ទីក្រុងវៀងចន្ទន៍៖ ប្រទេសឡាវបានបញ្ចប់ការស្ទង់ទីតាំង និងកំណត់ឃើញតំបន់ដែលមានសក្តានុពលរ៉ែកម្រ ចំនួន ២តំបន់ធំៗ ដែលលាតសន្ធឹងលើខេត្តចំនួន ៤។ នេះបើយោងតាមក្រសួងឧស្សាហកម្ម និងពាណិជ្ជកម្មឡាវ ដែលចុះផ្សាយដោយសារព័ត៌មាន Laotian Times។
តំបន់ដែលរកឃើញថ្មីរួមមាន តំបន់ព្រំប្រទល់ បូលិខាំសៃ–ខាំមួន នៅភាគកណ្តាលប្រទេសឡាវ និងតំបន់ សេកុង–អត្តពឺ នៅភាគខាងត្បូងប្រទេសឡាវ។
ការរកឃើញនេះត្រូវបានបង្ហាញ បន្ទាប់ពីនាយករដ្ឋមន្ត្រីឡាវ លោក Sonexay Siphandone ចុះទស្សនកិច្ចនៅវិទ្យាស្ថានឧស្សាហកម្ម ពាណិជ្ជកម្ម និងថាមពល កាលពីពេលថ្មីៗនេះ។ ទោះជាយ៉ាងណា អាជ្ញាធរឡាវមិនទាន់បង្ហាញព័ត៌មានលម្អិតអំពីទីតាំង និងបរិមាណរ៉ែកម្រ ដែលអាចមាននៅតំបន់ទាំងនេះនៅឡើយទេ។
រ៉ែកម្រ គឺជាក្រុមលោហៈពិសេសដែលមានសារៈសំខាន់សម្រាប់បច្ចេកវិទ្យាទំនើប ដោយត្រូវបានប្រើប្រាស់ក្នុងការផលិតសមាសធាតុអេឡិចត្រូនិក ឡាស៊ែរ ឧបករណ៍បច្ចេកវិទ្យាខ្ពស់ និងផលិតផលឧស្សាហកម្មជាច្រើនប្រភេទ។
ឡាវក៏បានចាប់ផ្តើមអភិវឌ្ឍហេដ្ឋារចនាសម្ព័ន្ធសម្រាប់វិស័យរ៉ែកម្រ។ កាលពីឆ្នាំ២០២៣ ប្រទេសនេះបានបើកដំណើរការ មន្ទីរពិសោធន៍ត្រួតពិនិត្យ និងធ្វើតេស្តគុណភាពរ៉ែកម្រ នៅទីក្រុងវៀងចន្ទន៍ ដោយមានការគាំទ្រពីប្រទេសចិន។
ក្រៅពីនេះ ឡាវមានសក្តានុពលរ៉ែកម្រ ជាពិសេសប្រភេទ រ៉ែកម្រធ្ងន់ នៅខេត្តភាគខាងជើង ដូចជា សៀងខ្វាង និងហួផាន់។ រដ្ឋាភិបាលឡាវក៏បានអនុញ្ញាតឱ្យក្រុមហ៊ុនចិនចូលរួមអភិវឌ្ឍគម្រោងរុករក និងជីកយករ៉ែកម្រ នៅតំបន់មួយចំនួនរួចមកហើយ។
តាមរបាយការណ៍របស់ប្រព័ន្ធផ្សព្វផ្សាយរដ្ឋឡាវ កាលពីឆ្នាំ២០២៣ ប្រទេសនេះមានគម្រោងរុករក និងជីកយករ៉ែកម្រ ប្រមាណ ១៥គម្រោង នៅទូទាំងប្រទេស។
ការរកឃើញតំបន់សក្តានុពលថ្មីទាំងពីរ អាចបង្កើនសារៈសំខាន់របស់ឡាវក្នុងវិស័យរ៉ែកម្រ ដែលកំពុងមានតម្រូវការកើនឡើងជាសកល ដោយសារការរីកចម្រើននៃឧស្សាហកម្មអេឡិចត្រូនិក បច្ចេកវិទ្យាខ្ពស់ និងថាមពលទំនើប៕
ចែករំលែកព័តមាននេះ