ទីក្រុងហាណូយ៖ វៀតណាមទាមទារឱ្យប្រទេសចិនបញ្ឈប់ការធ្វើសកម្មភាពយ៉ាងគគ្រឹកគគ្រេងនៅលើប្រជុំកោះប៉ារ៉ាសែលនៃសមុទ្រចិនខាងត្បូងដែលប្រទេសទាំង២បាន និងបន្តប្រទាញប្រទង់គ្នាអស់រាប់ទសវត្សរ៍មកហើយ។ ថ្ងៃនេះ វៀតណាមចេញមុខប្រឆាំងជំទាស់យ៉ាងខ្លាំងក្លានូវអ្វីដែលខ្លួនចាត់ទុកថាជាសកម្មភាពរបស់រដ្ឋបរទេសនៅប្រជុំកោះខាងលើ។ ប្រតិកម្មនេះកើតមានឡើងបន្ទាប់ពីមានសេចក្ដីរាយការណ៍កាលពីដើមសប្ដាហ៍នេះថាប្រទេសចិនចាប់ផ្ដើមរៀបចំសាងសង់កោះសិប្បនិម្មិតថ្មីមួយទៀតនៅក្បែរប្រជុំកោះប៉ារ៉ាសែល។ ទីភ្នាក់ងារព័ត៌មានរ៉យទ័រចុះផ្សាយកាលពីថ្ងៃអង្គារថាគម្រោងសាងសង់កោះសិប្បនិម្មិតនេះត្រូវគេប្រទះឃើញរៀបចំនៅលើកោះយ៉ាកុង (Yagong) ឬកោះបាបា (Baba) ហៅតាមភាសាវៀតណាម។
ការចុះផ្សាយនេះដោយយោងទៅលើការបញ្ជូនរូបភាពពីផ្កាយរណបដែលបង្ហាញអំពីការធ្វើសកម្មភាពដើម្បីរៀបចំសាងសង់កោះ។ ក្រុមអ្នកវិភាគសន្តិសុខជាតិយល់ថាកោះសិប្បនិម្មិតនេះអាចនឹងត្រូវប្រទេសចិនប្រើប្រាស់ជាទីតាំងដំឡើងប្រព័ន្ធរ៉ាដាដើម្បីផ្ដល់សញ្ញាព្រមានជាមុននៅពេលមានបញ្ហាមិនប្រក្រតីកើតឡើង។ អ្នកនាំពាក្យក្រសួងការបរទេសវៀតណាម លោកស្រីហ្វាមធូហាង (Pham Thu Hang) ថ្លែងថារដ្ឋាភិបាលរបស់លោកស្រីសូមប្រឆាំងជំទាស់ជាដាច់ខាតចំពោះទង្វើនេះ ព្រមទាំងបានបញ្ជូនកំណត់ទូតដើម្បីបង្ហាញការកើតទុក្ខមិនសុខចិត្ត និងបញ្ជាក់ជាថ្មីនូវការប្រកាន់គោលជំហររបស់ខ្លួននៅក្នុងបញ្ហានេះ។ លោកស្រីថ្លែងបន្ថែមទៀតថាវៀតណាមសូមទាមទារឱ្យបិទបញ្ចប់សកម្មភាពសាងសង់កោះសិប្បនិម្មិតនោះជាបន្ទាន់ ហើយមិនត្រូវឱ្យមានករណីនេះកើតឡើងជាថ្មីទេ។
សូមជម្រាបថាប្រទេសចិនចូលកាន់កាប់ប្រជុំកោះប៉ារ៉ាសែលកាលពីឆ្នាំ១៩៧៤រហូតមកដល់សព្វថ្ងៃ។ កាលណោះ ចិនចូលកាន់កាប់កោះនេះដោយបណ្ដេញកងទ័ពជើងទឹករបស់វៀតណាមខាងត្បូងចេញ។ វៀតណាមចាត់ទុកប្រជុំកោះនេះជារបស់ខ្លួនដែរ។ ដូច្នេះ វៀតណាមនៅរយៈពេលប៉ុន្មានឆ្នាំចុងក្រោយនេះក៏សម្រុករៀបចំជើងព្រួលដើម្បីប្រជែងជាមួយចិនផងដែរ។ វៀតណាមកសាងតំបន់ខ្សែក្រវាត់នៅក្បែរប្រជុំកោះស្ព្រែតលី (Spratly) ដែលស្ថិតនៅចុងប៉ូចខាងត្បូង។ វៀតណាមក៏អះអាងថាប្រជុំកោះស្ព្រែតលី និងដែនសមុទ្រជុំវិញនោះជាដែនអធិបតេយ្យភាពរបស់ខ្លួនផងដែរ។ ក្រៅពីនេះ ប្រទេសដទៃទៀតដូចជាហ្វ៊ីលីពីន ម៉ាឡេ ប្រ៊ុយណេ និងកោះតៃវ៉ាន់សុទ្ធតែអះអាងដូចៗគ្នា។ ដូច្នេះធ្វើឱ្យដែនកោះនេះក្លាយជាតំបន់ត្រួតស៊ីគ្នា។
លោកស្រីហ្វាមធូហាងអះអាងថាវៀតណាមមានភស្តុតាងជាប្រវត្តិសាស្ត្រ និងមានមូលដ្ឋានគតិយុត្តិច្រើនគ្រប់គ្រាន់ដែលបញ្ជាក់ថាប្រជុំកោះប៉ារ៉ាសែលជាដែនអធិបតេយ្យរបស់ខ្លួនដោយអនុលោមទៅតាមច្បាប់អន្តរជាតិ។ លោកស្រីថាវៀតណាមសូមគូសបញ្ជាក់ឡើងវិញថារាល់សកម្មភាពរបស់រដ្ឋបរទេសនៅប្រជុំកោះប៉ារ៉ាសែល រួមទាំងនៅលើកោះបាបា និងនៅតំបន់ថ្មប៉ប្រះទឹកហាយសាម (Hai Sam) សុទ្ធតែបានធ្វើឡើងដោយគ្មានការអនុញ្ញាតយល់ព្រមពីភាគីវៀតណាមទាល់តែសោះ។ ដូច្នេះ លោកស្រីចាត់ទុកថាវាជាទង្វើខុសច្បាប់, មោឃៈ និងគ្មានមូលដ្ឋានគតិយុត្តិនោះឡើយ៕ ប្រភព៖ Reuters
ចែករំលែកព័តមាននេះ