រឿងបង្គោលភ្លើងសឡា ! អស់បុណ្យសក្តិម្នាក់ទៀតហើយ
- កំពង់ឆ្នាំង
ខេត្តកំពង់ឆ្នាំង ៖ មិនទាន់ស្ងប់ទេ រឿងភាពមិនប្រក្រតីនៃការប្រើប្រាស់មូលនិធិ ដើម្បីអភិវឌ្ឍន៍ ឃុំសង្កាត់ ក្នុងខេត្តកំពង់ឆ្នាំង បន្ទាប់ពីផ្ទុះរឿងបង្គោលភ្លើងសឡានៅឃុំទឹកហូត ស្រុករលាប្អៀរ មានតម្លៃ ៨លានរៀល ត្រូវបានរិះគន់ពេញបណ្តាញសង្គម ។ អាជ្ញាធរខេត្តកំពង់ឆ្នាំងបានដកមុខតំណែងមន្ត្រីសាលាខេត្ត ២រូប បន្ទាប់មកនៅថ្ងៃទី ១៤ ខែសីហា នេះ អាជ្ញាធរខេត្តបានសម្រេចដកមន្ត្រីមួយរូបបន្ថែមទៀត ។
សូមរំលឹកថា ក្រោយពីមានភាពមិនប្រក្រតី ក្នុងការចំណាយថវិកាមូលនិធិឃុំទឹកហូត ស្រុករលាប្អៀរ នៅក្រោយការស្រាវជ្រាវរួចមក មន្ត្រី ២រូបត្រូវបាន អភិបាលខេត្តកំពង់ឆ្នាំងបញ្ចប់មុខតំណែងជាបន្ទាន់ក្នុងនោះ ១-លោក ហង្ស ពិសី ពីនាយកទីចាត់ការផែនការ និងវិនិយោគ សាលាខេត្តកំពង់ឆ្នាំង មកជាមន្ត្រីការិយាល័យគ្រប់គ្រង បុគ្គលិក ទីចាត់ការគ្រប់គ្រងធនធានមនុស្សសាលាខេត្តកំពង់ឆ្នាំង ។ ២- លោក វ៉ាន់ ថេន នាយកទីចាត់ការអន្តរវិស័យសាលាខេត្ត មកជាមន្ត្រីការិយាល័យបុគ្គលិក ទីចាត់ការគ្រប់គ្រងធនធានមនុស្សសាលាខេត្ត ។
ដោយឡែកនៅថ្ងៃ ១៤ ខែសីហា នេះផងដែរ អភិបាលខេត្តកំពង់ឆ្នាំងបានសម្រេចដកមុខតំណែងមន្ត្រីសាលាខេត្តមួយរូបទៀតគឺលោក កែវ វន្នី នាយករងទីចាត់ការផែនការ និងវិនិយោគ សាលាខេត្តកំពង់ឆ្នាំង មកជាមន្ត្រីការិយាល័យគ្រប់គ្រងបុគ្គលិក នៃទីចាត់ការគ្រប់គ្រងធនធានមនុស្សសាលាខេត្តកំពង់ឆ្នាំងវិញ ។ មានន័យថា រឿងមិនទាន់ស្ងប់នៅឡើយទេរឿងចាយប្រាក់មូលនិធិឃុំសង្កាត់ក្នុងខេត្តកំពង់ឆ្នាំង ។
សូមបញ្ជាក់ថា ក្រោយពីបង្កើតក្រុមការងារចំពោះកិច្ច សម្រាប់ត្រួតពិនិត្យភាពមិនប្រកដីនៃការអនុវត្តមកលទ្ធិឃុំសង្កាត់ក្នុងខេត្តកំពង់ឆ្នាំង កាលពីថ្ងៃទី ១៣ សីហា ម្សិលមិញនេះ ក្រុមការងារចំពោះកិច្ចបានពិនិត្យស្រាវជ្រាវ ឃុំចំនួន ៥ បន្ថែមទៀត ក្នុងនោះឃុំ ទឹកហូតស្រុករលាប្អៀរ ឃុំមេលំ ស្រុកបរិបូណ៌ ឃុំចោងម៉ោង ស្រុកទឹកផុស ឃុំសេដ្ឋីសុខសាមគ្គីមានជ័យ និងឃុំលង្វែក ស្រុកកំពង់ត្រឡាច ។លទ្ធផលយ៉ាងណានៅមិនទាន់ដឹងនៅឡើយទេ ។
ពេលណាមានព័ត៌មានប្លែក យើងនឹងផ្សាយជាបន្ត ៕
ចែករំលែកព័តមាននេះ