សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានថ្លែងកាលពីថ្ងៃទី១៨ ខែសីហា ឆ្នាំ២០២៦ (ម៉ោងនៅសហរដ្ឋអាមេរិក) ថា លោកបានផ្អាករយៈពេល៣ថ្ងៃលើផែនការយកពន្ធ ៥០% លើទំនិញពីប្រទេសកាណាដា ដែលគ្រោងចាប់ផ្តើមនៅថ្ងៃទី១៩ ខែសីហានេះ ដោយលោកបានបញ្ជាក់ថា ប្រទេសទាំងពីរបានឈានដល់កិច្ចព្រមព្រៀងមួយហើយ។ នេះបើតាមប្រភពពី Reuters, BBC និង NBC News ចេញផ្សាយនៅព្រឹកថ្ងៃទី១៩ ខែសីហា ឆ្នាំ២០២៦។
លោក ត្រាំ បានសរសេរនៅលើបណ្តាញសង្គម Truth Social កាលពីថ្ងៃទី១៨ ខែសីហា ដូច្នេះថា «ខ្ញុំបានផ្អាកការយកពន្ធ ៥០% លើប្រទេសកាណាដា ដែលគ្រោងនឹងចាប់ផ្តើមនៅព្រឹកស្អែកនេះ សម្រាប់រយៈពេល៣ថ្ងៃ ដោយផ្អែកលើការពិតដែលថា កាណាដា និងសហរដ្ឋអាមេរិក សម្រេចបានកិច្ចព្រមព្រៀងមួយហើយ ដោយគ្រាន់តែរង់ចាំការបិទបញ្ចប់ឯកសារចុងក្រោយតែប៉ុណ្ណោះ!»។
ការប្រកាសនេះ បានធ្វើឡើងមិនដល់២ម៉ោងផង មុនពេលដែលការយកពន្ធ ៥០% លើទំនិញនាំចូលពីកាណាដា តម្លៃជិត ២០ ពាន់លានដុល្លារអាមេរិកត្រូវចាប់ផ្តើមអនុវត្ត។
គួរបញ្ជាក់ដែរថា ភាគីទាំងពីរបានជួបភាពទាល់ច្រកលើបញ្ហាជាច្រើន រួមទាំងការយកពន្ធរបស់សហរដ្ឋអាមេរិកលើរថយន្ត និងខេត្តជាច្រើនរបស់កាណាដាបានហាមឃាត់ការលក់ស្រារបស់សហរដ្ឋអាមេរិក។ លោក ត្រាំ និងនាយករដ្ឋមន្ត្រីកាណាដា លោក ម៉ាក ខានី (Mark Carney) បានពិភាក្សាគ្នាចំនួនពីរដងរួចមកហើយថ្មីៗនេះ ខណៈដែលក្រុម ចរចាពាណិជ្ជកម្មបានចូលរួមកិច្ចពិភាក្សាយ៉ាងស្វិតស្វាញ ចាប់តាំងពីខែកក្កដាមក បន្ទាប់ពីលោក ត្រាំ បានគំរាមកំហែងពីការយកពន្ធថ្មីនេះ ដោយដាក់ឱសានវាទត្រឹមថ្ងៃទី១៩ ខែសីហា៕
ចែករំលែកព័តមាននេះ