អន្តរជាតិ ៖ តម្លៃប្រេងឆៅអន្តរជាតិដើមសប្តាហ៍នេះ បានកើនឡើង ១% នៅថ្ងៃទី១៧ ខែសីហា ឆ្នាំ២០២៦ ដោយសារតែការជាប់គាំងនៃដំណើរការឈានទៅរកសន្តិភាពរវាងសហរដ្ឋអាមេរិក និងអ៊ីរ៉ង់ ព្រមទាំងចរាចរណ៍នាវាដឹកប្រេងមានភាពយឺតយ៉ាវតាមរយៈច្រកសមុទ្រហ័រមូស (Hormuz) បានបង្កើនក្តីបារម្ភអំពីហានិភ័យភូមិសាស្ត្រនយោបាយនៅក្នុងទីផ្សារ។ នេះបើតាមប្រភពពី Reuters បានចេញផ្សាយ។
ប្រេងឆៅ Brent ស្តង់ដាអន្តរជាតិ បានកើនឡើងរហូតដល់ ១% នៅក្នុងតម្លៃ ៨៩,៤០ ដុល្លារអាមេរិកក្នុង១បារ៉ែល គិតត្រឹមម៉ោង ៩:៣០ នាទីព្រឹក (ម៉ោងនៅកម្ពុជា) ។ រីឯប្រេងឆៅ West Texas Intermediate (WTI) របស់សហរដ្ឋអាមេរិក ក៏បានកើនឡើង ៤៤ សេន ដល់តម្លៃ ៨២,៨៣ ដុល្លារក្នុង១បារ៉ែល។
ការជួញដូរប្រេងឆៅទាំងពីរបានកើនឡើងជាង ៥% កាលពីសប្តាហ៍មុន បន្ទាប់ពីមានការវាយប្រហារលើបណ្តាកប៉ាល់ដឹកប្រេងប្រតិបត្តិការដោយក្រុមហ៊ុនប្រេងជាតិប្រទេសអេមីរ៉ាតអារ៉ាប់រួម Abu Dhabi National Oil Company នៅក្នុងច្រកសមុទ្រហ័រមូស ក៏ដូចជាលើរោងចក្រចម្រាញ់ប្រេងក្រុមហ៊ុន Aramco របស់អារ៉ាប៊ីសាអូឌីត។
កាលពីចុងសប្តាហ៍មុន រដ្ឋមន្ត្រីការបរទេសអ៊ីរ៉ង់ លោក Abbas Araqchi បានប្រកាសថា ប្រទេសអ៊ីរ៉ង់មិនទាន់បានសម្រេចចិត្តបន្តការចរចាជាមួយសហរដ្ឋអាមេរិកឡើងវិញនៅឡើយទេ ខណៈដែលប្រធានាធិបតីសហរដ្ឋអាមេរិក លោក ដូណាល់ ត្រាំ បានជំរុញឱ្យពលរដ្ឋអាមេរិកទទួលយកតម្លៃប្រេងសាំងដែលឡើងថ្លៃបន្តិចបន្តួច អំឡុងពេលដែលជម្លោះនេះកំពុងបន្តកើតមាន។
ទិន្នន័យតាមដានកប៉ាល់ដឹកជញ្ជូនពីក្រុមហ៊ុន Kpler នៅថ្ងៃទី១៧ ខែសីហា បានបង្ហាញថា ការដឹកជញ្ជូនតាមរយៈច្រកសមុទ្រហ័រមូសមានការថយចុះកាលពីចុងសប្តាហ៍កន្លងទៅ បន្ទាប់ពីមានការវាយប្រហារលើបណ្តាកប៉ាល់ដឹកប្រេង ដោយកប៉ាល់ត្រឹម ៥ គ្រឿងប៉ុណ្ណោះបានឆ្លងកាត់កាលពីថ្ងៃទី១៥ ខែសីហា ហើយគ្មានកប៉ាល់ណាមួយត្រូវបានកត់ត្រានៅ១ថ្ងៃបន្ទាប់នោះទេ ដែលជាចំនួនដ៏តិចមួយ បើធៀបនឹងចំនួន ៣១ គ្រឿង កាលពីជិត១០ថ្ងៃមុន៕
ចែករំលែកព័តមាននេះ