ជំទាវបណ្ឌិត ពេជ ចន្ទមុន្នី ហ៊ុនម៉ាណែត បន្តផ្តល់ផ្ទះថ្មីចំនួន៦បន្ថែមទៀត ជូនដល់គ្រួសារវិរៈកងទ័ពពលី ក្នុងខេត្តកំពង់ស្ពឺ
- កំពង់ស្ពឺ
ខេត្តកំពង់ស្ពឺ៖ នៅថ្ងៃទី២០ ខែសីហា ឆ្នាំ២០២៦ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ស្ត្រីទី១នៃកម្ពុជា បានអញ្ជើញប្រគល់ផ្ទះថ្មីចំនួន៦ខ្នងដែលជាអំណោយដ៏ថ្លៃថ្លារបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ដល់គ្រួសារវិរកងទ័ពដែលបានពលីក្នុងបុព្វហេតុជាតិ មាតុភូមិកំពុងរស់នៅក្នុងស្រុកបសេដ្ឋ ស្រុកសំរោងទង ក្រុងឧដុង្គម៉ែជ័យនិងស្រុកថ្ពងនៃខេត្តកំពង់ស្ពឺ។ក្នុងពិធីប្រគល់ផ្ទះនោះក៏បានការអញ្ជើញចូលរួមអមដំណើរពីសំណាក់លោក ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺនិងប្រតិភូជាច្រើននាក់ផងដែរ។
លោកជំទាវបណ្ឌិត ពេជ ចន្ទមុន្នី បានពាំនាំប្រសាសន៍ចូលរួមរំលែកមរណទុក្ខដ៏សោកសង្រេងបំផុត រួមជាមួយប្រសាសន៍សួរសុខទុក្ខដោយក្តីបារម្ភពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា រួមទាំងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ជូនដល់ក្រុមគ្រួសារនៃសពផងដែរ។
ក្នុងនោះលោកជំទាវក៏បានណែនាំនិងផ្តាំផ្ញើដល់គ្រួសារនៃសពវិរកងទ័ពឱ្យខិតខំប្រឹងប្រែងក្នុងការដាំដុះ ចិញ្ចឹមសត្វ ដើម្បីផ្គត់ផ្គង់ជីវភាពបន្ថែម លើសពីនេះត្រូវបញ្ជូនកូនៗឱ្យចូលសិក្សារៀនសូត្រឱ្យបានគ្រប់គ្នា ដោយលោកជំទាវ បានធានាក្នុងការជួយមើលថែទាំ ការផ្ដល់ឱកាសការងារ ឬការជំរុញឱ្យមានជំនាញវិជ្ជាជីវៈ។ទន្ទឹមនោះសម្រាប់កូនៗ លោកជំទាវនឹងជួយឱ្យពួកគេបានចូលបម្រើកងទ័ព ពេលដែលពួកគេធំនិងបានរៀនសូត្រចប់ នេះប្រសិនជាពួកគេចង់។
បន្ថែមពីនោះ លោកជំទាវស្ត្រីទី១ បានជំរុញនិងផ្ដាំផ្ញើដល់លោក ជាម ច័ន្ទសោភ័ណ អភិបាលខេត្តកំពង់ស្ពឺ បន្តចុះសួរសុខទុក្ខ និងយកចិត្តទុកដាក់នៅពេលមានជំងឺឈឺថ្កាត់ ជាងនេះត្រូវយកចិត្តទុកដាក់ណែនាំពួកគេ ឱ្យទៅរកសេវាសុខាភិបាល ហើយលោកជំទាវបានអះអាងថា រាជរដ្ឋាភិបាល ថ្នាក់ដឹកនាំជាតិមិនបោះបង់ឬទុកពួកគេឱ្យនៅឯកោនោះទេ។
សូមបញ្ជាក់ផងដែរថា ជាការគិតគូរដល់ស្ថានភាពជីវិតរបស់វីរកងទ័ពរួមទាំងក្រុមគ្រួសារ សម្តេចធិបតី បានដាក់ចេញនូវគោលនយោបាយ និងយន្តការជាច្រើនដើម្បីជួយសម្រួលដល់ក្រុមគ្រួសាររបស់យុទ្ធជនពលីដូចជាផ្តល់ការណែនាំឱ្យប្រកបមុខរបរចិញ្ចឹមជីវិត ការស្រោចស្រង់សមាជិកគ្រួសារ ការផ្តល់អាហារូបករណ៍ដល់កូនៗបានសិក្សាកម្រិតបរិញ្ញាបត្រ ការរៀបចំឥណទានសារជាថ្មី ការជួយសម្រួលដល់ការផ្ទេរប័ណ្ណកម្មសិទ្ធិដោយមិនគិតកម្រៃសេវា រួមទាំងការប្រគល់ជូននូវមេដាយកិត្តិយសដល់វីរកងទ័ពដែលបានប្រយុទ្ធដោយផ្ទាល់ក្នុងសមរភូមិការពារទឹកដី។ ជាលទ្ធផល ក្រុមគ្រួសាររបស់វីរកងទ័ពបានប្រកបរបរចិញ្ចឹមជីវិតយ៉ាងរីកចម្រើន បានរៀបចំទុកដាក់ផ្ទះសម្បែងដោយមានការដាំដំណាំជាច្រើនមុខនៅជុំវិញផ្ទះ និងថែមទាំងបានបញ្ជូនកូនចៅទៅរៀនសូត្រគ្រប់ជ្រុងជ្រោយផងដែរ។
សូមបញ្ជាក់ថាក្រៅពីផ្តល់ផ្ទះថ្មី៦ខ្នងដល់គ្រួសារវិរកងទ័ពពលី លោកជំទាវបណ្ឌិត ពេជ ចន្ទមុន្នី ស្ត្រីទី១នៃកម្ពុជា ក៏បានចែកជូននូវគ្រឿងឧបភោគ បរិភោគ និងសម្ភារៈប្រើប្រាស់បន្ថែមផងដែរ៕
ចែករំលែកព័តមាននេះ