ក្រុងប៉ោយប៉ែត ៖ នៅវេលាម៉ោង១០ និង៣០នាទីព្រឹកថ្ងៃទី១០ សីហា សមត្ថកិច្ចដឹកនាំដោយលោកវរសេនីយ៍ទោម៉ែន ភិរម្យ មេបញ្ជាការរងកងរាជអាវុធហត្ថខេត្តបន្ទាយមានជ័យ និងលោកវរសេនីយ៍ត្រីហម ម៉ុត មេបញ្ជាការកងរាជអាវុធហត្ថក្រុងប៉ោយប៉ែត ព្រមទាំងមានការចូលរួមដោយលោក
ក្រុងប៉ោយប៉ែត ៖ នៅវេលាម៉ោង១០ និង៣០នាទីព្រឹកថ្ងៃទី១០ សីហា សមត្ថកិច្ចដឹកនាំដោយលោកវរសេនីយ៍ទោម៉ែន ភិរម្យ មេបញ្ជាការរងកងរាជអាវុធហត្ថខេត្តបន្ទាយមានជ័យ និងលោកវរសេនីយ៍ត្រីហម ម៉ុត មេបញ្ជាការកងរាជអាវុធហត្ថក្រុងប៉ោយប៉ែត ព្រមទាំងមានការចូលរួមដោយលោកផាន់ ភារម្យ ព្រះរាជអាជ្ញារងខេត្តបានឆែកឆេរទីតាំងសង្ស័យជួញដូរគ្រឿងញៀនមួយលាក់ខ្លួននៅក្រោមស្លាកយីហោគន្ធាកែសម្ផស្សបុរសនារីទាន់សម័យ ស្ថិតក្នុងភូមិក្បាលស្ពាន សង្កាត់ប៉ោយប៉ែត ។
កងរាជអាវុធហត្ថឱ្យដឹងថា នៅពេលសមត្ថកិច្ចបង្ក្រាបបទល្មើសគ្រឿងញៀននេះ បានឃាត់ខ្លួនបុរសសង្ស័យឈ្មោះអាយ ចិត្រា ហៅម៉ាប់ អាយុ៣៥ឆ្នាំ និងដកហូតថ្នាំញៀនប្រភេទខេទឹកកកចំនួន១៩កញ្ចប់តូចពណ៌ស រួមទាំងវត្ថុតាងថង់តូចៗសំរាប់វេចខ្ចប់ និងឧបករណ៍សម្រាប់ជក់ថ្នាំញៀនមួយចំនួនទៀតនៅក្នុងផ្ទះរបស់ជនសង្ស័យនេះ។
លោកវរសេនីយ៍ទោ ម៉ែន ភិរម្យ ឱ្យដឹងថា ការចាប់ខ្លួនជនសង្ស័យជួញដូរថ្នាំញៀននេះ តាមបទបញ្ជារបស់លោកឧត្តមសេនីយ៍មេបញ្ជាការប៉េអឹមខេត្តឱ្យសមត្ថកិច្ចក្រោមឱវាទយកចិត្តទុកដាក់ទប់ស្កាត់រាល់បទល្មើសទាំងឡាយដែលកើតមាន និងជាពិសេសនោះគឺបទល្មើសគ្រឿងញៀននិងដើម្បីឱ្យភូមិ-ឃុំមានសុវត្ថិភាពស្របតាមអនុសាសន៍របស់ប្រមុខរាជរដ្ឋាភិបាល។ ចំពោះជនសង្ស័យត្រូវសមត្ថកិច្ចបញ្ជូនទៅតុលាការខេត្តភ្លាម។
ដោយឡែកកាលពីរសៀលថ្ងៃទី៦ សីហា ប៉ូលិសក្រុងប៉ោយប៉ែតបានឃាត់ខ្លួនយុវជនម្នាក់ពីបទសេពថ្នាំញៀនខុសច្បាប់។ សមត្ថកិច្ចឱ្យដឹងថា យុវជននោះឈ្មោះរ៉ន រ៉េត អាយុ២៧ឆ្នាំ រស់នៅភូមិក្បាលស្ពាន សង្កាត់ប៉ោយប៉ែតឃាត់ខ្លួននៅក្នុងបន្ទប់ជួលរបស់គេនៅពេលកំពុងប្រើប្រាស់ថ្នាំញៀន។
សមត្ថកិច្ចប៉ូលិសបញ្ជាក់ថា នៅពេលដែលចាប់ខ្លួនជននោះដកហូតវត្ថុតាងបំពង់សម្រាប់សេពថ្នាំញៀន និងដែកកេស រួមទាំងឧបករណ៍សម្រាប់ប្រើប្រាស់មួយចំនួនទៀត។
លោកវរសេនីយ៍ត្រីអ៊ុំ សុផល អធិការក្រុងប៉ោយប៉ែតឱ្យដឹងថា រ៉ន រ៉េត និងវត្ថុតាងត្រូវសមត្ថកិច្ចកសាងសំណុំរឿងបញ្ជូនទៅតុលាការ ៕
ចែករំលែកព័តមាននេះ