ទីក្រុងយេរូសាឡឹម៖ លោកជេរ៉ាត ឃូសស្នឺដែលជាបេសកជនពិសេស និងជាកូនប្រសាលោកត្រាំបានជួបនាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ នៅល្ងាចថ្ងៃនេះបន្ទាប់ពីលោកណឺតាន់យ៉ាហ៊ូច្រានចោលផែនការសន្តិភាព១៥ចំណុចដែលផ្ដួចផ្ដើមឡើងដោយលោកត្រាំ។ នៅក្នុងការជួបគ្នាថ្មីបំផុតនេះ អាមេរិកចង់ធ្វើឱ្យប្រាកដថាអ៊ីស្រាអែលគាំទ្រផែនការសន្តិភាព។ មានកិច្ចការជាច្រើនដែលត្រូវគិតគូរ ក្នុងនោះមានដូចជាជីវិតរស់នៅរបស់ប្រជាជនប៉ាឡេស្ទីន២លាននាក់នៅតំបន់ហ្កាហ្សា ការកសាងទីតាំងដែលខូចខាតដោយសារសង្គ្រាម និងការរៀបចំអនាគតតំបន់នេះឡើងវិញក្រោយពេលចប់សង្គ្រាម។
ក្រុមហាម៉ាស់ប្រាប់ថាខ្លួនឯកភាពទទួលយកផែនការសន្តិភាពដែលរួមបញ្ចូលទាំងការតម្រូវឱ្យពួកគេទម្លាក់អាវុធចុះ និងការដែលក្រុមហាម៉ាស់ទាមទារឱ្យអ៊ីស្រាអែលដកកងទ័ពពីតំបន់ហ្កាហ្សា។ ប៉ុន្តែអ៊ីស្រាអែលទាមទារឱ្យហាម៉ាស់ទម្លាក់អាវុធចុះទាំងស្រុងជាមុនសិនទើបខ្លួនយល់ព្រមដកកងទ័ពតាមក្រោយ។ សព្វថ្ងៃនេះ កងទ័ពអ៊ីស្រាអែលកាន់កាប់ជ្រោយហ្កាហ្សាប្រហែល៦០%។ លោកណឺតាន់យ៉ាហ៊ូធ្លាប់ព្រមានថាអ៊ីស្រាអែលអាចនឹងវាយកាន់កាប់ទឹកដីបន្ថែមទៀត។ អតីតនាយករដ្ឋមន្ត្រីអង់គ្លេស លោកថូនីប្ល៊ែ និងប្រធានក្រុមប្រឹក្សាសន្តិភាព លោកមីកូឡាយ ម៉្លាដេណូស (Nickolay Mladenov) ក៏ចូលរួមនៅក្នុងកិច្ចជំនួបជាមួយលោកណឺតាន់យ៉ាហ៊ូផងដែរ។
កាលពីថ្ងៃអាទិត្យ លោកឃូសស្នឺបានចំណាយពេល២ម៉ោងដើម្បីជួបប្រធានក្រុមហាម៉ាស់ លោកខាលីល អាល់ហាយ៉ា (Khalil al-Hayya) នៅប្រទេសអេហ្ស៊ីប។ ប្រធានបទសំខាន់និយាយអំពីការកាត់រំសាយអាវុធរបស់ក្រុមហាម៉ាស់។ នៅក្នុងកិច្ចជំនួបនោះក៏មានវត្តរបស់មន្ត្រីរដ្ឋាភិបាលអេហ្ស៊ីប កាតា និងតួកគីផងដែរ។ មេដឹកនាំហាម៉ាស់ទាមទារឱ្យអ៊ីស្រាអែលបញ្ឈប់ការវាយប្រហារទៅលើតំបន់ហ្កាហ្សា និងដកកងទ័ពចេញពីតំបន់លឿង។ កងទ័ពអ៊ីស្រាអែលបានដើរហួសតំបន់នេះ។ កាលពីខែឧសភា លោកណឺតាន់យ៉ាហ៊ូថ្លែងថានៅជំហានបន្ទាប់ លោកចង់ជម្រុលការគ្រប់គ្រងជ្រោយហ្កាហ្សារហូតដល់៧០%។
ប្រទេសមួយចំនួននៅមជ្ឈិមបូព៌ាដូចជាអារ៉ាប៊ីសាអូឌីត និងអារ៉ាប់រួមជាដើមបានចេញសេចក្ដីថ្លែងការណ៍ថ្កោលទោសអ៊ីស្រាអែលដែលមិនព្រមទទួលយកផែនការសន្តិភាព។ ពួកគេយល់ថាអ៊ីស្រាអែលត្រូវតែទទួលខុសត្រូវចំពោះទង្វើរបស់ខ្លួនដែលយកជើងរាទឹកនៅក្នុងកិច្ចខិតខំប្រឹងប្រែងនាំយកសន្តិភាពសម្រាប់តំបន់ហ្កាហ្សា។ សេចក្ដីថ្លែងការណ៍នោះក៏ចុះហត្ថលេខាគាំទ្រដោយប្រទេសហ្សកដង់ ប៉ាគីស្ថាន ឥណ្ឌូណេស៊ី និងក្រុមប្រទេសសម្របសម្រួលការចរចាដទៃទៀតផងដែរ។ ប្រទេសទាំងនោះអំពាវនាវឱ្យក្រុមប្រឹក្សាសន្តិភាព និងអាមេរិកចាត់វិធានការជាបន្ទាន់ និងប្រកបដោយភាពហ្មត់ចត់ដើម្បីកុំឱ្យភាគីណាមួយបន្ទច់បង្អាក់ការអនុវត្តតាមផែនការសន្តិភាព។
យោងតាមផែនការសន្តិភាពនោះ ក្រុមហាម៉ាស់ត្រូវទម្លាក់អាវុធចុះ និងប្រគល់ទៅឱ្យគណៈកម្មការបច្ចេកទេសរបស់ប៉ាឡេស្ទីនដែលបង្កើតឡើងដើម្បីមើលការខុសត្រូវលើប្រតិបត្តិការផ្សេងៗនៅលើដែនដីនេះ។ រហូតមកដល់ពេលនេះ គណៈកម្មនេះមិនទាន់ឈានជើងចូលតំបន់ហ្កហ្សានៅឡើយទេ។ ទន្ទឹមនឹងការយល់ព្រមទម្លាក់អាវុធចុះ ក្រុមហាម៉ាស់ភ្ជាប់លក្ខខណ្ឌទៅនឹងការបង្កើតរដ្ឋប៉ាឡេស្ទីន។ ផែនការសន្តិភាពនោះក៏និយាយអំពីការទុកលទ្ធភាពឱ្យប្រជាជនប៉ាឡេស្ទីនសម្រេចជោគវាសនារបស់ខ្លួនដោយខ្លួនឯង។ ចំណុចនេះជាអ្វីដែលរដ្ឋាភិបាលរបស់លោកណឺតាន់យ៉ាហ៊ូប្រឆាំងជំទាស់។ លោកធ្លាប់ប្រកាសថាដរាបណាលោកនៅកាន់តំណែងជានាយករដ្ឋមន្ត្រី អ៊ីស្រាអែលនឹងមិនអនុញ្ញាតឱ្យមានរដ្ឋប៉ាឡេស្ទីនជាដាច់ខាត៕ ប្រភព៖ AP
ចែករំលែកព័តមាននេះ