ទីក្រុងកាប៊ុល៖ ថ្ងៃនេះ ក្រុមតាលីបង់រំលឹកខួបទី៥ឆ្នាំនៃការឡើងកាន់អំណាចរបស់ខ្លួនសាជាថ្មីកាលពីឆ្នាំ២០២១ដោយមានការរៀបចំពិធីជួបជុំគ្នាដើម្បីអបអរសាទរនូវអ្វីដែលខ្លួនអះអាងថាជាការនាំយកនូវស្ថិរភាពសម្រាប់ប្រទេសជាតិ និងការបិទបញ្ចប់ជម្លោះផ្ទៃក្នុងដ៏រ៉ាំរ៉ៃអស់ជាច្រើនទសវត្សរ៍។ ទោះជាបែបនេះក្ដី មន្ត្រីជាន់ខ្ពស់របស់អង្គការសហប្រជាជាតិអះអាងថាអាហ្វហ្កានីស្ថានមិនមែនរស់នៅដោយសុខសន្តិភាពនោះឡើយព្រោះវិបត្តិសិទ្ធិមនុស្សកំពុងកើតមានយ៉ាងធ្ងន់ធ្ងរនៅក្នុងប្រទេសនេះ។ កុមារី ឬនារីដែលមានអាយុលើសពី១២ឆ្នាំឡើងទៅគ្មានឱកាសទទួលបានការសិក្សារៀនសូត្រទេ។
ក្រុមតាលីបង់ឡើងកាន់អំណាចកាលពីថ្ងៃទី១៥ ខែសីហា ឆ្នាំ២០២១ នៅពេលអាមេរិក និងអង្គការណាតូដកកងទ័ពរបស់ខ្លួនចេញអាហ្វហ្កានីស្ថានទាំងស្រុង។ ពួកគេខិតខំចំណាយលុយរាប់សិបពាន់លានដុល្លារដើម្បីទប់ស្កាត់មិនឱ្យក្រុមតាលីបង់វិលត្រឡប់មកវិញ។ ប៉ុន្តែកិច្ចខិតខំប្រឹងប្រែងរបស់ពួកគេក្លាយជាអសារឥតការ។ ហេតុនេះនៅទីបញ្ចប់ ពួកគេបណ្ដោយឱ្យប្រទេសនេះរស់នៅតាមយថាកម្មទៅចុះ។ អាមេរិកដកថយពីអាហ្វហ្កានីស្ថានចុងក្រោយពីអាកាសយានដ្ឋានទីក្រុងកាប៊ុលនៅពេលមនុស្សរាប់សែននាក់ប្រជ្រៀតគ្នាទៅទីនោះដើម្បីឡើងជិះយន្តហោះទៅកសាងជីវិតថ្មីនៅប្រទេសដទៃ។
បន្ទាប់ពីឡើងកាន់អំណាចភ្លាម ក្រុមតាលីបង់ដាក់បម្រាមមិនឱ្យស្ត្រីមានឱកាសរៀនសូត្រលើសពីថ្នាក់ទី៦ទេ ហើយក្រោយមកហាមឃាត់មិនឱ្យរៀនមហាវិទ្យាល័យថែមទៀត។ គេនៅចាំបានថាមុនពេលឡើងកាន់អំណាច ពួកគេសន្យាថានឹងអនុញ្ញាតឱ្យស្ត្រីរៀនសូត្រចេះដឹង មានការងារធ្វើ និងធ្វើការនៅក្នុងវិស័យសាធារណៈ។ មិនត្រឹមតែមិនបានរៀនសូត្រថ្នាក់ធំទេ ស្ត្រីក៏ត្រូវតាលីបង់ហាមឃាត់មិនឱ្យដើរចូលទីសាធារណៈដូចជាក្លឹបហាត់ប្រាណ សួនឧទ្យាននានា មិនឱ្យចូលរួមលេងកីឡា និងមិនឱ្យធ្វើដំណើរចេញពីផ្ទះដោយគ្មានបុរសជាប្ដី ឬជាសាច់ញាតិរបស់ខ្លួនអមដំណើរ។ គេឃើញមន្ត្រីជាន់ខ្ពស់របស់ក្រុមតាលីបង់ចូលរួមនៅក្នុងពិធីអបអរសាទរការឡើងកាន់អំណាចដោយមានក្រុមអ្នកតំណាង និងប្រជាជនធម្មតារាប់ពាន់នាក់ដើម្បីរង់ចាំស្ដាប់ការថ្លែងសុន្ទរកថារំលឹកនូវព្រឹត្តិការណ៍ដែលពួកគេចាត់ទុកថាជាការរំដោះជាតិមាតុភូមិចេញពីនឹមត្រួតត្រារបស់ទាហានអាមេរិក។
ក្រុមតាលីបង់ទោះបីក្លាយជារដ្ឋាភិបាលដឹកនាំប្រទេសក៏ដោយ ក៏ពួកគេនៅតែរស់នៅឯកោពីសហគមន៍អន្តរជាតិ។ មានតែប្រទេសរុស្ស៊ីមួយគត់ដែលចេញមុខទទួលស្គាល់របបនេះថាជារដ្ឋាភិបាលស្របច្បាប់។ អ្នកនាំពាក្យរងរបស់ក្រុមតាលីបង់ថ្លែងថាយើងសូមបួងសួងទៅព្រះជាម្ចាស់តាមថែរក្សាមាតុភូមិរបស់យើងឱ្យចាកផុតពីការត្រួតត្រារបស់បរទេស ចាកផុតពីអំពើឈ្លានពាន សង្គ្រាម និងបញ្ហាអសន្តិសុខផងទាំងពួងដើម្បីឱ្យប្រជាជនរបស់យើងរស់នៅក្នុងសន្តិភាព ក្សេមក្សាន្តភាព និងវិបុលភាព។ នៅក្នុងពិធីជួបជុំនោះ គេមិនឃើញស្ត្រីចូលរួមទេ។ គេឃើញមានការរៀបចំពិធីផ្សេងៗនៅតាមបណ្ដាខេត្តនានាទូទាំងប្រទេសអាហ្វហ្កានីស្ថាន។ គេឃើញទង់ជាតិ និងបដាផ្សេងៗត្រូវគេដាក់តាំងយ៉ាងព្រោងព្រាតអមដោយពាក្យស្លោកដែលថ្លែងកោតសរសើរការវិលត្រឡប់មកវិញរបស់ក្រុមតាលីបង់។ លោករីឆាត បេនណិត (Richard Bennett) ជាអ្នករាយការណ៍ពិសេសរបស់អង្គការសហប្រជាជាតិប្រចាំប្រទេសអាហ្វហ្កានីស្ថានថ្លែងថាប្រទេសនេះកំពុងកើតមានវិបត្តិសិទ្ធិមនុស្សធ្ងន់ធ្ងរ៕ ប្រភព៖ Times of Israel
ចែករំលែកព័តមាននេះ