អភិបាលខេត្តមណ្ឌលគិរី៖ រាជរដ្ឋាភិបាលតែងតែយកចិត្តទុកដាក់ និងមិនបោះបង់ចោលអតីតយុទ្ធជន និងគ្រួសារកងទ័ពឡើយ
- មណ្ឌលគិរី
ខេត្តមណ្ឌលគិរី ៖ នាព្រឹកថ្ងៃទី២៩ ខែសីហា ឆ្នាំ២០២៦ ឯកឧត្តម គង់ គឹមនី អភិបាលខេត្តមណ្ឌលគិរី បានអញ្ជើញជាអធិបតីភាពក្នុងពិធីនាំយកអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមន្នី ហ៊ុន ម៉ាណែត ចែកជូនដល់បងប្អូនអតីតយុទ្ធជន កងទ័ព និងក្រុមគ្រួសារកងទ័ពដែលមានជីវភាពខ្វះខាតនៅក្នុងខេត្ត។ពិធីនេះបានប្រព្រឹត្តទៅនៅតំបន់ប្រតិបត្តិការសឹករងមណ្ឌលគិរី ស្ថិតក្នុងក្រុងសែនមនោរម្យ ។
មានប្រសាសន៍នាឱកាសនោះ ឯកឧត្តម គង់ គឹមនី អភិបាលខេត្តមណ្ឌលគិរី បាននាំនូវការផ្តាំផ្ញើសាកសួរសុខទុក្ខយ៉ាងកក់ក្តៅ និងសេចក្តីនឹករលឹកបំផុតពីសំណាក់ សម្តេចធិបតី ហ៊ុន ម៉ាណែត និង លោកជំទាវបណ្ឌិត ជូនចំពោះបងប្អូនអតីតយុទ្ធជន កងទ័ព និងគ្រួសារកងទ័ពទាំងអស់ដែលតែងតែស្ថិតនៅក្នុងបេះដូង និងជាអាទិភាពនៃការយកចិត្តទុកដាក់របស់រាជរដ្ឋាភិបាលជានិច្ច។
ឯកឧត្តមអភិបាលខេត្តបានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅបំផុតចំពោះ វីរភាព និងគុណូបការៈរបស់អតីតយុទ្ធជន ដែលបានលះបង់សាច់ស្រស់ ឈាមស្រស់ បូជាកម្លាំងកាយចិត្ត និងសុខភាពផ្ទាល់ខ្លួនក្នុងបុព្វហេតុការពារជាតិ មាតុភូមិ និងចូលរួមយ៉ាងសកម្មក្នុងការស្វែងរកសុខសន្តិភាពពេញលេញជូនមាតុភូមិ។ វីរភាពដ៏ឧត្តុង្គឧត្តមនេះ គឺជាគំរូដ៏ប្រពៃ និងជាគ្រឹះដ៏រឹងមាំសម្រាប់កូនចៅជំនាន់ក្រោយ។
ឯកឧត្តមអភិបាលខេត្តបានគូសបញ្ជាក់ថា អំណោយដែលបាននាំយកមកចែកជូននាពេលនេះ គឺជាស្តែងឱ្យឃើញពីកាយវិការសប្បុរសធម៌ និងការយកចិត្តទុកដាក់ខ្ពស់បំផុតពីសំណាក់ សម្តេចធិបតី និងលោកជំទាវបណ្ឌិត ដែលជានិច្ចកាល តែងតែគិតគូរពីសុខទុក្ខ និងជីវភាពរស់នៅរបស់បងប្អូនកងទ័ព និងអតីតយុទ្ធជន ដោយមិនទុកឱ្យបងប្អូនណាម្នាក់រស់នៅក្នុងការបោះបង់ចោល ឬខ្វះខាតដោយគ្មានការយកចិត្តទុកដាក់នោះឡើយ ។
ចែករំលែកព័តមាននេះ