រាជធានីភ្នំពេញ ៖ សហរដ្ឋអាមេរិក គាំទ្រកិច្ចខិតខំប្រឹងប្រែងរបស់កម្ពុជា ក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែន រួមទាំងការឆបោកតាមអនឡាញ ។
យោងតាមបណ្តាញសង្គមរបស់ស្ថានទូតអាមេរិក នៅកម្ពុជា បានឱ្យដឹងថា លោកស្រី Aleks Zittle ភារធារីស្ថានទូតអាមេរិក បានជួបពិភាក្សាការងារជាមួយឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌ អំពីការអនុវត្តច្បាប់ ស្តីពីការប្រឆាំងការឆបោកតាមប្រព័ន្ធបច្ចេកវិទ្យា របស់កម្ពុជា និងបានគូសបញ្ជាក់ពីសារៈសំខាន់ នៃការស៊ើបអង្កេត និងនាំយកអ្នករៀបចំ និងបញ្ជាឱ្យប្រព្រឹត្តអំពើឆបោកតាមអនឡាញ ព្រមទាំងអ្នកដែលជួយសម្របសម្រួលឱ្យប្រតិបត្តិការទាំងនេះអាចបន្តរីកចម្រើន ទៅកាត់ទោសតាមច្បាប់ ។
ភាគីទាំងពីរ បានពិភាក្សាអំពីជំនួយបច្ចេកទេសយ៉ាងទូលំទូលាយ ដែលសហរដ្ឋអាមេរិក កំពុងផ្តល់ជូន ដើម្បីជួយកម្ពុជាទប់ស្កាត់ការគំរាមកំហែងពីក្រុមឧក្រិដ្ឋជនឆ្លងដែន ដែលប្រតិបត្តិការមជ្ឈមណ្ឌលឆបោកតាមអនឡាញ នៅកម្ពុជា ។
សហរដ្ឋអាមេរិក នឹងបន្តធ្វើការជាមួយកម្ពុជា ដើម្បីពង្រឹងកិច្ចសហប្រតិបត្តិការក្នុងការអនុវត្តច្បាប់ ដើម្បីការពារពលរដ្ឋអាមេរិក និងអ្នកដទៃទៀតពីបណ្តាញឧក្រិដ្ឋជនទាំងនេះ ៕
ចែករំលែកព័តមាននេះ