ខេត្តក្រចេះ ៖ ប៉ូលិសបានចាប់បញ្ជូនខ្លួនបុរសជនជាតិចិនម្នាក់ដែលអះអាងថា ជាបុគ្គលិករបស់ក្រុមហ៊ុនវិនិយោគតុងមិន និងបុរសជនជាតិខ្មែរម្នាក់ជាម្ចាស់រថយន្តទៅកាន់សាលាដំបូងខេត្ត ដើម្បីចាត់វិធានការបន្តក្រោយពីប៉ូលិសបានឃាត់ខ្លួនពួកគេ ខណៈពេលកំពុងធ្វើសកម្មភាពដឹករំសេវ និងឧបករណ៍គ្រឿងផ្ទុះចំនួន
ខេត្តក្រចេះ ៖ ប៉ូលិសបានចាប់បញ្ជូនខ្លួនបុរសជនជាតិចិនម្នាក់ដែលអះអាងថា ជាបុគ្គលិករបស់ក្រុមហ៊ុនវិនិយោគតុងមិន និងបុរសជនជាតិខ្មែរម្នាក់ជាម្ចាស់រថយន្តទៅកាន់សាលាដំបូងខេត្ត ដើម្បីចាត់វិធានការបន្តក្រោយពីប៉ូលិសបានឃាត់ខ្លួនពួកគេ ខណៈពេលកំពុងធ្វើសកម្មភាពដឹករំសេវ និងឧបករណ៍គ្រឿងផ្ទុះចំនួនជិត១តោនកន្លះ ដោយគ្មានលិខិតអនុញ្ញាតត្រឹមត្រូវ។
ការបញ្ជូនខ្លួនបុរសទាំងពីនាក់នេះ បានធ្វើឡើងកាលពីព្រឹកថ្ងៃទី១០ សីហា ក្រោយពីកម្លាំងនគរបាលក្រុមពិនិត្យអាវុធជាតិផ្ទុះបានចាប់ឃាត់រថយន្តកូរ៉េ១គ្រឿងម៉ាកហ៊ីយ៉ាន់ដាយ ចំណុះពីរតោនពាក់ស្លាកលេខ រ.០១២២ ភព៣ ដែលមានផ្ទុកសុទ្ធតែរំសេវ និងគ្រឿងផ្ទុះមានចំនួនជាងមួយតោន កាលពីយប់ថ្ងៃទី៤ សីហា នៅចំណុចក្បាលស្ពានពាមទេ ក្រុងក្រចេះ។
បុរសទាំងពីរនាក់ដែលប៉ូលិសបានបញ្ជូនខ្លួនទៅកាន់សាលាដំបូងខេត្តនាព្រឹកនោះម្នាក់ឈ្មោះ ឈិន ស៊ីន អាយុ៥១ឆ្នាំ ជនជាតិចិន កាន់លិខិតឆ្លងដែនលេខ G 33537965 ចុះថ្ងៃទី១៦ មីនា ឆ្នាំ២០០៩ ជាកម្មករក្រុមហ៊ុនចិនឈ្មោះ «ចាវ ស៊ាន» ដែលមានអាសយដ្ឋានផ្ទះលេខ៣៣ ផ្លូវលេខ៤៧២ សង្កាត់ទួលទំពូង២ ខណ្ឌចំការមន រាជធានីភ្នំពេញ រីឯម្នាក់ទៀតឈ្មោះឈៀក គឹមលាង អាយុ៤៣ឆ្នាំ មានទីលំនៅភូមិជ្រោយថ្មក្រោម ឃុំឆ្លូង ស្រុកឆ្លូង ខេត្តក្រចេះ ជាអ្នកបើកបរ និងជាម្ចាស់រថយន្តខាងលើ។
លោកវរសេនីយ៍ឯក ច្រឹង ផល្លី ស្នងការរង និងជាប្រធានការិយាល័យកណ្តាលស្ថិតិអគ្គិភ័យបានមានប្រសាសន៍ថា កាលពីយប់ថ្ងៃទី៤ សីហា កម្លាំងនគរបាលបានធ្វើការចាប់ឃាត់រថយន្ត១គ្រឿងនេះ និងបានឆែកឆេររកឃើញមានដឹករំសេវគ្រឿងផ្ទុះមួយចំនួនធំ។ គ្រឿងផ្ទុះទាំងនោះ រួមមានរំសេវប្រភេទ TAN អឹមម៉ាស់ហ្សិន ចំនួន៥៦កេស ស្មើនឹង១.៣៥៨គីឡូក្រាម គីបអគ្គិសនី N8 ចំនួន៧០៨គីប និងខ្សែឆ្នួនផ្ទុះទម្ងន់៥គីឡូក្រាម ដែលឧបករណ៍គ្រឿងផ្ទុះទាំងនេះពួកគេបានដឹកជញ្ជូនដោយគ្មានច្បាប់អនុញ្ញាតឱ្យប្រើប្រាស់ និងគ្មានលិខិតដឹកជញ្ជូនត្រឹមត្រូវ ដោយគ្រាន់តែបុរសជនជាតិចិនរូបនេះ អះអាងប្រាប់សមត្ថកិច្ចថា ដឹកចេញពីក្រុមហ៊ុនវិនិយោគតុងមិន យកទៅស្រុកឆ្លូង ខេត្តក្រចេះ។
