ទីក្រុងហាណូយ ៖ ប្រទេសវៀតណាមនាំចេញផ្លែទុរេនទៅកាន់ប្រទេសចិន រកចំណូលបានជិត ៩៨៨ លានដុល្លារអាមេរិក នៅក្នុងឆមាសទី១ នៃឆ្នាំ ២០២៦ ដែលជាការកើនឡើង បើធៀបនឹងរយៈពេលដូចគ្នា កាលពីឆ្នាំមុន។ នេះបើតាមប្រភពពីសារព័ត៌មាន Vietnam Express (VnExpress) ចេញផ្សាយនៅថ្ងៃទី១១ ខែសីហា ឆ្នាំ២០២៦។
យោងតាមទិន្នន័យពីអគ្គនាយកដ្ឋានគយបានបង្ហាញថា ប្រទេសចិនបានចំណាយប្រាក់ ២,០៤ ពាន់លានដុល្លារ ដើម្បីទិញបន្លែ និងផ្លែឈើពីប្រទេសវៀតណាម នៅក្នុងឆមាសទី១ នៃឆ្នាំនេះ ដែលកើនឡើងជិត ២៥% ហើយនៅក្នុងនោះ ទុរេនបានរួមចំណែករហូតដល់ ៩៨៨ លានដុល្លារ ពោលគឺកើនឡើង ៤៣,៤% ឬស្មើនឹង ៤៨,៤៥% នៃតម្លៃនាំចេញបន្លែ និងផ្លែឈើសរុប។
និន្នាការកើនឡើងនៃតម្លៃផ្លែទុរេនអាចនឹងបន្តទៅមុខទៀត ខណៈការផ្គត់ផ្គង់កាន់តែមានភាពសម្បូរបែប។ យោងតាមលោកអគ្គលេខាធិការ នៃសមាគមបន្លែ ផ្លែឈើវៀតណាម បានឱ្យដឹងថា តំបន់ខ្ពង់រាបកណ្តាល ដែលជាតំបន់ដាំដុះទុរេនធំបំផុតរបស់ប្រទេសវៀតណាម ទើបតែបានចាប់ផ្តើមរដូវកាលប្រមូលផលកម្រិតខ្ពស់បំផុតរបស់ខ្លួន។ ដូច្នេះបើល្បឿនបច្ចុប្បន្ននៅតែបន្តរក្សាបាននោះ ការនាំចេញទុរេនសម្រាប់ពេញមួយឆ្នាំ ២០២៦នឹងកើនឡើងយ៉ាងខ្លាំង បើធៀបនឹងរយៈពេលដូចគ្នា កាលពីឆ្នាំមុន។
បច្ចុប្បន្នទុរេនវៀតណាម ក៏កំពុងស្វែងរកឱកាសបន្ថែមទៀត ដើម្បីពង្រីកខ្លួនទៅក្រៅពីទីផ្សារប្រទេសចិនផងដែរ។ កាលពីចុងខែកក្កដាកន្លងទៅ ប្រទេសឥណ្ឌាបានអនុញ្ញាតឱ្យនាំចូលទុរេនស្រស់ពីវៀតណាម ដែលនេះបានបើកផ្លូវទៅកាន់ទីផ្សារ១ផ្សេងទៀត ដែលមានប្រជាជនច្រើនជាងគរនៅលើពិភពលោក ពោលជាង ១,៤ ពាន់លាននាក់។
ទោះជាយ៉ាងណាក៏ដោយ អ្នកជំនាញបានអះអាងថា ចំនួនប្រជាជនច្រើនមិនប្រាកដថាទុរេននឹងលក់ដាច់ខ្លាំងភ្លាមៗនោះទេ ដោយសារតែទុរេននៅតែប្លែកសម្រាប់អ្នកទទួលឥណ្ឌាភាគច្រើន ខណៈដែលពន្ធនាំចូល ទម្លាប់នៃការទទួលទាន និងប្រព័ន្ធចែកចាយ សុទ្ធតែត្រូវការពេលវេលាដើម្បីសម្របខ្លួន៕
ចែករំលែកព័តមាននេះ