សហរដ្ឋអាមេរិក ៖ បំណុលជាតិសរុបរបស់សហរដ្ឋអាមេរិកបានកើនលើសពី៤០ទ្រីលានដុល្លារអាមេរិកជាលើកដំបូង ដែលនេះជាសញ្ញានៃការព្រមានសាជាថ្មីថា វិបត្តិហិរញ្ញវត្ថុកំពុងផ្ទុះឡើងហើយ។ នេះបើតាមប្រភពពីទីភ្នាក់ងារសារព័ត៌មាន Reuters និង AFP។
ទិន្នន័យក្រសួងរតនាគារអាមេរិក កាលពីថ្ងៃទី១៩ ខែសីហា ឆ្នាំ២០២៦ (ម៉ោងនៅសហរដ្ឋអាមេរិក) បានបង្ហាញថា បំណុលសាធារណៈសរុបបានកើនដល់ ៤០,០៥ ទ្រីលានដុល្លារអាមេរិក ដោយក្នុងនោះបំណុលសាធារណៈក្រៅប្រទេសចំនួន ៣២,២៧ ទ្រីលានដុល្លារ និងបំណុលសាធារណៈក្នុងប្រទេសចំនួន ៧,៧៨ ទ្រីលានដុល្លារ។
តាមតួលេខនេះ សហរដ្ឋអាមេរិក នៅតែជាប្រទេសជាប់បំណុលសាធារណៈច្រើនជាងគេលើពិភពលោក។ តួលេខនេះទៀតសោត គឺផ្ទុយស្រឡះពីការព្យាករណ៍កាលពីមុនរបស់ការិយាល័យថវិកាសភាសហរដ្ឋអាមេរិក (CBO) ដែលថា ការខ្ចីប្រាក់សរុបនឹងកើនឡើងដល់ ៣៩,៤ ទ្រីលានដុល្លារអាមេរិក ត្រឹមដំណាច់ឆ្នាំ២០២៦នេះ។
បំណុលពេលនេះ បានកើនឡើងជាងទ្វេដងក្នុងរយៈពេលមិនដល់១០ឆ្នាំផង ពោលចាប់តាំងពីចំនួន ១៩,៩៥ ទ្រីលានដុល្លារ កាលពីពេលដែលលោកប្រធានាធិបតី ដូណាល់ ត្រាំ (Donald Trump) បានស្បថចូលកាន់តំណែងលើកដំបូង កាលពីក្នុងខែមករា ឆ្នាំ២០១៧។ បំណុលបានកើនឡើងយ៉ាងគំហុកក្នុងអាណត្តិដឹកនាំរបស់លោក ត្រាំ និងអតីតប្រធានាធិបតី លោក ចូ បៃដិន (Joe Biden) ដើម្បីឆ្លើយតបនឹងវិបត្តិជំងឺកូវីដ១៩ និងការចំណាយផ្សេងៗទៀតនៅឆាំ្នបន្តបន្ទាប់ តបតាមគោលនយោបាយរដ្ឋាភិបាល។
ការកើនឡើងបំណុលជាតិរបស់សហរដ្ឋអាមេរិកកើតឡើងស្របពេលដែលក្តីបារម្ភអំពីអតិផរណា សង្គ្រាមនៅតំបន់មជ្ឈិមបូព៌ា និងការចំណាយរបស់រដ្ឋាភិបាលផ្សេងទៀត បាននិងកំពុងជំរុញឱ្យមានការព្រួយបារម្ភក្នុងចំណោមវិនិយោគិន ហើយតម្លៃនៃការខ្ចីប្រាក់ក៏បានកើនឡើងខ្ពស់ផងដែរ។
តាមពិតទៅ ក្រុមអ្នកឃ្លាំមើលថវិកាជាតិបានរំពឹងទុកថានឹងឈានហួសកម្រិតកំណត់នេះជាច្រើនសប្តាហ៍មកហើយ ហើយបានចេញការព្រមានយ៉ាងធ្ងន់ធ្ងរថា វិបត្តិបំណុលពេញទំហឹងមួយអាចនឹងផ្ទុះឡើង លុះត្រាតែអ្នកតាក់តែងច្បាប់រួមគ្នាដោះស្រាយទស្សនវិស័យហិរញ្ញវត្ថុដែលមិនអាចទ្រទ្រង់រួចនេះ ដោយការដំឡើងពន្ធ និងកាត់បន្ថយការចំណាយ ឬក៏ធ្វើទាំងពីររួមគ្នាតែម្តង៕
ចែករំលែកព័តមាននេះ