ទីក្រុងប៉េកាំង ៖ ពាណិជ្ជកម្ម «ចិន-អាស៊ាន» សម្រេចបានទំហំទឹកប្រាក់ ៦៤៣,២ ពាន់លានដុល្លារអាមេរិក នៅក្នុងឆមាសទី១ នៃឆ្នាំ២០២៦ (ពាក់កណ្តាលឆ្នាំ២០២៦) ដែលកើនឡើង ១៨,២% ធៀបនឹងរយៈពេលដូចគ្នា កាលពីឆ្នាំមុន។ នេះបើយោងតាមប្រភពពីសារព័ត៌មាន Vietnam Express (VnExpress) ចេញផ្សាយកាលពីថ្ងៃទី១៥ ខែសីហា ឆ្នាំ២០២៦។
យោងតាមអគ្គនាយកដ្ឋានគយចិន (GACC) បានបង្ហាញថា ពាណិជ្ជកម្មលើទំនិញពាក់កណ្តាលសម្រេច ដែលរួមមានគ្រឿងបន្លាស់ជាដើមនោះ បានកើនឡើង ២៤,៥% ដល់ជាង ៤២៤ ពាន់លានដុល្លារ ដែលស្មើនឹងប្រហែលពីរភាគបីនៃទំហំពាណិជ្ជកម្មសរុប។ អ្នកនាំពាក្យ GACC បានសន្មតថា កំណើនប្រកបដោយស្ថិរភាពនៃពាណិជ្ជកម្មទំនិញពាក់កណ្តាលសម្រេចនេះ គឺដោយសារតែការផ្សារភ្ជាប់គ្នាកាន់តែស៊ីជម្រៅរវាងខ្សែច្រវាក់ឧស្សាហកម្ម និងខ្សែច្រវាក់តម្លៃរបស់ចិន និងអាស៊ាន។
ទន្ទឹមនឹងនេះដែរ ទិន្នន័យចុងក្រោយបង្អស់ពីគយក្រុងណាននីង (Nanning) បានបង្ហាញថា ពាណិជ្ជកម្មរវាងតំបន់ស្វយ័តក្វាងស៊ី (Guangxi) របស់ប្រទេសចិន និងអាស៊ាន បានឈានដល់ជាង ៣៦ ពាន់លានដុល្លារក្នុងរយៈពេល ៧ ខែដំបូងនៃឆ្នាំ២០២៦ ដែលកើនឡើង ២,៥% ធៀបរយៈពេលដូចគ្នាកាលពីឆ្នាំមុន និងបង្កើតកំណត់ត្រាថ្មីសម្រាប់រយៈពេលនេះផងដែរ។
ក្របខ័ណ្ឌមួយទៀតដែលគាំទ្រដល់ពាណិជ្ជកម្មក្នុងតំបន់ គឺកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលជាកិច្ចព្រមព្រៀងពាណិជ្ជកម្មមានសមាជិក ១៥ ប្រទេស រួមមាន ចិន ជប៉ុន កូរ៉េខាងត្បូង អូស្ត្រាលី នូវែលសេឡង់ និងប្រទេសសមាជិកអាស៊ានទាំង ១០ ដែលបានចូលជាធរមានក្នុងខែមករា ឆ្នាំ២០២២ ហើយត្រូវបានអនុវត្តពេញលេញដោយប្រទេសហត្ថលេខីទាំង ១៥ ចាប់តាំងពីខែមិថុនា ឆ្នាំ២០២៣ មក។
លើសពីនេះ បណ្តាញដឹកជញ្ជូនចិន-អាស៊ានដែលកំពុងរីកចម្រើន បានជួយសម្រួលដល់ការដឹកជញ្ជូន និងបានជម្រុញឱ្យមានការកើនឡើងយ៉ាងខ្លាំងនៃពាណិជ្ជកម្ម។ តួយ៉ាង ផ្លូវរថភ្លើង «ចិន-ឡាវ» ដែលបានចាប់ផ្តើមប្រតិបត្តិការក្នុងខែធ្នូ ឆ្នាំ២០២១ និងតភ្ជាប់ទីក្រុងគុនមីង (Kunming) ភាគនិរតីប្រទេសចិន ជាមួយទីក្រុងវៀងចន្ទន៍ ដែលជារដ្ឋធានីរបស់ប្រទេសឡាវ បានកត់ត្រាទំហំពាណិជ្ជកម្មនាំចេញ-នាំចូលជាង ២,៥ ពាន់លានដុល្លារនៅក្នុងឆមាសទី១ នៃឆ្នាំ២០២៦ ដែលកើនឡើង ៣៣,៨% ធៀបនឹងរយៈពេលដូចគ្នាកាលពីឆ្នាំមុន។
អំឡុងពេលនោះ ការនាំចូលផ្លែឈើតំបន់ក្ដៅ ដូចជា ទុរេន មង្ឃុត និងមៀន បានកើនឡើង ២៥,៨% ដល់ចំនួនជាង ៦២៦ លានដុល្លារ។ បច្ចុប្បន្ន ផ្លូវរថភ្លើងនេះបានដឹកជញ្ជូនទំនិញច្រើនជាង ៣ ៩០០ មុខ ដោយសេវាកម្មដឹកជញ្ជូនទំនិញបានទៅដល់ទីផ្សារក្នុងប្រទេស និងដែនដីចំនួន ១៩៕
ចែករំលែកព័តមាននេះ