ទីផ្សារសត្វកណ្ដុរអាំងនៅផ្សារអូរតាគីតម្លៃនៅស្ថិរ តែអតិថិជនថយចុះខ្លាំង
- បាត់ដំបង
ខេត្តបាត់ដំបង ៖ ធ្លាប់តែមានអតិថិជនចោមរោមអ៊ូអរប្រជ្រៀតគ្នាទិញសត្វកណ្ដុរអាំងដ៏ឈ្ងុយឆ្ងាញ់ នៅផ្សារកណ្ដុរអាំង «អូរតាគី» ហូរហែមិនដាច់ ចាប់តាំងពីព្រលឹមរហូតដល់យប់ជ្រៅ ប៉ុន្តែនោះគឺជាទិដ្ឋភាពកាលពីជិត១០ឆ្នាំមុន ។ បច្ចុប្បន្ន «ផ្សារលក់កណ្ដុរអាំងអូរតាគី» ហាក់ស្ថិតក្នុងស្ថានភាពស្ងប់ស្ងាត់ ទាំងអតិថិជន ទាំងអ្នកដំណើរលើដងផ្លូវជាតិលេខ៥ ។
តម្លៃលក់លើទីផ្សារសព្វថ្ងៃ សត្វកណ្ដុរអាំងនៅ «អូរតាគី» តែរក្សាបានតំលៃស្ថិរដដែល តែអតិថិជនដែលនិយមទិញហូប ហាក់ថយចុះយ៉ាងខ្លាំង ។ មានហេតុផលមួយចំនួន ដែលនាំឲ្យអតិថិជនថយចុះ ។ នេះបើតាមការលើកឡើងពីអ្នកលក់កណ្ដុរអាំងចាស់វស្សានៅ«អូរតាគី» ដែលបានត្អូញត្អែរប្រាប់កោះសន្តិភាពនៅព្រឹកថ្ងៃទី២៥ សីហា នេះ ។ អ្នកលក់កណ្ដុរអាំង«អូរតាគី» រូបនេះបាននិយាយថា ពីមួយឆ្នាំទៅមួយឆ្នាំ អតិថិជនដែលនិយមទទួលទានកណ្ដុរអាំងនៅ «ផ្សារកណ្ដុរអាំងអូរតាគី» ហាក់ថមថយបន្តិចម្ដងៗ រហូតមកទល់នឹងសព្វថ្ងៃនេះ ។
ពោល៖ ចាប់តាំងពីជំនាន់កើត «កូវីដ១៩» រហូតមក ប៉ុន្តែតម្លៃទីផ្សារ «កណ្ដុរអាំង» នៅតែរក្សាបានស្ថិរដដែល ។ គាត់បានរំលឺកដោយភ្ជាប់ទៅនឹងអតីតកាល កាលពីជិត១០ឆ្នាំមុនដូច្នេះថា «កាលពីជិត១០ឆ្នាំមុន ខ្ញុំធ្លាប់លក់មួយថ្ងៃ យ៉ាងហោចណាស់ក៏អស់ចន្លោះពី៧០គីឡូ ទៅ១០០គីឡូក្រាមដែរ ។ ប៉ុន្តែចំនួននេះ ហាក់ថយចុះពីមួយឆ្នាំទៅមួយឆ្នាំ ចាប់តាំងពីជំងឺកូវីដ១៩ ហើយថយចុះរហូតមកដល់សព្វថ្ងៃនេះ ខ្ញុំលក់មួយថ្ងៃអស់យ៉ាងច្រើនចន្លោះពី៥ ទៅ៦គីឡូក្រាមប៉ុណ្ណោះ» ។
ចាប់តាំងពីព្រឹកព្រលឹម គេឃើញផ្សែងចាប់ផ្ដើមហុយទ្រលោមជះក្លិនដ៏ឈ្ងុយឆ្ងាញ់ហោះចេញពីចង្ក្រានអាំងកណ្ដុរនៅ «អូរតាគី» ឆ្លងទៅម្ខាងនៃថ្នល់ជាតិលេខ៥ ។ ប៉ុន្តែយូរៗម្ដង ទើបគេឃើញមានអ្នកដំណើរឆ្លងកាត់ បានឈប់រថយន្ត ឬម៉ូតូចុះទិញកណ្ដុរអាំង ដែលនៅសេសសល់ត្រឹប៉ុន្មានតូបប៉ុណ្ណោះ ។
