ខេត្តស្វាយរៀង ៖ ក្រោមការដឹកនាំផ្ទាល់ពីលោក ម៉ែន អេង អភិបាលរងខេត្ត តំណាងលោក ប៉េង ពោធិ៍សា អភិបាលខេត្តស្វាយរៀង កម្លាំងចម្រុះបានចុះប្រតិបត្តិការធ្វើរដ្ឋបាលចំហលើទីតាំងចំនួន ២កន្លែង ដែលសង្ស័យថាមានការលួចលាក់ស្នាក់នៅ ធ្វើការខុសច្បាប់ និងមានសកម្មភាពឆបោកតាមប្រព័ន្ធបច្ចេកវិទ្យា (Online Scam) នៅថ្ងៃអង្គារ ទី១៨ ខែសីហា ឆ្នាំ២០២៦ ស្ថិតនៅតាមបណ្តោយផ្លូវវត្តឡុក ក្នុងភូមិបាវិតកណ្ដាល សង្កាត់បាវិត ក្រុងបាវិត ក្នុងកិច្ចប្រតិបត្តិការនេះ ក៏មានការសម្របសម្រួលនីតិវិធីពីលោកស្រី ពៅ ទេវី ព្រះរាជអាជ្ញារង នៃអយ្យការអមសាលាដំបូងខេត្តស្វាយរៀងផងដែរ ។
សមាសភាពចូលរួមក្នុងប្រតិបត្តិការនេះរួមមាន ៖ លោកអភិបាលក្រុងបាវិត, លោកស្នងការរងនគរបាលខេត្ត, លោកនាយការិយាល័យប្រឆាំងបទល្មើសបច្ចេកវិទ្យា, លោកអភិបាលរងក្រុង, លោកអធិការរងក្រុង, លោកនាយករងរដ្ឋបាលក្រុង, លោកនាយសេនាធិការកងរាជអាវុធហត្ថក្រុង និងមេភូមិបាវិតកណ្ដាល ។
ក្រុមការងារចម្រុះបានរកឃើញជនសង្ស័យសរុបចំនួន ១៩នាក់ (ស្រី ០៣នាក់) ដែលទាំងអស់ជាជនជាតិវៀតណាម។ ជាមួយគ្នានោះ សមត្ថកិច្ចក៏បានដកហូតវត្ថុតាងមួយចំនួន រួមមាន ៖ កុំព្យូទ័រ All in 1, ម៉ូនីទ័រ CPU, លិខិតឆ្លងដែន, ទូរសព្ទដៃចម្រុះ, ទូរសព្ទដៃផ្ទាល់ខ្លួន និងសម្ភារផ្សេងៗទៀតជាច្រើន។
បច្ចុប្បន្ន ចំពោះជនបរទេស និងវត្ថុតាងខាងលើ ត្រូវបានកម្លាំងសមត្ថកិច្ចបញ្ជូន និងប្រគល់ជូនស្នងការដ្ឋាននគរបាលខេត្តស្វាយរៀង ដើម្បីបន្តនីតិវិធីច្បាប់ ដោយឡែក ទីតាំងទាំង ២ខាងលើ ក្រុមការងារបានសម្រេចបិទសៀល ជាបណ្ដោះអាសន្ន ៕
ចែករំលែកព័តមាននេះ