ទីក្រុងប៉ារីស៖ ថ្ងៃនេះ តុលាការធម្មនុញ្ញបារាំងចេញសេចក្ដីសម្រេចទុកជាមោឃៈនូវសេចក្ដីព្រាងច្បាប់របស់រដ្ឋាភិបាលដែលចង់ហាមឃាត់ក្មេងៗក្រោមអាយុ១៥ឆ្នាំមិនឱ្យប្រើប្រាស់បណ្ដាញសង្គម។ តុលាការយល់ថាការហាមឃាត់ពួកគេនឹងធ្វើឱ្យប៉ះពាល់សិទ្ធិបញ្ចេញមតិ។ ប្រធានាធិបតីបារាំង លោកម៉ាក្រុង បានបង្គាប់ឱ្យនាយករដ្ឋមន្ត្រី លោកសេបាស់ស្ទៀន ឡឺគ័រនូ (Sébastien Lecornu) រៀបចំសេចក្ដីព្រាងច្បាប់នេះឡើងវិញដើម្បីដាក់បញ្ចូលនូវអ្វីដែលជាការចាប់អារម្មណ៍ ឬកង្វល់របស់តុលាការធម្មនុញ្ញ។ នេះបើយោងតាមសេចក្ដីថ្លែងការណ៍របស់វិមានប្រធានាធិបតីបារាំង អេលីហ្សេ (Elysée)។
គេហទំព័របារាំងសរសេររៀបរាប់ថាតុលាការធម្មនុញ្ញសម្រេចបិទខ្ទប់សេចក្ដីព្រាងច្បាប់របស់រដ្ឋា ភិបាលដែលចង់ហាមឃាត់មិនឱ្យក្មេងក្រោមអាយុ១៥ឆ្នាំប្រើប្រាស់បណ្ដាញសង្គម។ តុលាការបញ្ជាក់ថាសេចក្ដីព្រាងច្បាប់នេះរំលោភសិទ្ធិបញ្ចេញមតិ។ នេះជាការទះមួយកំផ្លៀងយ៉ាងដំណំសម្រាប់រដ្ឋា ភិបាលម៉ាក្រុងដែលបានបញ្ជាឱ្យរៀបចំសេចក្ដីព្រាងច្បាប់នេះឡើងវិញ។ តុលាការបានសរសេររៀបរាប់នៅក្នុងសេចក្ដីសម្រេចរបស់ខ្លួនថា «តាមរយៈការហាមឃាត់អនីតិជនក្រោមអាយុ១៥ឆ្នាំមិនឱ្យប្រើប្រាស់សេវាបណ្ដាញសង្គម ច្បាប់តម្រូវឱ្យបុគ្គលគ្រប់រូប រួមទាំងមនុស្សពេញវ័យផងដែរ ត្រូវតែបញ្ជាក់អាយុរបស់ពួកគេមុនពេលប្រើប្រាស់សេវានោះបាន»។
តុលាការសរសេររៀបរាប់បន្តទៀតថា «ទោះជាយ៉ាងណាក្ដី ដោយសារច្បាប់មិនបានកំណត់លក្ខខណ្ឌជាក់លាក់ និងការដាក់កំហិតជាក់លាក់ទៅលើការបញ្ជាក់អាយុរបស់អ្នកប្រើប្រាស់បណ្ដាញសង្គម ដូចនេះសេចក្ដីព្រាងច្បាប់មិនបានបង្កើតយន្តការធានាសុវត្ថិភាពស្របច្បាប់ដើម្បីធានាថាលក្ខខណ្ឌកំណត់នោះនឹងត្រូវបានគេអនុវត្តយ៉ាងខ្ជាប់ខ្ជួន»។ វិមានអេលីហ្សេសរសេររៀបរាប់នៅក្នុងសេចក្ដីប្រកាសរបស់ខ្លួនថាលោកម៉ាក្រុងតាំងចិត្តយ៉ាងមោះមុតថាត្រូវតែធ្វើកំណែទម្រង់ច្បាប់នេះដើម្បីអនុវត្តមុនរដូវផ្ការីក ឆ្នាំ២០២៧ ជាពេលដែលបារាំងរៀបចំការបោះឆ្នោតប្រធានាធិបតីអាណត្តិថ្មី។
ក្រុមអ្នកតំណាងរាស្ត្របារាំងបានអនុម័តសេចក្ដីព្រាងច្បាប់ហាមឃាត់កុមារក្រោមអាយុ១៥ឆ្នាំមិនឱ្យប្រើប្រាស់បណ្ដាញសង្គម។ សេចក្ដីព្រាងច្បាប់នេះជាករណីដំបូងបំផុតនៅទ្វីបអឺរ៉ុប។ កាលពីមុននេះ ប្រទេសអូស្ត្រាលីក៏មានច្បាប់នេះដែរ ហើយឥណ្ឌូណេស៊ីក៏មានច្បាប់នេះដែរ។ អូស្ត្រាលីហាមឃាត់ក្មេងក្រោមអាយុ១៦ឆ្នាំមិនឱ្យប្រើប្រាស់ហ្វេសប៊ុក ទីកតុក និងយូធូបទេ។ សេចក្ដីសម្រេចរបស់តុលាការបារាំងនៅថ្ងៃនេះមិនបានធ្វើឱ្យលោកម៉ាក្រុងដកថយទេ។ លោកបានចេញបញ្ជាទៅនាយករដ្ឋមន្ត្រីដើម្បីសរសេរសេចក្ដីព្រាងច្បាប់នេះឡើងវិញ និងដើម្បីធ្វើយ៉ាងណាបញ្ចុះបញ្ចូលឱ្យតុលាការធម្មនុញ្ញទទួលយក៕ ប្រភព៖ France 24
ចែករំលែកព័តមាននេះ