រាជធានីភ្នំពេញ ៖ អគ្គិភ័យបានឆាបឆេះផ្ទះមួយល្វែងបង្កឱ្យអ្នកជិតខាងភិតភ័យយ៉ាង ខ្លាំងរត់ប្រសាចទៅរាយការណ៍ប្រាប់សមត្ថកិច្ច និងស្រែកហៅគ្នាឱ្យជួយ កាលពីវេលាម៉ោង៣និង៣០នាទីរសៀលថ្ងៃទី១០ សីហា ២០១១ នៅតាមផ្លូវលេខ៣៧១ ភូមិត្រពាំងឈូក សង្កាត់ទឹកថ្លា ខណ្ឌសែនសុខ
រាជធានីភ្នំពេញ ៖ អគ្គិភ័យបានឆាបឆេះផ្ទះមួយល្វែងបង្កឱ្យអ្នកជិតខាងភិតភ័យយ៉ាងខ្លាំងរត់ប្រសាចទៅរាយការណ៍ប្រាប់សមត្ថកិច្ច និងស្រែកហៅគ្នាឱ្យជួយ កាលពីវេលាម៉ោង៣និង៣០នាទីរសៀលថ្ងៃទី១០ សីហា ២០១១ នៅតាមផ្លូវលេខ៣៧១ ភូមិត្រពាំងឈូក សង្កាត់ទឹកថ្លា ខណ្ឌសែនសុខ ខណៈម្ចាស់ផ្ទះចាក់សោទុកចោលចេញទៅក្រៅមានកិច្ចការ។
សាក្សីនៅកន្លែងកើតហេតុបាននិយាយជំហានដំបូងថា ការឆាបឆេះនេះបណ្តាលមកពីឆ្លងរងើកភ្លើងធ្យូង ដែលកៀបចេញពីចង្ក្រាន ដាក់ចូលធុងដែក ដើម្បីពន្លត់ ប៉ុន្តែវាមិនរលត់ក៏ឆាបឆេះជះអណ្តាតភ្លើងឡើងបង្កឱ្យភ្ញាក់ផ្អើលតែម្តង។ ឃើញដូច្នេះអ្នកជិតខាង និងសមត្ថកិច្ចបានសម្រចចិត្តវាយកម្ទេចសោដើម្បីបើកទ្វារជះទឹកពន្លត់…ក្រោយពេលបើកសោរួចមកមនុស្សច្រើននាក់ខ្លះទាញទុយោទឹកមកបាញ់ ខ្លះដងទឹកជះយ៉ាងសន្ធាប់ ទើបធ្វើឱ្យភ្លើងអស់អំណាចរលត់សូន្យសុង។ មិនយូរប៉ុន្មាន រថយន្តពន្លត់អគ្គិភ័យរបស់សមត្ថកិច្ចបានមកដល់ បម្រុងបាញ់ទឹកស្រោច ប៉ុន្តែអណ្តាតភ្លើងរលត់អស់ទៅហើយ។ មិនមានការខូចខាតអ្វីធ្ងន់ធ្ងរទេ ក្រៅតែអំពីសម្ភារកំប៉ិកកំប៉ុក និងម៉ូតូសង់កូរ៉េ១គ្រឿងដែលដាក់ទុកក្នុងផ្ទះប៉ុណ្ណោះ ។
បុរសម្ចាស់ផ្ទះឈ្មោះលីន ទ្រី អាយុ៤០ឆ្នាំ ជាអាជីវករលក់ដូរ ស្នាក់នៅផ្ទះលេខ១២E ភូមិត្រពាំងឈូក សង្កាត់ទឹកថ្លា ខណ្ឌសែនសុខ (ផ្ទះឆេះខាលើ)បាននិយាយទាំងអារម្មណ៍ភិតភ័យថា នៅវេលាម៉ោង១២ថ្ងៃត្រង់ រូបលោកបានបង្កាត់ភ្លើងដើម្បីដាំទឹកហូប លុះដាំរួចក៏បានចាប់រងើកភ្លើងចេញពីចង្ក្រានដាក់ចូលធុងដែកមួយ ហើយចាក់ទឹកពន្លត់ លុះឃើញវារលត់ ក៏យកធុងធ្យូងនោះទៅដាក់ក្បែរម៉ូតូសង់កូរ៉េ ពណ៌ក្រហម ១គ្រឿង ដែលទុកចោលក្នុងផ្ទះ។ ភ្លាមនោះ រូបលោកបានបិទទ្វារចាក់សោផ្ទះ ជូនកូនទៅសាលារៀន និងនាំប្រពន្ធទៅមន្ទីរពេទ្យ ដល់ម៉ោង៣និង៥០នាទី ស្រាប់តែអ្នកជិតខាងទូរស័ព្ទប្រាប់ថា ផ្ទះរបស់លោកត្រូវភ្លើងឆេះហើយពួកគាត់សុំវាយកម្ទេចសោទ្វារដើម្បីពន្លត់ភ្លើង។ ឮដូច្នេះលោកបានជិះម៉ូតូមកភ្លាមក៏ឃើញប្រជាពលរដ្ឋក្បែរនោះកំពុងពន្លត់ភ្លើងដែលកំពុងឆេះម៉ូតូនៅក្នុងផ្ទះ…តាមពិតគឺឆេះដោយសារភ្លើងធ្យូង។
នៅកន្លែងកើតហេតុ គេឃើញលោកជា ខេមា អភិបាលរងខណ្ឌសែនសុខ បានចុះមកពិនិត្យមើលផ្ទាល់រួមជាមួយអាជ្ញាធរមូលដ្ឋានជាច្រើននាក់ ។ លោកជា ខេមា បានឱ្យដឹងថា មូលហេតុភ្លើងឆេះនេះគឺមកពីម្ចាស់ផ្ទះធ្វេសប្រហែសពេក ទើបមានរឿងរ៉ាវនេះកើតឡើង។ ក្រោយពីទទួលព័ត៌មានថាមានភ្លើងឆេះផ្ទះនោះ លោកក៏បានបញ្ជាសមត្ថកិច្ចឱ្យចុះមកអន្តរាគមន៍ភ្លាម៕
ចែករំលែកព័តមាននេះ