ផ្សារស្ទឹងមានជ័យ អាយុកាល៦៦ឆ្នាំ មានសភាពចាស់ទ្រុឌទ្រោមខ្លាំង ពេលនេះជួសជុលដំបូលថ្មី រយៈពេល១១០ថ្ងៃ
- ភ្នំពេញ
រាជធានី ភ្នំពេញ ៖ យោងតាមសេចក្តីជូនដំណឹងរបស់រដ្ឋបាលខណ្ឌមានជ័យ បាន ឱ្យ ដឹង ថា រដ្ឋបាលខណ្ឌមានជ័យ សូមជម្រាបជូនដំណឹងដល់បងប្អូនអាជីវករដែលកំពុងលក់ដូរនៅក្នុងផ្សារ ស្ទឹងមានជ័យ ស្ថិតនៅផ្លូវព្រះមុន្នីរ៉េត ភូមិថ្មី សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញឲ្យបាន ជ្រាបថា៖ ផ្សារស្ទឹងមានជ័យ ត្រូវបានសាងសង់ឡើងនៅក្នុងឆ្នាំ១៩៦០ ដោយដំបូលផ្សារត្រូវបានកសាងឡើង អំពីឈើប្រក់ក្បឿង ដែលគិតមកត្រឹមបច្ចុប្បន្នមានអាយុកាល ៦៦ឆ្នាំហើយ ដោយពេលនេះដំបូលផ្សារមាន សភាពចាស់ទ្រុឌទ្រោមខ្លាំង ដែលបានបង្កការលំបាក និងហានិភ័យដល់អាជីវករ និងអតិថិជនដែលចេញ-ចូល ផ្សារផងដែរ។
ផ្អែកលើមូលដ្ឋាននេះ និងដោយទទួលបានសំណូមពរពីបងប្អូនអាជីវករ រដ្ឋបាលរាជធានីភ្នំពេញ បាន សម្រេចរៀបចំជួសជុល និងសាងសង់ដំបូលផ្សារ ព្រមទាំងហេដ្ឋារចនាសម្ព័ន្ធផ្សារដែលខូចខាតឡើងវិញ ដើម្បី លើកកម្ពស់សោភ័ណភាព អនាម័យ បរិស្ថាន និងសុវត្ថិភាព ព្រមទាំងបង្កលក្ខណៈងាយស្រួលដល់បងប្អូនអាជីវករ ដែលប្រកបអាជីវកម្មនៅទីនោះ។
ការអនុវត្តគម្រោងនឹងត្រូវចាប់ផ្តើមពីថ្ងៃទី២០ ខែសីហា ឆ្នាំ២០២៦ ខាងមុខនេះ ដូច្នេះដើម្បីរក្សាបាន នូវសណ្តាប់ធ្នាប់របៀបរៀបរយ កាត់បន្ថយជាអតិបរមានូវគ្រោះថ្នាក់ជាយថាហេតុ និងបញ្ចៀសការរាំងស្ទះការងារ សាងសង់នេះ រដ្ឋបាលខណ្ឌមានជ័យ ស្នើសុំឲ្យបងប្អូនអាជីវករ និងម្ចាស់អាជីវកម្មពាក់ព័ន្ធ ត្រូវចូលរួម សហការបង្កលក្ខណៈងាយស្រួលដល់ក្រុមការងារសាងសង់ឲ្យបានរលូន និងទទួលបានលទ្ធផលតាមការគ្រោងទុក។
រដ្ឋបាលខណ្ឌមានជ័យ សង្ឃឹមជឿជាក់ថាបងប្អូនអាជីវករ និងម្ចាស់អាជីវកម្មពាក់ព័ន្ធទាំងអស់ ផ្តល់ការ អធ្យាស្រ័យ យោគយល់ និងចូលរួមសហការអនុវត្តតាមខ្លឹមសារខាងលើនេះ ប្រកបដោយស្មារតីទទួលខុសត្រូវខ្ពស់។
លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា តបតាមការ ស្នើសុំ របស់ បងប្អូន អាជីវករ រដ្ឋបាលរាជធានីភ្នំពេញ បាន សម្រេច ផ្តល់ ការ ជួសជុល និង សាងសង់ ដំបូលផ្សារ ស្ទឹងមានជ័យ ព្រមទាំង ហេដ្ឋារចនាសម្ព័ន្ធផ្សារដែលខូចខាតឡើងវិញ ចាប់ពីថ្ងៃទី២០ ខែសីហា ឆ្នាំ ២០២៦នេះ តទៅ ដើម្បីលើកកម្ពស់សោភណភាពអនាម័យ បរិស្ថាន និងសុវត្ថិភាព ព្រមទាំងបង្កលក្ខណៈងាយស្រួលដល់បងប្អូនអាជីវករ និងប្រជាពលរដ្ឋចេញ-ចូលផ្សារ ។ លោកស្រីបញ្ជាក់ ថា ផ្សារចំណាស់ដែលកកើតតាំងពីអំឡុងឆ្នាំ១៩៦០ ពិតជាទ្រុឌទ្រោមខ្លាំងណាស់ហើយ ។
តាមការអះអាងរបស់ប្រធានផ្សារស្ទឹងមានជ័យ បានឱ្យកោះសន្តិភាពដឹងថា ផ្សារស្ទឹងមានជ័យ ត្រូវបានសាងសង់ឡើងនៅក្នុងឆ្នាំ១៩៦០ ដោយដំបូលផ្សារត្រូវបានកសាងឡើង អំពីឈើប្រក់ក្បឿង ដែលគិតមកត្រឹមបច្ចុប្បន្នមានអាយុកាល ៦៦ឆ្នាំហើយ ដោយពេលនេះដំបូលផ្សារមាន សភាពចាស់ទ្រុឌទ្រោមខ្លាំង ដែលបានបង្កការលំបាក និងហានិភ័យដល់អាជីវករ និងអតិថិជនដែលចេញ-ចូល ផ្សារ ។ លោកបន្តថា ផ្សារស្ទឹងមានជ័យ នេះមានអាជីវករសរុប ចំនួន១៨៦តូប ចំណែកការសាងសង់រយៈពេល ១១០ថ្ងៃ ដោយគិតចាប់ពីថ្ងៃចាប់ផ្ដើមអនុវត្តពីថ្ងៃទី២០ ខែ សីហា នេះតទៅ នេះបើតាមការអះអាងពីជាង ៕
ចែករំលែកព័តមាននេះ