ស្របពេលដំណក់ទឹកភ្លៀង ខ្យល់កន្ត្រាក់ និងផ្គររន្ទះ អាចបន្តកើតមានពី៣០ ទៅ៦០ភាគរយ ក្រសួងធនធានទឹក និងឧតុនិយម បានអះអាងថា កម្រិតកម្ពស់ទឹកនៅស្ថានីយជលសាស្ត្រទន្លេមេគង្គ ទន្លេសាប និងទន្លេបាសាក់ ទឹកបាន និងកំពុងស្រកជាបន្តបន្ទាប់ ។
ប្រភពដដែលបានជូនដំណឹង នៅថ្ងៃទី២៧ ខែសីហា ឆ្នាំ២០២៦ថា កម្រិតកម្ពស់ទឹកនៅស្ថានីយជលសាស្ត្រនៅស្ទឹងត្រែង ក្រចេះ កំពង់ចាម ចតុមុខ អ្នកលឿង កោះខែល ព្រែកក្តាម និងកំពង់លួង គឺស្រកចុះក្រោមបន្ទាត់ក្រហមតាំងអស់នៅថ្ងៃនេះ ហើយនឹងបន្តស្រកចុះបន្ថែមទៀត ។
ជាមួយនឹងការប្រកាសនេះ ក្តីបារម្ភអំពីទឹកជំនន់ទន្លេមេគង្គ ដែលបានកើតមាននៅផ្នែកខ្លះនៃខេត្តស្ទឹងត្រែង ក្រចេះ កំពង់ចាម និងត្បូងឃ្មុំ គឺត្រូវបានបន្ថយ ប៉ុន្តែទោះជាយ៉ាងណាបាតុភូត ភ្លៀង ផ្គររន្ទះ និងខ្យល់កន្ត្រាក់ នៅបន្តកើតមានពី៣០ ទៅ៦០ភាគរយ ។
ប្រភពដដែលបានអះអាងថា តំបន់វាលទំនាបអាចមាន បាតុភូត ភ្លៀង ផ្គររន្ទះ និងខ្យល់កន្ត្រាក់ប្រហែលជា ៣០ភាគរយខ្ពង់រាប ៥០ភាគរយ ហើយនៅតំបន់មាត់សមុទ្រមានដល់ ៦០ភាគរយ ៕
ចែករំលែកព័តមាននេះ