ក្រោយពីត្រូវចាប់ឃាត់ រថយន្ត និងរំសេវ នោះត្រូវបានដឹកយកមករក្សាទុកនៅស្នងការដ្ឋាននគរបាលខេត្ត ហើយបុរសទាំងពីរនាក់នោះក៏ត្រូវបានឃាត់ខ្លួនជាបណ្តោះអាសន្នដែរ។ លុះដល់ព្រឹកថ្ងៃទី៦ សីហា សមត្ថកិច្ចបានសហការជាមួយនឹងប៉ូលិសនាយកដ្ឋានគ្រប់គ្រងអាវុធជាតិផ្ទុះចុះទៅពិនិត្យដល់កន្លែងស្តុក និងប្រើប្រាស់រំសេវជាតិផ្ទុះក្នុងបរិវេណក្រុមហ៊ុន «តុងមិន» នៅចំណុចគីឡូម៉ែត្រលេខ៣៣ របស់ក្រុមហ៊ុនឈ្មោះ ZHAO XUAN CONSTRUC-TION ENGINEERING GROUP CO.,LTD (ចាវ ស៊ាន) ជាប់ព្រំប្រទល់ខេត្តក្រចេះ និងខេត្តមណ្ឌលគិរី។ នៅក្នុងទីតាំងខាងលើឃើញមានបន្សល់បង្គោលសម្រាប់សង់រោងឱ្យកម្មករស្នាក់នៅបំបែកថ្ម១កន្លែង និងនៅក្បែរនោះមានតម្រៀបកូនឈើធ្វើជាកំណល់សម្រាប់កល់រំសេវមួយកន្លែងជាប់នឹងចិញ្ចើមផ្លូវ មិនស័ក្តិសមជាកន្លែងរក្សាទុកនូវរំសេវផ្ទុះមានទម្ងន់រាប់តោនឡើយ។
តំណាងក្រុមហ៊ុនតុងមិន បានធ្វើការបដិសេធថា សម្ភារគ្រឿងផ្ទុះទាំងនេះគឺមិនមានជាប់ពាក់ព័ន្ធនឹងក្រុមហ៊ុននោះទេ ហើយបុរសជាជនជាតិចិនឈ្មោះឈិន ស៊ីង អាយុ៥១ឆ្នាំ នេះគឺគ្រាន់តែជាបុគ្គលិករបស់ក្រុមហ៊ុនចាវ ស៊ាន ដែលទទួលម៉ៅការធ្វើផ្លូវប៉ុណ្ណោះ។
តាមចម្លើយរបស់បុរសជនជាតិចិនឈ្មោះឈិន ស៊ីន បានឱ្យដឹងថា កាលពីថ្ងៃទី១៣ ខែឧសភា ឆ្នាំ២០១១ ខ្លួនបានទទួលម៉ៅការធ្វើប្រឡាយទឹកនិងបន្ទប់ទឹកឱ្យក្រុមហ៊ុនចាវ ស៊ាន នៅក្នុងបរិវេណក្រុមហ៊ុនតុងមិន ដោយចំណាយពេល៤៥ថ្ងៃ។ រហូតដល់ថ្ងៃទី១ សីហា ឆ្នាំ២០១១ ក្រុមហ៊ុនចុងដាន បានជួលឱ្យទៅបំបែកថ្មនៅចំណុចគីឡូម៉ែត្រលេខ៣៣ ក្នុងបរិវេណក្រុមហ៊ុនតុងមិន ។ ប៉ុន្តែដោយភ្លៀងខ្លាំងពេកធ្វើការមិនកើត ខ្លួនក៏ជួលរថយន្តដឹករំសេវទៅកាន់ស្រុកឆ្លូង នៅពេលដឹកមកដល់ចំណុចស្ពានពាមទេ ក៏ត្រូវសមត្ថកិច្ចចាប់ឃាត់តែម្តង ដោយសារការដឹកជញ្ជូនពុំមានលិខិតអនុញ្ញាត។
នៅព្រឹកថ្ងៃទី៥ សីហា ក្រុមហ៊ុន ZHAO XUAN CONSTRUCTION ENGINEERING GROUP CO.,LTD (ចាវ ស៊ាន) បានយកឯកសារមួយចំនួនមកបង្ហាញ។ នៅក្នុងឯកសារនោះគឺមានលិខិតអនុញ្ញាតឱ្យក្រុមហ៊ុនខាងលើដែលមានអាសយដ្ឋានផ្ទះលេខ៣៣ ផ្លូវលេខ៤៧២ សង្កាត់ទួលទំពូង២ ខណ្ឌចំការមន រាជធានីភ្នំពេញ ធ្វើអាជីវកម្ម សេវាកម្មបំផ្ទុះថ្មនៅក្នុងឃុំសំបុក និងឃុំចង្រ្កង់ ស្រុកក្រចេះ ខេត្តក្រចេះ ហើយលិខិតអនុញ្ញាតនេះឱ្យប្រើប្រាស់រំសេវគ្រឿងផ្ទុះចេញដោយអគ្គនាយកដ្ឋានសម្ភារបច្ចេកទេសនៃក្រសួងការពារជាតិ។
មានការកត់សម្គាល់ថា លិខិតអនុញ្ញាតនេះ គឺសម្រេចឱ្យក្រុមហ៊ុននេះធ្វើសេវាកម្មបំផ្ទុះថ្មនៅក្នុងឃុំសំបុក និងឃុំចង្រ្កង់ ស្រុកក្រចេះ ប៉ុន្តែជនជាតិចិនរូបនេះ បានយកទៅធ្វើអាជីវកម្មនៅក្នុងក្រុមហ៊ុនតុងមិនដែលមានទីតាំងស្ថិតនៅក្នុងឃុំក្បាលដំរី ស្រុកសំបូរ ខុសពីទីតាំងក្នុងលិខិតអនុញ្ញាតទៅវិញ៕
ចែករំលែកព័តមាននេះ