អ្នកលក់កណ្ដុរអាំងបានបញ្ជាក់ដែរថា តំលៃកណ្តុរអាំងនៅតែដដែល ដែលលក់ក្នុងតម្លៃចន្លោះពី៣,០០០រៀល ដល់តម្លៃ១០,០០០រៀល ទៅតាមតូចឬធំ ប៉ុន្តែនៅពេលថយចុះអតិថិជនបែបនេះ ទើបការលក់កណ្ដុរអាំងក៏ថយចុះច្រើនដែរ ។ ម្យ៉ងវិញទៀត អ្នកលក់កណ្ដុរអាំងនាសព្វថ្ងៃនេះ មានច្រើនកន្លែងណាស់ ។ ដូចជានៅតាមដងផ្លូវជាតិលេខ៥៧ នៅម្ដុំភូមិគោកពន្លៃ សង្កាត់អូរម៉ាល់ ក្រុងបាត់ដំបង (ផ្លូវទៅភ្នំដសំពៅ) ជាដើម គឺមានអ្នកលក់ច្រើន ព្រោះនៅលើដងផ្លូវនោះ សំបូរអ្នកដំណើរដើរកម្សាន្តច្រើន រៀងរាល់ថ្ងៃចុងសប្ដាហ៍ ។
បើតាមសង្កេតផ្ទាល់ អ្នកលក់កណ្ដុរអាំងនៅម្ដុំភូមិគោកពន្លៃ មានប្រហែលជិត២០ទីតាំង ហើយពួកគេទើបចាប់ផ្ដើមលក់នាប៉ុន្មានឆ្នាំចុងក្រោយនេះ ។ អ្នកស្រី ហុក ញ៉ាញ់អ្នកលក់កណ្ដុរអាំងម្នាក់នៅភូមិគោកពន្លៃបាននិយាយថា អ្នកលក់កណ្ដុរអាំងដំបូងៗ នៅភូមិគោកពន្លៃ លក់ដាច់គួរសម ។ គាត់បានបញ្ជាក់ប្រាប់ដូច្នេះថា «កាលខ្ញុំលក់ដំបូងៗមួយថ្ងៃលក់អស់យ៉ាងតិចចន្លោះពី៤០ ទៅ៤៥គីឡូក្រាម ។ ប៉ុន្តែសព្វថ្ងៃ ថយចុះស្ទើរពាក់កណ្ដាល ក្រោយពីលិចឭថា មានផ្ទុះជំងឺម្យ៉ាងដែលឆ្លងពីសត្វកណ្ដុរ តែឥឡូវហាក់លក់ដាច់ឡើងវិញបន្តិចហើយ ។ មួយថ្ងៃ ខ្ញុំលក់អស់ប្រហែលពី២០ ទៅ២៥គីឡូក្រាមដែរក្នុងមួយថ្ងៃ» ។
«កណ្ដុរ» គឺជាសត្វម្យ៉ាងដែលមនុស្សម្នាចាត់ទុកថា ជាប្រភេទសត្វ«ចង្រៃ» ដែលពូកែបំផ្លាញផលដំណាំ ឬទ្រព្យសម្បត្តិនានា ដែលទុកនៅក្នុងផ្ទះ ។ មនុស្សស្អប់សត្វកណ្ដុរនេះណាស់ ។ មួយថ្ងៃៗ មនុស្សភាគច្រើន តែងតែរិះរកវិធីកម្ទេចផ្ដាច់ពូជឲ្យអស់នូវហ្វូងសត្វកណ្ដុរចង្រៃនេះ ។ គេមិនធ្លាប់ឃើញមនុស្សសម័យមុនៗ ចាប់សត្វកណ្ដុរចង្រៃនេះយកទៅអាំង ទៅខ្វៃ ធ្វើជាចំណីអាហារទេ ។ ផ្ទុយទៅវិញ មនុស្សក្នុងសម័យទំនើប និងដ៏ស៊ីវិល័យនេះ បែរជាចាត់ទុកសត្វកណ្ដុរចង្រៃជាគ្រឿងក្លែមដ៏ពេញនិយម និងយ៉ាងឈ្ងុយឆ្ងាញ់ ពេលឃើញដាក់អាំងលើចង្ក្រានស្ទើរស្រក់ទឹកមាត់ទៅវិញ។
បើតាមការកត់សម្កាល់ តាមរយៈអ្នកប្រកបមុខរបរអាំងសត្វកណ្ដុរលក់នាបច្ចុប្បន្ននេះ សត្វកណ្ដុរដែលមនុស្សសម័យដើមចាត់ទុកជាពពួកសត្វ «ចង្រៃ» បំផ្លាញតែផលដំណាំនិងព្រទ្យសម្បត្តិនៅតាមផ្ទះសម្បែងគួរឲ្យស្អប់បំផុតនោះ ឥឡូវត្រូវបានមនុស្សសម័យថ្មី ចាត់ទុកជាសត្វដ៏គួរឲ្យស្រលាញ់ ពេញនិយមបំផុត ពេលត្រូវបានគេដាក់អាំងនៅលើចង្ក្រាន ។ ជាពិសេស ហ្វូងសត្វចង្រៃនេះ បានផ្ដល់ផលចំណូលយ៉ាងច្រើនដល់អ្នកដើររុករកយកមកលក់ និងអ្នកប្រកបរបរអាំងកណ្ដុរលក់លើទី
ផ្សារ ៕
ចែករំលែកព័តមាននេះ