញហើយ ហើយចូលគ្រប់គ្រងទីនោះទាំងស្រុង។ លោកថាមានសកម្មភាពវាយប្រហារកើតឡើងជាថ្មីទៀតហើយទៅលើបន្ទាយ១០១ ហើយជាថ្មីម្ដងទៀត កងទ័ព និងកងសន្តិសុខរបស់យើងអាចការពារទីនោះជាប់។ យើងអាចគ្រប់គ្រងសភាពការណ៍បានជាធម្មតា។
ទោះជាមានការអះអាងបែបនេះក្ដី សាក្សីនៅនឹងកន្លែងកើតហេតុប្រាប់ថាហេតុការណ៍ផ្ទុះអាវុធនៅព្រលានយន្តហោះនោះមិនទាន់ស្ងប់ស្ងាត់ទៅវិញនៅឡើយទេ ហើយគេក៏ស្ដាប់ឮសំឡេងផ្ទុះយ៉ាងសន្ធាប់នៅពេលមេឃទៀបភ្លឺផងដែរ។ ពោលគឺក្រោយពេលដែលលោកអ៊ីប្រាហ៊ីមបង្ហោះសារដូចខាងលើនៅលើហ្វេសប៊ុក។ ប្រភពពីភ្នាក់ងារសន្តិសុខម្នាក់ទៀតប្រាប់ថាកងទ័ពនីហ្ស៊ែបានបើកប្រតិបត្តិការយ៉ាងក្ដៅគគុក ហើយបញ្ឈប់សកម្មភាពរបស់អ្នកវាយប្រហារទាំងនោះទាំងស្រុង។ អ្នកដែលនៅសេសសល់ពីការបាញ់សម្លាប់បានរត់ភៀសខ្លួនយ៉ាងផាសក្រញាំ៕ ប្រភព៖ Reuters
ចែករំលែកព័តមាននេះ