ជនសង្ស័យម្នាក់ត្រូវបានបញ្ជូនទៅពន្ធនាគារ ពាក់ព័ន្ធបទល្មើសឆ.ក់ត្រីក្នុងរដូវបិទនេសាទ នៅខេត្តស្ទឹងត្រែង
- ស្ទឹងត្រែង
ខេត្តស្ទឹងត្រែង៖ ជនសង្ស័យម្នាក់ឈ្មោះ ផាន់ ខៃ អាយុ ៥៣ឆ្នាំ រស់នៅភូមិកំភុន ឃុំកំភុន ស្រុកសេសាន ត្រូវបានសមត្ថកិច្ចជំនាញបញ្ជូនខ្លួនទៅឃុំខ្លួនបណ្តោះអាសន្ននៅពន្ធនាគារខេត្តស្ទឹងត្រែង កាលពីថ្ងៃទី១៨ ខែសីហា ឆ្នាំ២០២៦ បន្ទាប់ពីតុលាការបានសម្រេចចោទប្រកាន់ពីបទ លួចប្រើប្រាស់ឧបករណ៍ឆក់ត្រី ក្នុងរដូវបិទនេសាទ។
លោកស្រី សម វិចិត្រ ប្រធានខណ្ឌរដ្ឋបាលជលផលស្ទឹងត្រែង បានឱ្យដឹងថា កិច្ចប្រតិបត្តិការនេះបានធ្វើឡើងកាលពីវេលាម៉ោង ៣:៣០ នាទីរំលងអធ្រាត្រ ឈានចូលថ្ងៃទី១៨ ខែសីហា ឆ្នាំ២០២៦ ដោយកម្លាំងជំនាញខណ្ឌរដ្ឋបាលជលផល សហការជាមួយសហ
គមន៍នេសាទ អូរច្រឡង់ កោះសំពាយ-ដំរីផុង-កោះស្រឡាយ បានចុះល្បាតតាមដងទន្លេសេសាន និងបានប្រទះឃើញជនសង្ស័យកំពុងធ្វើសកម្មភាពឆក់ត្រីជាក់ស្តែង។ ពេលនោះ កម្លាំងល្បាតបានដេញតាមនិងឃាត់ខ្លួនបាននៅចំណុចមុខសាលាស្រុកសេសាន។
នៅក្នុងប្រតិបត្តិការនោះ សមត្ថកិច្ចបានដកហូតវត្ថុតាងរួមមាន៖ទូក និងម៉ាស៊ីន ០១ គ្រឿង ក្បាលឆក់ ០១ គ្រឿង, អាគុយ ០១ គ្រឿង, ខ្សែភ្លើង ០៥ ម៉ែត្រ និងខ្សែកាប ០២ ម៉ែត្រ ថងដងត្រី ០២ គ្រឿង និងច្រវ៉ា ០១លបប្រើស១០០ ចំនួន ០២ គ្រឿង ត្រីចម្រុះទម្ងន់៥ គីឡូក្រាម។
បច្ចុប្បន្ន ជនសង្ស័យត្រូវបានឃុំខ្លួនតាមនីតិវិធីច្បាប់ ឯវត្ថុតាងត្រូវបានយកទៅរក្សាទុកនៅស្នាក់ការអធិការកិច្ចជលផលនៃខណ្ឌរដ្ឋបាលជលផលស្ទឹងត្រែង។
លោកប្រធានខណ្ឌបានសម្តែងការសោកស្តាយដែលជនសង្ស័យនៅតែបន្តប្រព្រឹត្តបទល្មើស ផ្ទុយពីការណែនាំ និងការផ្សព្វផ្សាយរបស់អាជ្ញាធរដែលបានអំពាវនាវឱ្យរួមគ្នាអភិរក្សត្រីមេពូជក្នុងរដូវបិទនេសាទ។
លោកស្រី សម វិចិត្រ បានគូសបញ្ជាក់បន្ថែមថា គិតចាប់ពីខែកក្កដា ឆ្នាំ២០២៦ មក ដងទន្លេក្នុងខេត្តស្ទឹងត្រែងបានជួបប្រទះករណីឆក់ត្រីចំនួន ៤លើកមកហើយ។ ក្នុងនោះ ២ករណី ត្រូវបានបញ្ជូនទៅឃុំខ្លួននៅតុលាការ និង ២ករណីទៀត បានបណ្តាលឱ្យជនល្មើសស្លាប់ដោយសារឆក់ខ្លួនឯង (ម្នាក់នៅឃុំកាំងចាម ស្រុកថាឡាបរិវ៉ាត់ កាលពីចុងខែកក្កដា និងម្នាក់ទៀតនៅឃុំស្តៅ ស្រុកសេសាន កាលពីថ្ងៃទី៥ ខែសីហា)។
ស្របគ្នានេះដែរ ខណ្ឌរដ្ឋបាលជលផលស្ទឹងត្រែង ក៏បានបង្ហាញរបាយការណ៍បូកសរុបលទ្ធផលការងារទប់ស្កាត់ និងបង្ក្រាបបទល្មើសជលផលប្រចាំឆមាសទី១ ឆ្នាំ២០២៦ ដោយសម្រេចបានលទ្ធផលសំខាន់ៗដូចខាងក្រោមរួមមានវត្ថុតាង និងឧបករណ៍នេសាទល្មើសច្បាប់៖មងនេសាទក្នុងតំបន់ហាមឃាត់ ប្រវែង ២៥,១០៥ ម៉ែត្រ.សន្ទូចរនង (នេសាទក្នុងតំបន់អភិរក្សសត្វផ្សោត និងតំបន់ហាមឃាត់) ចំនួន ១៨,៤៦៣ ផ្លែ.ទូកស្មាច់ ០៤ គ្រឿង និងម៉ាស៊ីន ០៤ គ្រឿង.ក្បាលឆក់ ០៣ គ្រឿង និងអាគុយ ០៣ គ្រឿង.ទ្រុងដាក់ត្រី ០១ គ្រឿង និងកន្ត្រក់ដាក់កូនសោ ០១ គ្រឿង.គ្រឿងញៀន ០១ កញ្ចប់តូច (ប្រគល់ជូនសមត្ថកិច្ចជំនាញ)
។ជនផលក៏បានចុះផ្សព្វផ្សាយ និងអប់រំណែនាំប្រជាពលរដ្ឋបានចំនួន ២២០ នាក់ ធ្វើកិច្ចសន្យាជាមួយប្រជានេសាទចំនួន ២០ នាក់ និងអប់រំឈ្មួញទិញត្រីចំនួន ០២ នាក់ ជួយសង្គ្រោះ និងលែងត្រីកំពុងរងគ្រោះថ្នាក់ រួមទាំងត្រីមេពូជចូលទៅក្នុងធម្មជាតិវិញប្រមាណ ១០ គីឡូក្រាម។
អាជ្ញាធរមានសមត្ថកិច្ច និងមន្ត្រីរដ្ឋបាលជលផល នៅតែបន្តអំពាវនាវយ៉ាងទទូចដល់ប្រជាពលរដ្ឋទាំងអស់ ឱ្យបញ្ឈប់ការប្រើប្រាស់ឧបករណ៍នេសាទខុសច្បាប់គ្រប់ប្រភេទ ជាពិសេសឧបករណ៍ឆក់ ដើម្បីរួមគ្នារក្សានិរន្តរភាពធនធានជលផល និងជៀសវាងគ្រោះថ្នាក់ដល់ជីវិតជាយថាហេតុ៕
ចែករំលែកព័តមាននេះ