ខេត្តសៀមរាប ៖ អ្នកនាំពាក្យ និងក្រុមការងារប្រតិកម្មរហ័ស នៃស្នងការដ្ឋាននគរបាលខេត្តសៀមរាប បានឲ្យដឹងនៅថ្ងៃទី១៩ សីហា ២០២៦នេះថា ក្រោយពីទទួលបានព័ត៌មានថា មានករណីផ្ទុះអាវុធ លោកឧត្ដមសេនីយ៍ទោ ហួត សុធី ស្នងការនគរបាលខេត្តសៀមរាប បានបញ្ជាដឹកនាំកម្លាំងអន្តរាគមន៍ និងតម្រួតបទបញ្ជា រួមជាមួយកម្លាំងជំនាញពាក់ព័ន្ធ ចុះទៅកន្លែងកើតហេតុ និងឱ្យកម្លាំងជំនាញការិយាល័យនគរបាលព្រហ្មទណ្ឌកម្រិតធ្ងន់ ធ្វើការឃាត់ខ្លួនជនសង្ស័យឈ្មោះ ព្រំ ពិសិដ្ឋ ភេទប្រុស អាយុ៤៦ឆ្នាំ មុខរបរ ទិញលក់រថយន្ត ទីកន្លែងកំណើត សង្កាត់ស្វាយរៀង ក្រុងស្វាយរៀង ខេត្តស្វាយរៀង មានទីលំនៅបច្ចុប្បន្នស្ថិតនៅផ្ទះលេខ ៤៦A ផ្លូវ២៧៨ ភូមិ៣ សង្កាត់បឹងកេងកងទី២ ខណ្ឌចំការមន រាជធានីភ្នំពេញ ដែលប្រព្រឹត្តបទល្មើសជាក់ស្តែង ករណីប្រើប្រាស់អាវុធដោយខុសច្បាប់ នៅត្រង់ចំណុចបន្ទប់ខារ៉ាអូខេ នៃមណ្ឌលកម្សាន្តផ្លាទីនឹម KTV ស្ថិតនៅភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប ដែលជាខេត្តទេសចរណ៍ នៃព្រះរាជាណាចក្រកម្ពុជា កាលពីវេលាម៉ោង១និង០០នាទី រំលងអធ្រាត យកទៅធ្វើការសាកសួរ ។
ក្រុមការងារប្រតិកម្មរហ័ស បន្តថា ចំពោះករណីខាងលើនេះ ក្រោយពីកិច្ចប្រតិបត្តិការ និងការសាកសួរបានបញ្ចប់ លោកឧត្ដមសេនីយ៍ទោស្នងការ មិនលើកលែងជាដាច់ខាត និងបញ្ជាអោយមន្ត្រីជំនាញ ត្រូវតែកសាងសំណុំរឿងបញ្ជូនជនល្មើសទៅសាលាដំបូងខេត្តសៀមរាប ដើម្បីអនុវត្តនីតិវិធីបន្តតាមផ្លូវច្បាប់ ។
ក្រុមការងារប្រតិកម្មរហ័ស បានបញ្ជាក់ផងដែរ ករណីខាងលើនេះ មិនបណ្ដាលអោយមានរបួសស្នាមដល់ជនណានោះទេ ៕
ចែករំលែកព័តមាននេះ