រាជធានីភ្នំពេញ ៖ រថយន្តសម្រាប់ដឹកទូកុងតឺន័រ ១គ្រឿង ខណៈបើកបរឆ្លងផ្លូវដែក ផុតក្បាល នៅសល់កន្ទុយរ៉ឺម៉ក ក៏ត្រូវរថភ្លើងសណ្ដោងបារុងដឹកទូកុងតឺន័រ ១ខ្សែ ទៅដល់បុកពេញទំហឹង បណ្ដាលឲ្យប៉ើងកន្ទុយរ៉ឺម៉កខ្ទាតចេញពីផ្លូវស្ទើរតែក្រឡាប់ និងគាបជាប់គ្នាថែមទៀតផង។ នៅក្នុងហេតុការណ៍នោះដែរ ពុំបានបណ្ដាលឲ្យមានមនុស្សណាម្នាក់រងគ្រោះឡើយ ហើយក្រោយពេលកើតហេតុ ភាគីទាំងសងខាងបានសម្របសម្រួលគ្នា ដោយតំណាងភាគីរថយន្តបានចេញសំណងទៅឲ្យខាងភាគីរថភ្លើង ចំនួន៥០០ដុល្លារ បញ្ចប់រឿង នេះបើតាមនគរបាលប្រាប់ឲ្យដឹងដូច្នេះ ។
ឧប្បត្តិហេតុខាងលើបានកើតឡើងកាលពីវេលាម៉ោង៣និង១៥នាទីរសៀលថ្ងៃទី១៩ ខែសីហា ឆ្នាំ២០២៦ នៅតាមផ្លូវបេតុង ត្រង់ចំណុចផ្លូវរថភ្លើងខ្សែរាជធានីភ្នំពេញ-ខេត្តបាត់ដំបង ស្ថិតនៅក្នុងភូមិសំរោង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
រថយន្តសណ្ដោងកន្ទុយរ៉ឺម៉ក សម្រាប់ដឹកទូកុងតឺន័រ ១គ្រឿង នោះក្បាលពណ៌ក្រហមលាយទឹកប្រាក់និងស ពាក់ស្លាកលេខភ្នំពេញ2B-8222 និងកន្ទុយរ៉ឺម៉កពណ៍ខៀវ ពាក់ស្លាកលេខកំពង់ស្ពឺ 4A-0025 ដោយឡែករថភ្លើងខ្សែរាជធានីភ្នំពេញ-ខេត្តបាត់ដំបង ហើយទាំងរថភ្លើង និងរថយន្ត បានរងការខូចខាតខ្លះៗដូចគ្នាផងដែរ ។
សមត្ថកិច្ចបានប្រាប់ឲ្យដឹងថា នៅមុនពេលកើតហេតុ រថភ្លើងសណ្ដោងបារុងដឹកទូកុងតឺន័រជាច្រើនបារុង បានបើកបរក្នុងទិសដៅពីលិចទៅកើតចូលរាជធានីភ្នំពេញ ចំណែករថយន្តសម្រាប់ដឹកទូកុងតឺន័រ បានបើកឆ្លងផ្លូវដែក ក្នុងទិសដៅពីត្បូងទៅជើង ។ ខណៈនោះឆ្លងផុតក្បាល នៅសល់កន្ទុយរ៉ឺម៉ក ក៏ត្រូវរថភ្លើងទៅដល់បុកពេញទំហឹង បណ្ដាលឲ្យកន្ទុយរ៉ឺម៉ករថយន្តនោះខ្ទាតប៉ើងធ្លាក់ផ្លូវស្ទើរតែក្រឡាប់ ហើយក្បាលរថភ្លើង និងកន្ទុយរ៉ឺម៉ករថយន្តបានគាបជាប់គ្នា ។
សមត្ថកិច្ចបានប្រាប់ឲ្យដឹងបន្តទៀតថា ខណៈនោះ រថភ្លើងបើកក្នុងល្បឿនយឺតទេ ទើបបុកភ្លាមជាន់ហ្វ្រាំងឈប់ទាន់ភ្លាមៗ ប្រសិនបើរថភ្លើងកំពុងបើកបោះពួយក្នុងល្បឿនលឿនវិញ ប្រហែលរថយន្តនោះទាំងក្បាល និងកន្ទុយរ៉ឺម៉ក មិនដឹងថា ក្រឡាប់ប៉ុន្មានត្រលប់នោះឡើយ និងអាចបណ្ដាលឲ្យមានមនុស្សរងរបួស ឬក៏ស្លាប់ផងក៏មិនដឹង។ នៅក្នុងហេតុការណ៍ខាងលើនោះ បានបណ្ដាលឲ្យរថយន្ត និងរថភ្លើងរងការខូចខាតដូចគ្នា ប៉ុន្តែមិនធ្ងន់ធ្ងរនោះទេ ហើយនៅក្រោយពេលកើតហេតុ នគរបាលប៉ុស្តិ៍សំរោងក្រោម បានទៅកាន់ទីនោះ និងឲ្យតំណាងភាគីទាំងសងខាងសម្របសម្រួលគ្នា ពេលនោះខាងតំណាងភាគីរថយន្តបានចេញសំណងទៅឲ្យខាងភាគីរថភ្លើង ចំនួន៥០០ដុល្លារបញ្ចប់រឿង ៕
ចែករំលែកព័តមាននេះ