ទីក្រុងប៉ារីស៖ រដ្ឋាភិបាលបារាំងបានប្រកាសដាក់ឱ្យប្រើប្រាស់ច្បាប់កម្មវិធីយោធា ឆ្នាំ២០២៤-២០៣០ដែលត្រូវបានធ្វើបច្ចុប្បន្នភាព ដោយបង្កើនថវិកាការពារជាតិបន្ថែម ៣៦ពាន់លានអឺរ៉ូសម្រាប់រយៈពេលឆ្នាំ២០២៦-២០៣០ ដើម្បីពន្លឿនការពង្រឹងសមត្ថភាពយោធារបស់ប្រទេស។ នេះបើយោងតាមការចុះផ្សាយរបស់សារព័ត៌មាន ស៊ីនហួ នៅថ្ងៃទី១៨ ខែសីហានេះ។
តាមច្បាប់ថ្មីនេះ ថវិកាសរុបសម្រាប់វិស័យការពារជាតិរបស់បារាំងក្នុងអំឡុងឆ្នាំ២០២៤-២០៣០ នឹងកើនដល់ប្រមាណ ៤៣៦ពាន់លានអឺរ៉ូ។
រដ្ឋាភិបាលបារាំងក៏មានគោលដៅបង្កើនការចំណាយលើវិស័យការពារជាតិឱ្យបានយ៉ាងហោចណាស់ ២.៥% នៃផលិតផលក្នុងស្រុកសរុប (GDP) នៅឆ្នាំ២០៣០និងមានគោលដៅឈានដល់ ៣.៥% នៅឆ្នាំ២០៣៥។
ច្បាប់ដែលត្រូវបានធ្វើបច្ចុប្បន្នភាពនេះ ក៏បានផ្លាស់ប្តូរ ទិវាការពារជាតិ និងពលរដ្ឋទៅជា ទិវាចល័តកម្លាំងដោយផ្តោតកាន់តែខ្លាំងលើចំណេះដឹងការពារជាតិ សកម្មភាពយោធា និងការពង្រឹងសាមគ្គីភាពជាតិ។
រដ្ឋមន្ត្រីការពារជាតិបារាំង លោក Catherine Vautrin បានលើកឡើងថា ថវិកាបន្ថែម ៣៦ពាន់លានអឺរ៉ូ នឹងផ្តល់លទ្ធភាពឱ្យកងកម្លាំងប្រដាប់អាវុធបារាំងរក្សាតួនាទីរបស់ខ្លួននៅអឺរ៉ុប និងលើឆាកអន្តរជាតិ៕
ចែករំលែកព័តមាននេះ