ទឹកទន្លេហក់ឡើងបុ.កបាក់ច្រាំងនៅស្រុកក្រូចឆ្មារ ប៉ះពាល់ពលរដ្ឋជិត ៣០ខ្នង ត្រូវបានប.ង្ខំចិត្តរុះរើជាបន្ទាន់
- ត្បូងឃ្មុំ
ខេត្តត្បូងឃ្មុំ ៖ ច្រាំងទន្លេនៅតែបន្តបាក់រាល់ថ្ងៃនៅចំណុចក្បាលកោះក្នុងភូមិកោះបីពៃ ឃុំកោះពីរ ស្រុកក្រូចឆ្មារ ក្នុងរដូវវស្សាខណៈទឹកទន្លេបានហក់ឡើងរាល់ថ្ងៃ។ ផ្ទះក្បឿងតូចធំម្នាក់ៗភ័យព្រលឹងនៅចុងសក់ស្ទើរតែរុះរើមិនទាន់ដែលមកដល់ពេលនេះគឺផ្ទះជិត ៣០ខ្នងហើយត្រូវបានរុះទៅកន្លែងសុវត្ថិភាពឆ្ងាយពីច្រាំងទន្លេ។
លោកខូវ អ៊ មេឃុំកោះពីរ មានប្រសាសន៍ឲ្យដឹងមានល្ងាចថ្ងៃទី២៤ ខែសីហា ឆ្នាំ២០២៤ថា: ទឹកទន្លេនៅឆ្នាំនេះមានសភាពប្លែកជាងបណ្ដាឆ្នាំណាៗទាំងអស់ដោយចរន្តទឹកបានហូរបុកចំក្បាលកោះ ជាហេតុបណ្ដាលឱ្យបាក់ច្រាំងរាល់ថ្ងៃ សូម្បីតែផ្លូវបេតុងប្រើប្រាស់មូលនិធិឃុំប្រវែងជាង១០០ ម៉ែត្រ ត្រូវបានបាក់ស្រុតចូលទៅក្នុងទន្លេហើយលំនៅឋានពលរដ្ឋនៅកោះបីពៃ
ត្រូវបានបង្ខំចិត្តរុះរើជាបន្ទាន់ បើពុំនោះទេនឹងត្រូវធ្លាក់ចូលទៅក្នុងទឹកទន្លេជាមិនខាន។
លោកមេឃុំកោះពីរ បានបន្តឲ្យដឹងទៀតថាក្នុងរយៈពេលបីថ្ងៃចុងក្រោយនេះគឺច្រាំងទន្លេបានបាក់ខ្លាំងធ្វើឲ្យប៉ះពាល់លំនៅឋានពលរដ្ឋ ដោយក្នុងនោះបានកើនឡើងដល់ចំនួន២៩ខ្នងស្មើ២៩ ម្ចាស់ ត្រូវបានរុះរើទាន់ពេលវេលា ។
ហើយមានគ្រួសារខ្លះដែលមិនមានដីសម្រាប់សង់លំនៅឋានបានលក់ផ្ទះឈើបួនទៅប្រាំខ្នងឲ្យទៅអ្នកដទៃដោយក្នុងមួយខ្នងលក់បានជាង១០០០ដុល្លារ ហើយសមាជិកគ្រួសារខ្លះត្រូវបានបង្ខំចិត្តចាកចេញពីស្រុកកំណើតទៅរស់នៅជាមួយកូនៗនៅខេត្តដទៃឆ្ងាយពីខេត្តត្បូងឃ្មុំ ។ ក្រៅពីនេះក៏មានលំនៅដ្ឋានចំនួន២៦ខ្នងទៀត បានត្រៀមលក្ខណៈក្នុងការរុះមិនថាថ្ងៃឬយប់នោះទេ អាជ្ញាធរមូលដ្ឋានមាន នគរបាលប្រជាការពារ កងរាជអាវុធហត្ថ បានត្រៀមកម្លាំងដើម្បីជួយដល់ពលរដ្ឋ។
លោកមេឃុំកោះពីរបញ្ជាក់ថា ដោយសារតែគ្រោះធម្មជាតិបាក់ច្រាំងអាជ្ញាធរបានស្នើសុំមកថ្នាក់ស្រុក ខេត្តនិងក្រសួងហិរញ្ញវត្ថុ នៅក្នុងឆ្នាំ២០២៧ និងមានគម្រោងសម្រាប់ជួសជុលច្រាំងទន្លេដែលបានបាក់ស្រុត។ចាប់តាំងពីពេលដែលទឹកឡើងមកនៅកោះពីរនេះសរុបច្រាំងដែលបាក់ចូលខ្ទង់រយម៉ែត្រមកក្នុង គឺបានបាក់មកដល់ត្រង់ផ្នែកកណ្ដាលកោះ ក្នុងនាមអាជ្ញាធរមូលដ្ឋានគឺបានត្រៀមលក្ខណៈសម្បត្តិគ្រប់បែបយ៉ាងដើម្បីជួយអន្តរាគមន៍ដល់ប្រជាពលរដ្ឋគ្រប់ពេល។
សូមបញ្ជាក់ថាក្នុងពេលថ្មីៗនេះលោកឧត្តមសេនីយ៍ស្នងការនគរបាលខេត្តត្បូងឃ្មុំបានដឹកនាំកម្លាំងចុះជួយរុះរើលំនៅដ្ឋានពលរដ្ឋផងដែរ ៕
ចែករំលែកព័តមាននេះ