អ្នកនាំពាក្យ៖ ពិភពលោកមិននៅស្ងៀមឡើយ ចំពោះការឈ្លានពានកាន់កាប់ទឹកដីកម្ពុជាដោយខុសច្បាប់ពីសំណាក់កងកម្លាំងថៃ
- ភ្នំពេញ
រាជធានីភ្នំពេញ ៖ អ្នកនាំពាក្យរាជរដ្ឋាភិបាលបានបញ្ជាក់ថា ពិភពលោកមិននៅស្ងៀមឡើយចំពោះការឈ្លានពានកាន់កាប់ទឹកដីកម្ពុជា ដោយខុសច្បាប់ពីសំណាក់កងកម្លាំងថៃ និងការបំពានសិទ្ធិជនភៀសសឹកកម្ពុជា ។
ថ្លែងក្នុងសន្និសីទសារព័ត៌មាន នាព្រឹកថ្ងៃទី២០ ខែសីហា ឆ្នាំ២០២៦ បានលើកឡើងថាសំឡេងការពិតពីព្រំដែនកម្ពុជា-ថៃ ដែលបង្ហាញពីការកាន់កាប់ទឹកដីកម្ពុជា ដោយបំពានច្បាប់អន្តរជាតិពីសំណាក់កងកម្លាំងថៃបានលាន់ឮជាបន្តបន្ទាប់ឥតដាច់ពីបណ្តាញផ្សព្វផ្សាយព័ត៌មានអន្តរជាតិល្បីៗពីសហគមន៍អ្នកស្រឡាញ់សន្តិភាព អ្នកការពារប្រជាជាតិដែលរងការបំពាន និងអ្នកគោរពច្បាប់អន្តរជាតិ ស្របគ្នាជាមួយការងារការទូតយ៉ាងសកម្មរបស់រាជរដ្ឋាភិបាលដើម្បីការពារអធិបតេយ្យភាពជាតិ បូរណភាពទឹកដី និងប្រជាជន។
ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល សូមបញ្ជាក់ជាថ្មីជូនជនរួមជាតិជ្រាបថា រាជរដ្ឋាភិបាលក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានចាត់ទុកការការពារអធិបតេយ្យភាព បូរណភាពទឹកដី និងប្រជាជនជាអាទិភាពខ្ពស់បំផុត ។
ក្នុងន័យនេះ រាជរដ្ឋាភិបាលបាននិងកំពុងធ្វើការងារការទូតយ៉ាងសកម្ម ដើម្បីជំរុញឱ្យមានដំណោះស្រាយបញ្ហាព្រំដែនជាមួយប្រទេសថៃ ឱ្យបានឆាប់តាមមធ្យោបាយសន្តិវិធីដោយផ្អែកលើអនុសញ្ញា សន្ធិសញ្ញា និងច្បាប់អន្តរជាតិ តាមរយៈយន្តការនិងកិច្ចព្រមព្រៀងនានា ដែលមានស្រាប់ ។
អ្នកនាំពាក្យបានលើកឡើងថា យន្តការផ្សះផ្សាដោយបង្ខំក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS) ដែលផ្តួចផ្តើមដោយកម្ពុជាកំពុងដំណើរការទៅមុខ ខណៈដែលដំណើរការវាស់វែង ខណ្ឌសីមា ព្រំដែនគោក តាមរយៈយន្តការ JBC និងការវិលត្រឡប់របស់ជនភៀសសឹកកំពុងត្រូវបានជំរុញដោយរាជរដ្ឋាភិបាលកម្ពុជា និងជាការចង់បានរបស់សហគមន៍អន្តរជាតិ៕
ចែករំលែកព័តមាននេះ